六四對香港人的意義

| | ,

歷史唔會重覆,但佢會成為我哋燃起提點嘅明光。六四天安門事件至今已經31年,喺近年就對六四事件有住不少嘅爭論。而在我個人立場而言,六四係必須被關注,因為六四事件係一件令世人知道中國共產黨黑暗醜惡嘅重要事件。

 六四可以引起世人對中共厭惡,就如曾引起一時熱話,記錄咗香港反送中抗戰大小事情嘅日本漫畫《香港デモ激動!200日》嘅男主角秋田為例,秋田喺2018年來到香港留學,就喺秋田到大學會見教授時,見到佢個教授睇緊六四集會嘅片段,繼而吸引到秋田以唔同嘅方法再深入咁了解六四事件嘅來龍去脈。「啊!原來有個19歲嘅後生仔比人打中左邊個腦所以死咗」「哇!原來有成萬人係天安門事件中冇咗條命,而中國政府仲試圖隱瞞」男主角秋田仲因為得知六四事件後,參加咗六四三十周年嘅維園集會,及後更參加咗616嘅200萬+1大遊行。由此可見,六四事件可以令人認清中共殺人成性,掩飾成習嘅可恨之處,更可以令抗爭路上迎來多位同行者。

 而關注六四事件更重要嘅係歷史嘅傳承。中聯辦旗下嘅三中商支配香港出版界,已致教科書染紅問題日益嚴重。以2018年嘅報導為例,香港教育圖書公司其中一本中史書《新理念中國歷史中三》喺 2012年改版時,刪去咗中共對國民黨喺抗戰中嘅作用重新評價嘅內容,唔再討論國民黨喺抗戰中嘅貢獻;同樣係香港教育圖書公司嘅《初中通識:今日香港新視野》當中,喺引述佔中事件各方觀點嘅時候,五個觀點當中只有一人支持佔中,其餘四人分別是中聯辦主仼、人大常委、教育局代表以及一名反佔中嘅市民。而剛才所提到嘅香港教育圖書公司,就係由中聯辦全資擁有(#1)。我本人就唔太清楚今時今日嘅中史教科書係有冇提及六四事件,但就以本人中三,即大概2010~2011年間嘅教科書為例,紀錄六四事件就只得寥寥數行,朦朦朧朧咁就帶過;已更因為追唔上教學進度,所以最終唔能夠喺當時嘅中史課堂上了解到六四嘅前因後果。唯一得到六四歷史嘅傳承,就只係得高中時每年嘅6月4日嘅班主任堂同中文堂中認知。

六四民運嘅抗爭者要求共產黨給予市民言論自由,打撃貪污以及尊重知識份子等等。可惜嘅係,喺當權者眼中,區區草民竟然提出咁多要求,實屬荒謬。而更可怕嘅係,平民膽敢提出要求,本身已經係暴動。點解?因為就如毛澤東所言,革命就是暴動。市民竟然膽敢對政府提出要求,即係推動改革,亦即係推動革命,若依照「革命就是暴動」依個原則,喺共產黨眼中提出要求就即係暴動。而傳承六四最重要嘅就係提醒返各個香港人,應該一如北美殖民時期反英議員Patrick Henry 名言「如果咁都算造反,咁就大反特反吧!」(If this be treason, make the most of it.)

雖然本人希望香港人會關注六四同傳承六四事件,但我唔鼓勵有如支聯會行禮如儀式嘅悼念活動。支聯會每年都只係識喺6月4日悼念六四事件,其餘364日仿佛空無一物。而喺本人眼中,六四事件嘅歷史傳承,係為咗確立本土意識,以至推動香港民族嘅思想。六四集會好應該由維園「平反六四」「結束一黨專政」「結立民主中國」等嘅大中華思想,轉為由香港出發嘅本土主義。唯有將大中華主義中從香港中切割,可能先係推動到香港擁有真正民主嘅重要一步。要注意嘅一點係,台灣嘅民主化係同本土化同時並行。相反香港,過往咁多年都只係高叫建立民主中國等打飛機式口號。但明明自己都未顧得掂,點樣可以理人;明明現今嘅中國人根本冇追求民主同自由嘅精神,又點解要強行要求人民主化。

可能會有大中華派嘅人會話,點解唔可以提出「平反六四」,六四死咁多人點解唔需要平反。而在於個人立場而言,香港人真係唔需要「平反六四」,因為喺香港人眼中,六四事件一早已經下咗定論。根據香港大學民意研究計劃(#2),市民覺得北京學生係六四事件中做得啱唔啱一點中,覺得學生做得啱嘅淨值,由1993年有記以來,全部都係正數。而喺市民覺得中國政府處理六四事件做得啱唔啱一點中,覺得中國政府做得唔啱嘅淨值,長年錄得超過50個百份比。而其實「平反六四」,只係希望共產黨可以轉型正義,正視自己犯下嘅過錯。但如果以本土立場出發,共產黨轉型正義與否,都唔會影響香港太多,因為香港自身都有太多問題,單單達成到「平反六四」,係唔會解決到有如房屋,醫療,教育,交通,政制,官商勾結等等嘅問題。另外,即使中國人民成功平反咗六四件,最多都只會喺將一件一直被忽略甚或被污名化嘅事得到正名,但喺目前依個腐敗政權嘅一黨專政底下,若果個政權唔作出真正嘅改革,正名嘅存在意義可以話係零;就算正名咗依件事,都難保未來會再發生。

六四集會之於香港人,都最終只係一種自我救贖,因為當年眼白白睇住一班滿懷夢想嘅年輕人,比佢哋嘅國家殘忍而且無人性咁屠殺,自己郤無能為力。當日睇直播嘅香港人一定會有好嚴重嘅心理創傷,所以先會每年出席六四集會,以求贖罪。但若香港人再過於糾纏於六四事件上,只會令自己繼續泥足深陷,無法向前。香港人應對態度應為從六四事件中吸取教訓,繼而傳承歷史,再以六四事件為引子向下一代宣揚本土主意。可能唯有咁做先可以令香港可以從共產黨嘅魔爪中逃出生天。

#1.(https://www.thestandnews.com/politics/%E7%9C%BE%E5%BF%97%E8%AA%BF%E6%9F%A5%E6%8F%AD%E6%95%99%E7%A7%91%E6%9B%B8-%E6%9F%93%E7%B4%85-%E4%BF%83%E4%B8%AD%E8%81%AF%E8%BE%A6%E5%81%9C%E5%B9%B2%E9%A0%90%E9%A6%99%E6%B8%AF%E6%95%99%E8%82%B2/

#2.
https://www.hkupop.hku.hk/chinese/features/june4/datatables.html#q1

Previous

方以類聚,物以群分—港人必需正名

僱傭兵攻略 – 到底除了金錢,還要準備什麼?

Next