NGO = Non-Generosity Organization

| | ,

港共蒙面恐怖份子、黑暴光天化日之下粗暴鎮壓十二歲女孩反人類暴行,肇事當日已經炎上,林鄭軍閥臭名再次遠播,世界各地又頭條,在下能想像到:就算我只係外國勢力國家是但一位將香港內戰當花生食嘅閒人,呢 15 個月以嚟睇住貴國恐怖份子屢創新意嘅「嚴正執法」表現,再大膽嘅人大慨都早已睇到膽戰心驚,而家呢堆匿名匿到IS 同行都自愧不如嘅恐怖份子連大肚婆同細路女都毫不猶豫咁打打打打,我絕對相信香港而家不可能遭受任何恐襲 —— 正常恐怖份子都係血肉之軀,都怕死嘅,外國呢啲次貨仲點會敢嚟香港搵真貨送死呢?


正所謂時窮節乃現,香港地太平盛世時係各種情緒勒索 + 左翼大愛 NGO 搵銀勝地,東方之珠好歹都叫做算係人均收入早已富起來嘅國家,無論無國界醫生,定係中國永續窮困地區人人有功練,還是本地薑美其名「守護孩子」嘅護苗基金,呢度曾經係一片只要你敢厚面皮立 Flag,香港人(即善信或者羊牯)就會課金「做善事」,香港人冇嘢多,錢最多,你敢乞食 aka 籌集善款,啲錢就會繼續嚟。


偏偏呢堆大名鼎鼎嘅 NGO 食君之祿卻只擔他君之周,香港人由 2019 年起由 3 歲到 80都飽受港共黑暴鎮壓及施虐,無論精神或肉體,港人死傷枕藉,平時道德值爆燈嘅呢班 NGO 卻紛紛變晒「Non-Generosity Organization」,港人曾經年進貢億億聲香油錢,呢堆(聲稱)道德守護者卻連嘴炮譴責一下港共都冇影,早已教人對其絕望,日前恐怖份子襲擊十二歲女孩,人神共憤,掛名護苗嘅基金卻從未護苗,聲稱小童群益會嘅
組織也冇為小童群益發過一聲(只係事後孔明叫人唔好去危險地帶,哈哈)。

或者我應該咁睇啦:菠蘿包冇菠蘿,民建聯既不民主亦冇建港更非聯盟,民主黨最專制,一國兩制連兩粒掣都搵唔到,掛羊頭賣狗肉(甚至狗肉都冇,得返國王的新肉)似乎才是香港人國粹,而社運乞衣們就將呢種國粹不遺餘力咁發揚光大。


正所謂聖人不死,大盜不止,所謂慈善 NGO 呢啲連光說不練都冇講嘅社運乞衣組織,借「慈善」呢種道德及情緒勒索咗各位咁多年,大家活喺呢個咁不堪嘅黑暗時代,我都唔奢求一分錢一分貨啦,但係都唔係一分錢負九分貨咁肉酸下話?既然護苗基金不護苗兼忠心護共,違反商品及說明條例,不如佢改名做「護共基金」啦,即刻順眼晒,名正言順呢。

Previous

紅VAN的預言

泛權威性人格至係普遍香港人核心價值

Next