亞歷山大與希臘化文明:西方史的一個黃金時代 (2) 東征之途:在安納托利亞初試啼聲

| | ,

20190248
亞歷山大大帝的白色大理石雕像

當亞歷山大成功當上馬其頓國王之後,佢做嘅第一件事就係鞏固自己嘅權力。為左達到呢個目的,佢殺咗幾個有威脅嘅馬其頓王子,並派兵鎮壓左希臘地區以及色雷斯嘅叛亂。

響科林斯,亞歷山大同佢父親菲臘二世一樣獲得左希格蒙(Hegemon,意即「領袖」的稱號),意味住佢即將統領希臘世界的聯軍,同當時世界上最強大嘅帝國——阿契美尼波斯帝國(Achaemenid Empire)以及其「萬王之王」大流士三世(Darius III)決一高下。當佢解決左馬其頓王國以及希臘內部嘅問題,一切就緒之後,響公元前334年,亞歷山大帶住48,100步兵、6,100騎兵包括精銳嘅伙伴騎兵,以及120艘戰船,共38,000人規模嘅海軍,從馬其頓首都佩拉出發,越過達達尼海峽入侵小亞細亞,當時屬於波斯帝國嘅國土。

陪伴亞歷山大東征嘅,仲有佢嘅將領兼好友托勒密(Ptolemy)、塞琉古(Seleucus)等人,以及佢一生中最愛嘅一個男人:赫菲斯提翁(Hephaestion,希臘文名字為Ἡφαιστίων)。大家要留意嘅係,雖然亞歷山大擁有嘅兵力並不稀少,但唔好忘記佢面對嘅係一個領土面積達600萬平方公里,人口超過1800萬嘅超級大國。唔止係單單一個馬其頓王國,就算整個希臘嘅面積、人口同兵力加埋一齊,同波斯帝國相比只係蚊同牛比。

當佢大膽入侵小亞細亞嘅時候,波斯人對佢嘅態度可能只係不屑一顧;不過響佢哋眼中呢個行徑近乎瘋狂、乳臭未乾嘅小子好快就會令呢個高高在上嘅超級大國吃盡苦頭。因為亞歷山大係一個軍事奇才,佢採用嘅先進戰術如馬其頓方陣、衝擊騎兵等,加上響戰場上嘅敏銳觸覺、過人嘅判斷力同指揮能力,將會令軍力遠在希臘之上,但主要使用古美索不達米亞戰術同武器(例如馬拉戰車)嘅波斯人輸得一敗塗地。

越過達達尼海峽後,亞歷山大第一個造訪嘅歷史名城正正就係小亞細亞西北角嘅特洛伊古城(Troy),並在雅典娜神殿以及阿基利斯的陵墓獻祭。亞歷山大對《荷馬史詩》以及希臘人嘅歷史有著濃厚嘅興趣,響佢東征嘅過程中,佢身邊一直都帶住一本《伊里亞德》。

佢對荷馬嘅興趣好有可能係佢年少時跟亞里士多德學習嘅時候培養出來的興趣,響學習嘅過程中,亞里士多德一直向一班希臘貴族嘅學生灌輸希臘文化至上論,並認為希臘文化應該統領世界,呢d都對年輕的亞歷山大思想行為有顯著嘅影響;直到佢深入波斯本土,並親身接觸東方文化之後先出現改變。

亞歷山大打敗左響小亞細亞嘅波斯軍隊,解放左本來屬於希臘勢力範圍嘅愛奧尼亞海岸。當安納托利亞西部牢牢在握之後,亞歷山大向南進入呂基亞,攻擊波斯海軍基地。亞歷山大應對波斯強大海軍嘅做法唔係硬碰硬,而係通過馬其頓嘅強項陸軍攻打波斯嘅海軍基地同港口;而失去左行動基地同港口嘅波斯海軍就變成斷線風箏。亞歷山大嘅戰略起左效用,佢向東深入安納托利亞內陸,並響前弗里吉亞(Phrygia)首都戈爾迪烏姆(Gordium)遇到一個挑戰,根據傳說,當地長老帶佢去戈耳狄俄斯之結(Gordian Knot)之處,並同佢講呢個結無人可以解得開,只有將來的亞細亞之王可以解開。

亞歷山大聽罷後取出佩劍,將無繩頭的繩結砍成兩邊。呢件事反映左佢對任何問題嘅解決方法,係直接而具創意,呢點響佢嘅軍旅生涯中被證實係重要嘅個人品質。完成對安納托利亞的征服之後,亞帝的軍隊越過托魯斯山脈轉向南邊,準備入侵敘利亞及黎凡特,並在過程中與波斯帝國的軍隊主力遭遇。

Previous

王楊盧駱千年體 ─ 由「佔中三子」講到「初唐四傑」(三)

該為這城求什麼?

Next