當只有紫荊花可以揀,你會點做?

| | ,

今次喺Twitter搞投票,如果輕鬆角度去講,其實大家揀或自己講嘅市花,係代表自己腦中嘅香港,有乜獨特嘅象徵,寫花之戀個班暴露自己年紀,寫樓花一定係萬惡資本主義嘅奴隸,揀豆腐花個班,我唔知講乜,但我會推薦用水泉澳山水做豆腐花,揀如花個啲……

image001

無論係官方 (我) 提供,定各位自己提供嘅答案,每一個都或多或少,令香港人有所共鳴,如花係對香港電影,木綿花係對城市環境,豆腐花係對生活,係嘅,唔知點解郊外一定係賣豆腐花,一系列嘅答案同選擇,都係香港人嘅共同經歷同生活。

而點解我會係選擇入面,有木綿花、桃花、芒草?木線花,應該可以講係我細個接觸最多嘅一種,亦係香港建設新市鎮時,種植最多嘅一種,無論係木綿花開嘅紅花遍遍,結果嘅時候飄絮紛飛,都可以講係我細個嘅記憶。

而桃花?亦都係我細個接觸最多,因為我以前住嘅地方,出入都有人種桃花,所以對我黎講,我嘅桃花……唔係,當大家新年嘅時候,先見盛開嘅桃花個陣,其實我比好多人,直接一見就一片花海。

芒草?唔……我諗好簡單,近幾年最熱門嘅植物,仲唔係芒草?啲人特登係山到割完拎返落黎,我真想好講:我屋企附近都已經有,仲要唔洗爬山……(唔好亂摘植物,一來環境同保育,二來係犯法。)

點解我會放紫荊花?呢個就係我想透過投票,觀察嘅一啲現象:「當無正確答案嘅時候,大家會有乜反應?」

20201445002

點解有紫荊,無洋紫荊?—

係投票條推文之後,我都有打句:「唔好話答案乜乜叉叉,我就係想做一個實驗,所以過咗一日先。」我唔知有幾多人,真係以為我唔知,但呢個唔係重點,喺我刻意誤導下,有57%嘅人,係無正確答案選擇下,都揀左紫荊花,會大概有咁嘅可能:

1:我知係洋紫荊,但我見答案無,所以揀個最似。

2:下?乜有分洋紫荊同紫荊花?我以為紫荊花就係。

3:紫荊花就係市花囉。

4:我唔小心㩒錯左。

5:我刻意。

重申,我唔係要鬧人揀左錯嘅答案,因為原本我想做到連有人提出正確答案,我都唔俾人睇,但係一來留言者眾,二來我無時間隱藏,所以一個鐘左右後,都俾人留言講,然後就有個有興趣現象,其實好多人都講左正確答案,甚至講左四個都唔係,甚至應該會覺得我唔識,但係都有過半嘅人,喺有人提出正確答案情況,揀左錯誤答案。

呢個先係我最留意嘅情況。

當然,你可能覺得我陰左大家,你可以咁講,但係我地每一日喺資訊世代,又何嘗唔係每日都接觸緊似是而非嘅資訊?所以今次我係有心咁做,我亦都唔係為左要講:「香港人真係唔識」

20201445003

因為我相信好多人都知,洋紫荊就係香港市花,只係當面對相似或類同會有所混淆,而呢個情況正正係香港面對嘅情況。

甚至就好似我講嘅第五個可能性:刻意

香港人史觀 —

一直以黎,中國都對港英史係非常嘅敏感,因為香港嘅掘起係因為源於清帝國戰敗,香港因英國統治而興盛,對於帝國承繼者:中國共產黨,同一眾大中華主義者心中亦係一條刺,所以中國國內不停有人主張去殖化,或唔同形式嘅同化。

將混淆係其中一種,而最明顯嘅兩件事係:九七年金融風暴,及零三年沙士疫情,前者喺近幾年,不斷吹噓中國協助香港,但事實上,當年係靠香港累積嘅儲備去應對危機,當時中國根本自顧不暇,但中國國內係不斷主張,當年係中國借貸俾香港應對。

而後者中國更加係長期隱瞞爆發原因,同低估疫情引發疫情,但長久以黎就不斷吹奏,中國如何協助香港抗疫,但實際都係靠香港嘅醫療系統,同專家搵出醫療方法。

歴史呢樣嘢,係可以被人改造扭曲,呢個係我覺得大家要留意嘅事,當發現嘅時候,係需要發聲,同提出有理據嘅質疑。

投票背後 —

截止時,投票有42846曝光次數,有2226人互動過,有863人投票,有57%(約492人)投左紫荊花,有49人留言答洋紫荊或四個都錯,當然我希望2226人,無投票個班係因為知無正確答案而無投,但我更希望更多人知道正確答案出聲,就算佢唔係投票項目之內。

點解咁做?我諗大家可以思考下。

當然呢次唔係乜嚴肅學術,或嚴格嘅實驗,啲結果亦未必全面反映事實,但其實透過今次投票,可以睇到好多有趣,或有意義嘅行為,最少係大家留樓花、如花、豆腐花,甚至其他植物,都反映到香港同港人獨有連繫。

好多野唔係只有棟起個姿態,好嚴肅咁講先有價值,相反幽默同輕鬆背後,亦可以藏有好多事物,就好似今次投票一樣,結果又好,過程又好,任何事物背後都可以有深意,態度或形式唔係重點,重點係你點睇點諗。

前提係:「你願意思考嗎?

伸延閱讀:Happy Kongner 快活角落頭—《當我們在談論歷史時我們在談論什麼—李繼忠個人展覽「醒來已是百年身」》

Previous

《紅樓夢》與香港 (上)

《紅樓夢》與香港 (下)

Next