紅十字會係一個國際性嘅慈善機構，多年來為香港市民默默係背後付出，提供各項醫療服務、統籌各區捐血中心嘅工作。本人同家人更加因為之前不幸入院而接受過輸血，而醫院每日成千上萬包血液均來自紅十字會的捐血服務中心。今日見到有唔少人以小人之心度君子之腹，唔單止唔識知恩圖報，反而借啲謠言係度造謠生事，唯恐天下不亂，比小人更加無恥。筆者依篇文就係回應銀行中女之前對紅十字會嘅攻擊。
第一， 中女指出紅十字會官僚主義，開放時間不利市民，擺出高高姿態當香港市民係賤民趕住去捐獻。筆者估計中女小姐係消費主義上腦，依家你去捐血，唔係係五星級大酒店享受桑拿服務啊！
第二，中女小姐話香港有十六萬公務員，只要叫到其中一啲人定期捐血，就可以確保血源充足。依個論調簡直就係將中女自私自利嘅扭曲心理發揮到極致。沒錯，紀律部隊嘅責任係服務市民，但你又憑咩要全港紀律部隊嘅人承擔曬所有捐血嘅責任？用中女嘅邏輯，不如叫埋個十六萬人捐埋份糧出來養起所有窮人，咁香港咪唔會有人攞綜援同生果金囉。更何況，捐血救人本來係一件崇高同義不容辭嘅事，每一個香港人都應該承擔呢個責任。依家叫你捐出小小血去幫助下醫院嘅病人啫，又唔係要你條命，舉手之勞嘅嘢點解唔做？
第三，中女小姐建議不如叫留係香港嘅一萬二千內地生每年捐血，就足夠滿足血液嘅缺口。我想反問中女小姐，你點知內地生無捐血貢獻？筆者這個學期曾去到大學內的捐血服務中心，看見也有不少操國語的同學在捐血。而且，問題嘅核心係點解一定要內地生捐？香港夠有五萬菲傭、印傭啦，人數更加多，又唔叫你提議佢地去捐？到時家傭成為捐血大軍，一齊來個港人家傭大融合，家傭順勢攞埋香港永久居民身分，其樂融融也！
如果你咁討厭紅十字會嘅捐血服務，我希望你可以言出必行，以後有咩頭暈身㷫，出血個啲，都堅決唔好輸血啦！因為個啲血係係你口中所謂嘅賤民身上榨取嘅，你呢啲自以為「清高脫俗」嘅人係唔配享用我地呢啲賤民嘅心血。今日吾軀歸故土，他朝君體也相同，希望你講嘢之前用下自己嘅大腦。最後，我祝中女小姐身體健康、長命百歲。
