中國代理人反攻戰 – 進軍YouTube之路

| | , ,

說話,開始有人發覺建制勢力,開始喺YouTube發展勢力,我會直接講係:「利用中國Youtuber包裝成香港Youtuber去侵佔市場」,唔好以為講廣東話,香港出世同成長,就唔係中國Youtuber,呢班最終都係將中國價值觀帶黎香港,其實就已經係中國Youtuber,所以呢件事唔係藍黃咁簡單,而係一個國家發動資訊戰,去滲透及侵蝕香港網絡。

其實會咁樣我唔意外,因為中國一直都係Twitter、Facebook、YouTube做相關工作,只係香港個局勢一直唔洗咁做,我地可以講因為輸左台港兩個選舉,所以中國就更出力,但更適當講法,係中國已經判斷要全面資訊戰。

我會好明確咁指出,對方係有優勢,因為中國喺對台資訊戰嘅時候,就已經研究緊YouTube嘅演算法,同本身為左打入YouTube,所準備嘅大量帳號,BOT,各方社群同群組,但係之前中國未有打算用喺香港,而香港進入長期反抗後,加上區議會一役,我係相信中國會調動資源,真正串連三大代理人網絡,喺香港加強資訊戰效果。

所以我地唔可以淨係用文宣角度,或宣傳角度去睇呢件事,用一個更全面角度去睇,原Post樓主講嘅對應方法,我唔可以話無用,用處一定有,但我哋先理解今次對方嘅優勢,同做好心理準備:呢場係戰爭,唔係藍黃政見問題,而中國嘅資訊戰,要滲透同侵略香港網絡。

我喺《分析搶購謠言》三篇文,其實就已經簡單解構左,中國係整合三個親中代理網絡,用黎發動資訊戰,所以對方所準備好晒,要令依家YouTube會判斷,佢地嘅影片或者個Channel係值得推薦。

我哋都要理解有乜元素:

  1. 符合營利要求及規範:如果你嘅片本身做唔到營利,系統就唔會太優先考慮推薦。
  2. 片長:依家嘅YouTube影片係鼓勵有一定長度,大概十分鐘左右,因為越長越留住觀眾,廣告就會相對多。
  3. 關鍵字同題材:生活類、飲食類就比較受歡迎,標題關鍵字係會影響,YouTube A.I去判斷段片,有無機會違反營利規定。
  4. Like、Subscribe、Comment、Share、觀看時數嘅五項數據,都係影響YouTube演算法因素。
  5. 穩定的出片頻率:越穩定越頻密,無論觀眾同系統,都容易將你嘅頻道放上前排。

而中國依家個模式,就似係想培育一班代理人,然後有專門公司或人士,協助拍攝、後製、企劃,大家唔好睇小呢三個位,由毛片到真正作品,除左Youtuber本身嘅魅力或演繹外,題材嘅企劃,後製嘅剪接係有助內容提升,而依家親中陣容,就好明顯就係用商界相關公司去做幕後支援,搵較年輕嘅建制議員做重心,再搵一大班中國Youtuber做散播點,形成一個圈子。

而呢三個圈子係「大人及政協背景嘅政商界及專業界别」、「傳統政黨及建制派」、「愛字頭及親中素人」,佢地就好似上文咁三個圈子互相支援咁做嘢,所以佢地係有組織同計劃咁做,呢種規模咁拍片同傳播,係可以有資源戰人手,跟足影響因素咁拍片,而呢個就係好多香港Youtuber未必跟到。

當然,佢地依家仲係喺建立影響基數,同透過所謂愛國及藍絲群組,去建立觀眾社群嘅第一階段,同時間會發動網軍,以審查機制、負評去影響各大香港Youtuber,包括非政治類別都會受影響,而喺有組織咁買Follow同買Like,加上社群散播,其實好快就完成第一階段,第二階段就係嘗試影響系統,令演算法可以推薦佢哋,當進入第三階段,佢地就會加強散播中國資訊。

大概會有呢三個階段,當中仲會有現實層面嘅配合,或跨平台嘅協調,例如同步喺Facebook擴張影響力,任何直播搵網軍衝人數,傳統媒體同步宣傳,甚至搵藝人合拍短片等等。

咁我認為有三點要做:

  1. 民眾要針對性推廣香港Youtuber:唔好見係香港Youtuber,講支持民主,支持手足就叫人睇,要根據喜好,題材,風格,年齡層,因為對方係咁做。
  2. Youtubers加強聯繫,同加強社群營運:因為對方真係放資源,大部份Youtuber嘅營利同系統上推薦會受影響,唔理會唔會發聲都會受影響。
  3. 舉證中國資訊戰在影響YouTube:呢樣係最難,要有證據,金流,各人物關係,甚至要有相關文件,去證實中國喺香港點策動代理人,影響網絡從而影響香港民主化,全世界唔會齋聽一邊,要有證據同理據先做到。

我希望有時間會就上述三點講多少少,不過以上三點大家都可以理解到,至於去定期檢舉,俾負評,睇一秒中國Youtuber,可以做,但真係大量人做,先可以有影響基數。

記住,YouTube只係其中一個戰場。

伸延文章:

中共對港宣傳戰最新計劃曝光:KOL100

《分析搶購謠言(上)—中國對港資訊戰架構》

《分析搶購謠言(中)—空前成功的謠言攻擊》

《分析搶購謠言(下)—我們要如何應對資訊戰》

 

Previous

所謂年年考第一就係用鼻食意粉

偽人維穩才是 他們的政治正確

Next