今屆特首選委之戰，除左黃營贏得約330席之外，另一個重點係淺藍嘅約250至280席。《香港01》稱之做前唐營，有其他論者直接稱之為商界，選舉時又稱ABC陣營。三者定義略有不同，人數或有增減，但係都係指雖屬建制派，但俾梁振英嘅強硬政策，迫得愈行愈遠，終使矛盾暴露人前嘅淺藍人仕。
黃營加上淺藍，再加上約50票嘅游離票，實際上係選委會過半數。所以樂觀嘅淺黃認為，只要淺黃同淺藍組成「不神聖聯盟」，淺色陣營將可左右大局。但係正因為依個原因，淺色陣營渴求嘅和解之路，實際上未必行得好遠。
現制度給予黃營嘅空間，係過去兩次選舉已經表露無遺。係梁游ＤＱ之前，立法會選舉結果，如果將自由黨當成淺藍，黃營加淺藍一共有三十四席。如果新界西並無失誤，或者飲食界、進出口界、演藝文化體育界、或者工程界等票源稍為較廣嘅界別可以突襲成功，多取一席，其實有望過半。今次特首選委之戰，更證明現制度之下，黃營未能執政，但係要否決深藍執政，實際上已經好接近。
短期而言，淺藍陣營已經成為造王者，係真正關鍵少數。假如北京繼續妄顧事實，忽視選委會結構，繼續推行強硬路線，淺藍同黃營或會共同推出溫和派，令下任特首，票源來自黃營。如此一來，則將過去幾年矛盾，聚焦係特首同北京之間，情緒不會降溫。如果北京接受現實，則會推出自己心儀嘅溫和派，令該位溫和派係深藍同淺藍支持下執政，而黃營將繼續做反對派。無論係前者定後者，淺藍陣營都手執關鍵少數，將同各方講數。
但係長遠而言，香港政改已經進入死局。由1998年開始，立法會組成方法一共更改三次，每次都係黃營議席比例有所上升。就算係導致深黃淺黃分裂嘅2012年政改，實際上亦增加左普選議席嘅比例；後來黃營碎片化，出現路線之爭，以致派別林立，與人無尤。選舉委員會，亦由1996年400人，分三次加至現時嘅1,200人，每次都令淺藍或黃營可競爭嘅議席有所增加。
面對政治現實，溫和派執政下嘅每次改革，都係增加人數，繼而令廣泛票源嘅議席，比例略為升高。再加上每次政改所畫嘅願景，令一眾港人認為，只要唔反枱，循序漸進總有一日可以有真普選。但係背後嘅數學，其實極為精準：北京操控嘅深藍議席，一直都係半數以上。故此淺藍同淺黃可以溝通，可以提供意見，但係到最後唔可以做決定。
但今年兩次選舉，證明左依個遊戲已經玩到盡頭。以立法會為例，係七十席以上再加民選議席，就算只有五席，假如民情不變，下次選舉就會出現黃營加淺藍過半數，政府每條法案都要買通淺藍，變相演變成淺藍永久執政。選委會亦一樣：假如再加委員數目，就算係之前幾次有提過嘅，將全體區議員納入選委，都已經會導致黃營、淺藍、深藍無人過半數，令北京失去一槌定音嘅權勢。就算未來幾年，民情迅速回穩，港豬主義重新抬頭，到下一次北京執行強硬路線，依條數仍然會出現。
除非北京真心接受淺藍或者淺黃執政，否則現行制度已經再無小修小補嘅空間：任何進一步民主化，都可以導致選舉變天。故此，未來就算溫和派執政，已經無辦法同淺黃妥協。淺黃嘅主要政綱，一直都係「爭取直普選」，而現實係一改就會改變實權分配。雙方嘅談判空間，恐怕已經永遠失去。坊間有論話黃營今次談判都只係能夠爭下少數部會司職或榮譽職位，恐怕就係如此意思。
故此，雖然黃營係立法會同選委會連贏兩仗，一時風光無兩。但係未來要面對嘅，就係政改比起2010年更加難以寸進之時。當連溫和派特首亦冇籌碼進一步民主化，淺黃路線將會再次受到質疑，再次碎片化，深黃路線再次抬頭，將會係意料中事。
當然，要跳出依個宿命，重點在於北京。如果北京肯接受事實民主化，包括恒常嘅政黨輪替，只要再次政改，可以一次根治香港嘅體制問題。但如果路線不變，換人只係短期退卻嘅話，香港未來幾年，就會重演法國1830至1848年嘅歷史。由奧爾良王室領導嘅開明專制，初時極得人心，但係當蜜月期過去，而深層矛盾仍然存在，則溫和派政府亦會民心盡失，終至倒台。