紅河之歌:西臺帝國興衰史(38) 大崩壞後的埃及和亞述帝國

位於樂蜀(Luxor)尼羅河西岸的哈布城神廟,牆上銘文記載了法老拉美西斯三世的功績

青銅器時代大崩壞:埃及的下場

曾經叱吒一時嘅西臺帝國於公元前12世紀初響東地中海嘅一片混亂局勢中滅亡,相比之下,埃及係比較幸運嘅一位,因為埃及響海上民族嘅入侵以及動盪中幸存下來。

事實上拉美西斯三世(Ramesses III)擊敗入侵嘅海上民族之後,又聲稱派軍敘利亞地區鞏固埃及的勢力。佢響哈布城神廟嘅浮雕中向後人炫耀佢嘅軍功,然而歷史學家Faulkner認為該浮雕只係抄襲左前人拉美西斯二世建築中出現過嘅畫面。

除左響佢執政第11年發生左一次新嘅利比亞人入侵之外,埃及響拉美西斯三世期間避過左大規模嘅外來攻擊,而政局保持相對穩定嘅局面,埃及甚至有資源發起一次對邦特之地嘅遠征探險。

當然,拉美西斯三世在位晚期,埃及國內亦都同樣面對嚴峻嘅危機,特別係行政上嘅無能同官僚體制內嘅不忠。拉美西斯三世最終響公元前1155年死響一次由佢皇后同兒子策動嘅後宮陰謀暗殺之中,呢件事記錄響都靈紙莎草(Judicial Papyrus of Turin)文獻之中,顯示出部分埃及政府高層有份參與呢場暗殺。

最終拉美西斯三世的王儲拉美西斯四世(Ramesses IV)成功控制左局面並抓捕參與陰謀嘅叛國分子。第二十王朝一直苟延殘喘左一個世紀之久,但埃及嘅國勢將無可避免地衰落,而埃及亦都不會再享有青銅器時代前兩個王朝時期所擁有嘅崇高國際地位。

雖然佢成功避過左北方鄰國西臺徹底覆亡嘅命運,但埃及的國勢將永不再復當年作為近東其中一個佔主導的超級大國地位。終於響公元前7世紀,埃及遭新亞述帝國(Neo-Assyrian Empire)所征服。近東世界歷史的走向將會由新興嘅超級大國所主導,包括亞述、巴比倫同波斯在內嘅新興勢力,將響公元前第一千紀相繼成為支配整個近東世界的主要力量。

亞述的下場及公元前一千紀的近東世界

公元前9世紀(深綠色)以及7世紀(淺綠色)的亞述帝國版圖

響亞述,圖庫爾蒂.尼努爾塔一世(Tukulti-Ninurta)嘅王位最終響佢兒子策動嘅暗殺(公元前1208年)中不光彩地落幕。雖然亞述帝國並無遭到海上民族嘅入侵而造成好似近東多國受與之相關嘅動盪同混亂影響,亞述響圖庫爾蒂.尼努爾塔死後仍然經歷左整體上持續嘅政治同軍事衰落。

響公元前第一千紀之初,亞述所控制嘅土地面積只係阿達德尼拉里及薩爾瑪那薩爾曾經擁有嘅廣闊疆土嘅好少一部分,局限於底格里斯河長150公里嘅一片狹窄嘅土地。

響南部,亞述嘅國境受巴比倫王國所限制,響北部,尚武勇悍嘅阿拉米人(Arameans)持續威脅亞述嘅城市。但到左公元前一千紀嘅初期,亞述重新踏上軍國主義以及對外擴張的腳步,響阿達德尼拉里二世(Adad-nirari II,公元前911至891年在位)年間,亞述打敗左阿拉米人並將對方逐出底格里斯河河谷,此後,亞述的鐵蹄轉向南邊,攻擊並打敗巴比倫王國的國王沙馬什.姆達米克(Shamash-Mudammiq),並吞併對方大片領土,將之納入亞述嘅統治。

呢d軍事行動為此後亞述的大規模擴張奠下左根基,到左公元前8世紀亞述國王沙貢(Sargon,公元前721至705年在位)年間,亞述帝國嘅領土已經包括左整個美索不達米亞嘅新月沃土,西至安納托利亞、南至波斯灣、以及東至埃蘭(Elam,今伊朗西部)。響沙貢的孫子,公元7世紀阿薩爾哈東(Esarhaddon,公元前680至669年在位)年間,亞述甚至遠征埃及,曾經偉大並作為近東強國之一的埃及響一場短暫嘅戰役中戰敗,並被亞述吞併成為後者的領土範圍。

由此可見,最終亞述可以話係青銅器時代晚期近東眾多強權中唯一存活下來的帝國,但佢嘅存活同復興同樣亦都係短暫嘅曇花一現。因為亞述帝國最終被迦勒底巴比倫嘅那波帕拉沙爾(Nabopolassar)同米底波斯嘅聯軍打敗,曾經擁有超過10萬人口、面積達750公頃嘅首都尼尼微(Nineveh)響公元前612年被巴比倫同波斯聯軍攻陷並劫掠。

亞述帝國滅亡後,新巴比倫王國響著名國王尼布甲尼撒二世(Nebuchadnezzar II,公元前605至562年在位)期間取而代之成為近東首屈一指的強國。新巴比倫王國後來被東方新興的米底波斯所打敗,並於公元前539年由波斯大帝居魯士(Cyrus the Great,公元前559至530年在位)征服。

接近兩個世紀之後嘅公元前356年,歐洲東部、希臘北部的馬其頓誕生左一位國王,馬其頓王菲臘二世(Philip II of Macedon)之子,西方歷史上名氣超大的亞歷山大大帝(Alexander the Great)。

亞歷山大大帝最終響公元前四世紀末期征服波斯帝國全部領土直至印度之遙,並將希臘文化帶到亞洲的大片地區,形成左曾經一度主導整個已知世界嘅希臘化文明(Hellenistic Civilization)。曾經興盛超過3,000年的美索不達米亞文化,包括楔形文字(cuneiform)的書寫系統,最後遭到希臘文化以及希臘字母(Greek alphabets)淘汰。歐洲嘅崛起標誌住近東史上的一個時代正式宣佈告一段落。