香港要做稱職名器

| | ,

首先閣下唔洗訕笑我,我寫得出「名器」就梗係知呢個詞語嘅出處,本文指嘅名器係指投鼠忌器嘅器。

中共國安法趕喺香港被中殖23年前夕光速「立法」,港共傀儡及恐怖份子aka黨衛軍自以為執到寶,惡法兩個幾月過去了,它除咗令若干政團香港分部明哲保身自行解散,黑警恐怖份子高調拉黎智英及不同山頭嘅社運知名人士,但係低調放人,港共以「防疫」為藉口取消早已閹得八八九九嘅垃法會選舉,國安法嘅效用暫時就似玻璃天花,它的確令某些各位前毫無顧忌地高談闊論嘅話題投鼠忌器或者隱而不宣,但係呢種資訊潛匿及去數碼先至係回復香港應有新常態 —— 畢竟港中兩地早已係準戰爭關係,知己知彼以及不讓敵人知己早就應該要係常識。

國安法加上黨衛軍不斷武嚇,的確令街頭連儂牆以及既有街頭抗爭模式式微,但呢種令整個社會一直惴惴不安狀態,就似某人有嚴重病癥但一直唔求醫,病人一直單靠噼止痛藥鎮壓痛楚,只會連標都治唔到,病人好好心機咁靜候病情大爆發到藥石無靈,而呢位病人正正係共產香港,中共只係黃綠醫生,國安法=Panadol(止痛藥),如果醫病齋噼Panadol會好,人類歷史以來所有暴政早就長生不老。

民為重,社稷次之,君為輕,君,舟也,民水也,水能載舟亦能覆舟,呢啲老土說話講咗一兩千年,但人類依然係阿寶 . jpg。

國安法根本不可能挽救港人離共拒共之心,呢粒止痛藥嘅副作用卻藥效顯著:美國因此擁有「中港共剝削港人人權」呢個完美藉口,美國制裁港共暴君及褫奪香港aka中共白手套偷呃拐騙美國利益,出師有名,加上中共繼續咀炮無雙式撩交打外交,香港國安法亦同時影響世界各國在港利益,中共外交部恐嚇捷克令歐洲各大國猶如春雷驚醒,原來歐人曾經以為係中國係面善大熊貓,原來熊貓布偶裏面藏着流氓,世界列強意識形態陣營經過中共港共呢十五個月以來瘋狂加速倒米,已經逐漸形成「中國包圍網」及「中共(所謂)一帶一路大中華共榮圈」兩個陣營。

香港作為令中共加速自爆嘅摩打,同時也是中共金融外資脈門,呢個名器唯一要做嘅就係要更加稱職地拆煞車掣,砸軚盤,然後更加起勁咁踩盡油門,然後靜待諸神黃昏。

Previous

武松打虎,係魯莽定勇武?

紅VAN的預言

Next