返回波斯
公元前326年，亞歷山大的希臘軍隊拒絕繼續向東前進深入印度，亞帝決定沿印度河而下到該河流的出海口，並向西返回美索不達米亞。到達出海口之後，亞帝將軍隊分成兩半，一半登上海軍艦隻返回蘇沙(Susa)並探索波斯灣沿岸一帶，而佢本人則率領另一半的軍隊走陸路踏上歸途。然而佢所走嘅南路險阻重重，最大嘅問題係呢條路線要通過伊朗南部格德羅西亞沙漠(Gedrosian Desert)。響60日通過沙漠嘅行軍之中，亞帝的軍隊有可能因飢渴損失三分之一，呢個數字遠遠超過佢響各場戰役中所損失嘅人數。
至於點解亞帝呢位軍事奇才會犯下呢種低級錯誤，連物資都未準備好就行軍穿過不毛之地？呢個一直都係個爭議不休嘅話題。有學者認為佢咁做係故意嘅，目的為懲罰希臘軍隊在印度拒絕繼續前進，故意通過缺乏水源的格德羅西亞沙漠地帶。亦都有理論認為佢咁做係要完成呢個波斯居魯士大帝(Cyrus the Great)都唔能夠完成嘅壯舉。
無論真相係點都好，亞帝同佢殘存落黎嘅軍隊終於響公元前324年返抵蘇沙。作為嘗試融合東西方文化以及鞏固新建立帝國權力的所為，亞帝響蘇沙舉辦左一場盛大嘅集體婚禮，讓希臘將士迎娶波斯貴族的女子。而亞帝自己亦以身作則，迎娶大流士三世的女兒斯妲特拉二世(Stateira II)以及阿爾塔薛西斯三世(Artaxerxes III)的女兒帕瑞薩娣絲二世(Parysatis II)，而亞帝的最好朋友赫菲斯提翁則迎娶大流士三世的另一位女兒德莉比娣絲，集體婚禮中結婚嘅新人都獲贈名貴賀禮。
然而好多希臘官兵迎娶波斯女子並非出於自願，而純粹係為迎合亞帝的行為，因此佢哋嘅婚姻並無任何感情基礎可言，當中好多對新人不夠一年就離婚。呢點顯示出亞帝民族融合政策所面對嘅阻力，以及當時希臘人對波斯人從骨子裡而出嘅厭惡同鄙視。
離開蘇沙之後，亞帝前往埃克巴坦那(Ecbatana)提取波斯帝國留低比佢的寶藏，但悲劇好快就發生響佢身上。響埃克巴坦那，亞帝最好的朋友，同時亦係佢最得力嘅助手赫菲斯提翁得急病猝逝，亞帝人生中頭一次遭到如此大嘅打擊。佢命令手下響巴比倫預備一場規模宏大嘅喪禮，風光厚葬赫菲斯提翁，並下令全國哀悼。當返回巴比倫之後，亞帝開始策劃一場新嘅征服，今次佢嘅目標係阿拉伯半島一帶。然而亞帝並無機會實現佢嘅願景同宏圖大計，因為佢自己本人亦將不久於人世。
亞帝之死
記載亞帝之死嘅《巴比倫編年史》泥板，亞歷山大的生平同事蹟除左記載響阿里安同普魯塔克嘅著作中之外，巴比倫史官亦都有用古老嘅泥板以及楔形文字予以記錄
亞歷山大完成佢嘅東征波斯的戰爭返回巴比倫不久，響公元323年6月10/11日，年僅32歲嘅亞帝就得左急病突然死於巴比倫尼布甲尼撒的王宮裡面。關於亞帝的死，古代作者有兩種講法，一種就係佢響巴比倫同海軍將領飲酒狂歡，不久佢就得左熱病，14日後離世。
另一種講法係佢響紀念海克力斯的祭典中喝下未經稀釋嘅酒，結果因痛苦死去，期間並未有熱病嘅徵狀。除此之外，仲有關於亞帝係遭到下毒暗殺嘅陰謀論流傳。關於呢個可能性，歷史學家作出詳細嘅分析。當時馬其頓的貴族確實存在暗殺亞帝嘅動機，而亞帝不在希臘本土時擔任攝政嘅安提帕特(Antipater)被認為係最大嫌疑，但現代學者分析認為當時並無毒藥可以由中毒到死亡歷時十幾日之久，直到2003年有學者提出白藜蘆呢種長效毒物有可能被用於毒殺亞歷山大。
現代歷史學界主流相信亞帝係得左傷寒熱病(Typhoid fever)而死，而佢響戰場上所受嘅傷、長期酗酒同因赫菲斯提翁之死承受嘅打擊亦都影響左佢嘅健康。
希臘化時代嘅開始
無論亞帝之死嘅真相如何，呢個係象徵住一代偉大征服者嘅殞落，但亦都象徵住一個時代嘅開始。亞帝死時，佢同羅克珊娜嘅遺腹子尚未出生，導致麾下將領群起爭奪控制權。佢嘅帝國最終將被麾下將領瓜分，響之後佢嘅繼業者們將統治橫跨歐亞非三洲大片土地。
希臘化時代，係希臘文化影響左東方，同時希臘人亦都從東方文化中獲得借鑑，呢種雙向嘅文化交流同融合產生出整個新的文明，影響力遍及整個歐亞大陸，而希臘語亦都因此而成為當時嘅世界語言。而如標題所提及過嘅，呢個年代亦都會成為西方科學同藝術史一個黃金時代。
尤其響托勒密治下嘅埃及亞歷山大城，將會成為當時其中一座世界最大嘅城市，而響果度規模龐大嘅圖書館同博物院(研究型大學嘅鶵型)被建立起來，吸引左歐亞非三洲最頂尖的學者前往此地進行教學及研究，當中有流傳千古的大數學家歐幾里德同亞基米德等。數學、幾何學、天文學、物理學、液壓學、解剖學、醫學、工程學、地理學、航海學同機械製造響短短百年間獲得爆炸性嘅進展，進步之大令人印象深刻，並為科學響西方嘅發展奠下穩固嘅根基。
膠登及連登會員，網路博客、聚言時報專欄作家。筆名來自公元前14世紀期間，被派往埃及迎娶安克姍海娜曼卻神秘消失在兩國邊界的西臺王子塞那沙。筆者專寫古典世史，希臘、羅馬、古代近東、氣候、科技、建築及經濟史均有涉獵，著作包括《羅馬是怎樣建成的》、《漫談荷馬史詩中的歷史背景》、《西臺帝國興衰史》、《亞歷山大與希臘化時代》等。筆者的blog：http://zannanzahattusili.blogspot.com；FB page：http://www.facebook.com/zannanza/；Twitter：http://twitter.com/Zannanza1