請勿用黃圈勒死香港Youtuber

| | , ,

雖然標題寫Youtuber,但其實可以套用各產業,如果你係好真心相信「黃圈」,我會建議真係睇左佢,我會用YouTube做例子講一啲問題,因為我唔想大家滿足有嘢做下,做好心,做完CLS,但之後見到班Youtuber頂唔住,出片量大減,人數減少,大家都唔知乜事。

不過係入正題前,其實大家覺得點先幫到「Youtuber」?

CLS就等於幫左Youtuber?

 其實到左今日,係有人推黃圈,但唔知人哋個運作:

20201553001

呢張圖就顯示左香港Youtuber困境,你推完唔睇,其實唔會增加佢哋影響力架,佢哋生活唔到有影響力都無用,而到底Youtuber點賺錢?如果要回答呢題,其實好簡單:「當你由YouTube User達到標準,通過YouTube營利審核,你所放嘅影片就會根據觀看次數,同一堆數據統計,而按比例得到營收。」

但……有幾多人知最基礎嘅「幾多觀看幾會有多錢」呢?放心,呢點就有香港Youtuber講過:

20201553002
資料來源:史萊姆的3次元—網絡紅人/Youtuber係點賺錢,真實數字公開(2018年)

 

20201553003
資料來源:大J—係香港做YouTuber其實搵到幾多次錢?(2018)

 

其實綜合史萊姆同大J嘅講法(心水清嘅人會知呢段片嘅關係……),就係每段片大概有一百萬觀看次數左右,先有可能最盡一萬港元收入,而且講緊每段都可以俾到最高分紅 ,先會有一萬收入,而點影響個分紅?就係每段片有無睇晒啲廣告,有無完好睇晒啲片都會影響啲影片分紅。

所以你會發現一件,就係喺香港根本難以利用「YouTube營利」完全獲得生活所需嘅金錢,雖然講舊片會繼續有收入,但除非突然「爆紅」,否則只可以期望「積少成多」,所以點解咁多Youtuber有業配,利用名聲做生意,原因就係咁。

而好多人誤解左CLS,其實呢個係考慮到YouTube嘅演算法,認真咁講有五個因素,會影響頻道嘅觸及率同系統推薦:符合營利要求及規範;片長關鍵字同題材Like、Subscribe、Comment、Share、觀看時數穩定的出片頻率,當然觸及率高,有機會增加觀眾,但同營利無直接關係,呢樣Happy Kongner用左比喻,做完CLS,就好似喺黃店門外打卡,但無入去消費一樣。

所以如果真係靠YouTube觀看營利,重點係你睇完成段片兼唔飛廣告,數就計到出黎,用返大J同史萊姆個數,假如一個Youtuber要生活到,真係要做到一週兩更,或更多求密食得三番,平均十萬至廿萬觀看,以最好數據去計,廿萬觀看可以換成二千港幤,呢種狀態會一個月萬六蚊,但我未計黃標嘅影響,。萬六蚊係香港就係餓你唔死,生存到嘅狀態

而好多人誤解Youtuber,只係拍下片就得,但永遠唔會考慮度稿、剪輯、拍攝嘅時間,唔係每個同每種Youtuber都可以做到週更呢件事,所以好多香港Youtuber,就需要另一個賺錢途徑就係「賣廣告」,亦即係「業配」成為主要收入來源,但呢點正正就係黃圈最無法支援香港Youtube嘅地方。

政治表態後的業配困境

相對其他地區,香港Youtuber依靠業配嘅比例相對高,呢個同物價,生活指數相關,但用返Happy Kongner佢哋嘅透露,其實係六月之後,好多有表態嘅Youtuber,基本上有關業配嘅收入接近0,近一個月好啲,係某啲手機遊戲嘅廣告,會見返香港Youtuber,但對比上年上年半有隻手機遊戲,係搵左好多大細Youtuber做全方位廣告,相對之下就會知個規模變細。

但當然其他方面嘅業配,我相信同疫情有關,所以變左廣告相關開支減少,亦會連帶相關收入減少,只係在商言商,其實喺香港市場,無論表態乜立場,都係一種苦惱,表態支持政府同中國,就會得失香港人;表態支持港人,就會得失大中華市場,所以廣告商會傾向搵「唔表態」嘅人,就算公關公司或經紀公司,想搵一啲香港Youtuber,亦因為會因為表態問題,而令一啲公司打退堂鼓。

呢個就係「黃圈」最無能為力嘅地方,因為黃色認同,無論係點定義都係「立場表態為先」,然後當發表相關內容,就會陷入黃標影響,甚至招致惡意舉報,然後因為表態問題,引致業配收入減少,就會出現惡性循環,而「黃圈」係處理唔到,而點解我擔心TVB或HK01 KOL計劃,因為以佢哋特質係會打入「唔表態市場」。

黃色YouTube本意係好,但……

係一次分享Happy Kongner影片,我係分享咁講過:『例如以香港做市場定位、以香港人做市場目標、堅持粵語或用英語、用正體字等等,我都覺得可以例入「香港Youtuber」』

我係唔建議黃色Youtuber嘅概念,或者對一啲人黎講,咁樣會唔會出現好多混水摸魚嘅人,甚至有空間俾代理人?正如上文所講TVB 同HK01 嘅KOL計劃,就係要打入「唔表態」嘅空間,令佢哋進佔市場,呢個市場空間先係YouTube最關鍵嘅位,對方有兩手準備;一手係表態嘅代理人,目標係成班愛國族群,另一手係純娛樂嘅代理人,專門佔據吃喝玩樂嘅業配,呢點係對香港Youtuber嘅威脅,特別對表左態,但社群影響力未必足夠嘅一班。

所以我係主張「香港Youtuber」,多過「黃色YouTuber」,因為「黃色YouTuber」太狹窄,而點定義「黃色」亦限制Youtuber嘅發展,因為當佢哋要發展當中,必定有機會同中資背景,或親政府嘅商人接觸,甚至無可避免用藍絲或中資代理商品,如果要用「黃色定義」,呢班Youtuber要點處理?無視佢哋處境以道德批鬥佢哋?特別係依家呢刻,特別係疫情當下,其實「黃圈」未必保得住黃色商鋪,更何況呢班Youtuber。

唔同於「黃色經濟圈」,Youtuber係無實體,並不是實業,我哋無法靠消費去協助,但或者我哋可以道尼(Donate),或者成為會員贊助,如果該Youtuber有開其他贊助平台,但以香港嘅生活指數,呢方面嘅收入只係幫補性質,而呢種性質除左杯水車薪,亦無法提升產業,特別當大家講緊「圈」呢個概念,我要睇得更廣闊,而唔係靠表態去思考,唔好落入「又要馬兒好,又要馬兒唔食草」嘅局面。

結語—唔好黃圈當金剛箍

上文大概一個月前打好,其實大家可以用其他產業,去套入YouTube兩個字,到左今日大家都明白,「黃圈」嘅極限喺呢個疫情已經暴露左,當初「黃圈」嘅概念,係希望所謂二百萬人嘅「黃絲」,透過支持願意表態嘅店家,令佢哋賺到錢經營,從而希望各界唔好怕表態,甚至支援有需要嘅人。

但係到我寫完呢篇文,已經係進入左鬥黃時期,而背後係好明顯係利益操作,好多人要用「黃圈」迫人歸邊,批鬥黃店唔夠黃唔肯團結,呢啲事其實係預期之內,因為黃圈係承繼黃絲本質,呢點我估到,所以為左保護Youtuber,避免佢受到批鬥,俾已經停滯不前嘅產業,乘住所謂黃圈效應,令大家關注YouTube而得到發展,我會呼籲唔好再用黃圈,當成金剛箍勒住班Youtuber

而更深層一點,我自己係認為,YouTube作為現今影響力最大平台,喺呢個平台上,要守護「香港」嘅話語權,承繼香港文化,避免有代理人用「香港」牌頭,宣揚中國意識,而唔係滿足「黃」呢個身份認同,呢個模糊不清嘅事物同目標。

當然講返YouTube呢個行業,當YouTube呢個平台,係會受一定各種外力影響(政府機構、廣告商、各種議題組織、媒體),會引致收入或營利規則不穩,就注定如果Youtuber要發展,必然要有業配,而當表態或政治敏感議題,有機會影響佢哋收入,但佢哋發展唔到,又點會有影響力?

所以無論乜圈都好,大家一定要俾到生存同發展空間,否則啲圈只會變成致命圈套。

後話 —

因為篇文都拖太耐,所以就寫一兩段,俾有心睇呢到嘅朋友,俾你自己定自己支持香港Youtuber,我一啲真心嘅呼籲—

「我明白香港嘅市場好細,所以大家都怕自己塊餅,有朝一日會被人食左,但如果你哋唔視彼此為共同體,一味陷入惡性競爭,對Youtuber呢個產業係無好處。

特別當經濟衰退,加上傳統娛樂圈,挾住資源去擴展YouTube市場,然後又有代理人有資源入YouTube市場,仲未計本身香港Youtuber仲要同台灣、東南亞華文Youtuber競爭?而佢哋係一個個共同體同大家競爭,香港呢?

當然有啲Youtuber有自己觀眾同客群,會覺得又何必聽一個外行人講嘢,你今日可以應付,但聽日呢?係呢種大環境下,無人可以獨善其身,YouTube可以做得起,係因為網絡可以無阻隔,但如果彼此唔主動交流,各自嘅社群都只會停滯不前,台灣及其他華人Youtuber就係以主動合作(可以講蹭流量),將彼此社群達致互相認識,擴大觀眾層面。

我唔會要求,或期望Youtuber要經常關心時事,我希望大家可以做好本業,關鍵時刻發揮社群影響力,就好似之前集體呼籲大家投票咁,呢股影響力係會衰退,因此大家保持活躍同發展。

所以我唔想黃圈扼殺大家,但如果香港Youtuber,華文市場唯一以廣東話為主嘅地方,都唔可以凝聚香港YouTube社群,提升產值,擴闊觀眾層面同人數,仲有乜人做到?我唔想香港個生態,YouTube嘅內容係靠花生,恩怨,八掛,單打,各自觀眾互片為主,咁樣對我哋有益咩?我唔會好似黃絲一味講團結,但大家搭緊同一船,你以為踢左人落水,就等於霸住架船,實際係你每踢一個人,就等於趕一個水手,最後你一個人可以做得啲乜?

香港人就係得我哋,香港Youtuber亦都一樣,希望睇到嘅人諗下。」

伸延閱讀:

百彈齋主—《YouTube黃標事件,代理人可趁機滲透市場》
https://link.medium.com/vqmYddEfL5

Happy Kongner—CLS無用? comment like share subscribe真正意義
https://youtu.be/e6Hlm9NEs1I

史萊姆的3次元—網絡紅人/Youtuber係點賺錢,真實數字公開
https://youtu.be/vwux7DFO5Lc

大J—係香港做YouTuber其實搵到幾多次錢?
https://youtu.be/HlcUUkRyMBs

Previous

一個多月的神秘防疫真空期

共產黨終於亮劍 香港人肯攬炒嗎?

Next