亞歷山大與希臘化文明:西方史的一個黃金時代(12) 希臘化時代的建築

亞底米神殿現代重建的仿製品

上回講過希臘化時代嘅城市建設,提到希臘化城市最大可以容納50萬左右嘅人口,比希臘化前記錄保持者巴比倫嘅20萬人口翻左超過一倍,直到羅馬城響公元1世紀達到100萬人口之前,係全世界最大都市。

除左人口多之外,希臘化世界亦都充滿令人嘆為觀止嘅超級工程,正如上次所述,古代七大奇跡當中有超過一半同希臘人有關,可見希臘人工程技術嘅成就。

今次筆者會講下呢批希臘化時代建造嘅建築奇跡:亞歷山大港燈塔(Lighthouse of Alexandria)、羅德島巨像(Colossus of Rhodes)以及以弗所亞底米神殿(Temple of Artemis, Ephesus)。

印有亞歷山大港燈塔圖案嘅銅幣

關於亞歷山大港燈塔嘅建造過程以及特點上篇文章大約提過下,亞歷山大港燈塔係歷史界已知世界最早嘅燈塔,亦都係古典時代除金字塔外世界最高嘅建築物。

根據文獻記載,燈塔由淺色巨大石塊建成,高138米即相當於46層樓高,頂部設有發射光線嘅火炬及巨型鏡子,並以希臘神話中海神之子崔萊頓(Triton)雕像作裝飾。

佢開建於公元前284年左右(確切日期不詳),設計佢嘅建築師相信係克尼多斯的索斯特拉都斯(Sostratus of Cnidus)。根據羅馬學者斯特拉波(Strabo),該建築物由托勒密嘅朋友索斯特拉都斯出資建造。而根據另一位羅馬時代學者老普林尼(Pliny the elder),索斯特拉都斯係燈塔嘅首席建築師,並獲托勒密特許於建築物上打上自己嘅名字。燈塔嘅發明大大有利於航海業嘅發展,並改善左港口嘅運作,使貨船停靠亞歷山大港更容易且更安全。

燈塔屹立於亞歷山大港嘅法老島都過1,000年,並廣為後人所模仿同複製。例如在羅馬皇帝克勞狄(Claudius)和圖拉真(Trajan)設計並修建意大利羅馬極大規模嘅人工港口波爾圖(Portus)嘅時候,就模仿亞歷山大港建造左兩座高度超過100米嘅燈塔。除此之外,以亞歷山大港燈塔為藍本嘅燈塔亦都遍佈羅馬境內各座大型港口,然而,羅馬人所建造嘅仿製品始終沒有超過亞歷山大港原版嘅高度及規模。

而直到中世紀晚期哥德式建築尖塔興起之前,亞歷山大港燈塔所創下嘅記錄都未被超越。亞歷山大港燈塔見証住多次埃及政權更迭,由托勒密王朝到羅馬統治時代,再到阿拉伯統治時代,燈塔一直發揮引導船隻出入海港嘅作用。

直到公元956年,燈塔被一場強烈地震所破壞,雖然被阿拉伯人所修復,但1303年及1323年兩次強烈地震再度將燈塔嚴重破壞,最終燈塔於1480年完全消失,其石塊被阿拉伯人用於原址上建造一座中世紀式城堡,而大量從傾倒燈塔掉落嘅建築材料則落入海中,直到20世紀末水下考古獲得重大進展前才被重新發現。

羅德島太陽神巨像想像圖,由於巨像在古代已被溶毀,因此歷史學者只能猜想其形象

另一座希臘化時代的偉大建築係位於羅德島的羅德島巨像(Colossus of Rhodes)。巨像乃羅德島居民慶祝公元前305年戰勝圍城嘅德米特里一世(Demetrius I),即安提柯一世之子所建。

德米特里一世放棄圍城戰後於當地留下大批攻城器械,羅德島居民將器械變賣獲得300塔蘭的款項,為建造巨像提供充足嘅資金。巨像設計師為林多斯的查爾斯(Chares of Lindos),於公元前292年開建,前280年建成。

雕像屹立於羅德島的港口,底部為15米高、呈八邊形或圓形嘅大理石平臺,雕像以太陽神的形象為原型,總高33米,相當於現今紐約的自由神像的高度,係當時全世界最高嘅青銅雕像建築。雕像可能以攻城塔作之棚架建造,而當建造工程到達高處之時則由土堆圍繞,建成後移除土堆讓雕像得以自立。

建築工人首先分段鑄成青銅片,由下而上以柳釘拼接出巨像的外殼,內部以鐵製的支架作為承重結構,並加入石塊以固定雕像。羅德島巨像屹立54年,在公元前226年該島被一場強烈地震侵襲,巨像因而倒下。當時托勒密三世(Ptolemy III)建議由埃及出資資助重建,但居民因宗教原因拒絕建議。

巨像嘅殘件躺臥地上,直到羅馬時代的學者斯特拉波(Strabo)及老普林尼(Pliny the elder)亦有提及,而羅馬時代該遺址成為著名嘅旅遊景點,吸引大批遊人前往觀看。老普林尼甚至形容巨像一隻手指都唔能夠被一人雙臂環抱。

巨像遺址最後嘅下場係響大約公元654年左右被征服羅德島嘅阿拉伯人溶掉並賣予伊德薩(Edessa)一位猶太商人,溶解巨像而成嘅銅錠足足要動用900隻駱駝先能夠移走。

跟亞歷山大港燈塔一樣,羅德島巨像同樣受後世複製模仿,例如300多年後羅馬時代,公元1世紀嘅尼祿皇帝(Nero)就曾經模仿羅德島巨像在羅馬城內按照太陽神的形象建造一座尼祿巨像(Colossus of Nero),此巨像同樣高30米以上,外殼由青銅造成,此雕像比羅德島巨像好運,並沒有遭到地震摧毀而屹立數個世紀。

而直到公元19世紀,羅德島巨像亦都成為法國送比美國人民慶祝美國獨立的紐約自由神像(Statue of Liberty)的創作靈感。

亞底米神殿遺址,一片頹垣敗瓦很難讓人想像到2,300年前嘅輝煌

最後我仲要介紹一下以弗所亞底米神殿(Temple of Artemis)。以弗所(Ephesus)位於安納托利亞西部的愛琴海岸地區,該區自古已有希臘人於此定居活動。

亞底米神殿最早公元前6世紀已存在,但較早建成嘅第二期嘅亞底米神殿曾經被縱火摧毀,直到希臘化時期,公元前323年開建嘅版本規模達至最大。

希臘化時代所建嘅神殿長137米,闊69米,高18米,共有127根石柱支撐,曾經係世界最大嘅希臘神殿建築,規模比雅典有名嘅巴特農神殿更大(巴特農神殿長69.5米,闊30.9米,高13.72米,大小只有亞底米神殿一半)。

雖然神殿曾於公元268年被入侵嘅哥德人破壞,但仍屹立600年直到希臘多神教於地中海式微為止。亞底米神殿嘅石柱曾被東羅馬皇帝查士丁尼用於建造聖蘇菲亞大教堂,如今原址早已面目全非,只有少數倒塌嘅石柱見證亞底米神殿曾經有嘅煇煌。