老鬼的歉疚,其實好廉價

身在外國,今日一路睇live,一路睇fb同whatsapp,見到好多80後同齡嘅老鬼,由開始話衝立法會就係鬼,到之後臨近遊行時間又話怕衝擊轉移焦點、影響遊行人數,再之後見到立會塊玻璃搖搖欲墜又問衝入去有咩用,到入左去又指責示威者肆意破壞,然後見示威者明知警察清場在即依然留守,又開始講話其實80後欠左年青人好多、喺網上祈禱唔好有人犠牲流血。

我想講,當日100萬200萬人上街果時,大家唔係聲嘶力竭咁話不撤不散、保護學生、撤回暴動定性架咩?唔係好proud咁話要團結,不割蓆架咩?嘅然大家咁關心衝入立法會嘅年輕人嘅安危,點解情願繼續喺個mon後面打飛機攞光環?點解去現場支援或保護示威者嘅,連200萬𥚃嘅1%都冇?係咪夜得滯影響你聽朝番工?你真係覺得對唔住年青一代嘅,請你而家即刻飛的又好咩都好,去立法會外圍築起人鏈,為你嘅歉疚贖罪。

唔好再用乜嘢自己有份工、要供樓、仔細老婆嫩又要養父母等等藉口為自己開脫。年青人嘅顧慮、包袱、同風險絶對唔俾你少!如果冇咁嘅覺悟同勇氣,又冇打算去幫手嘅話,請大方承認自己冇guts ,然後shut the fuck up 乖乖睇直播!

當年輕人最需要支援時,如果仲只係囗惠而實不至,我地對佢地係連歉疚嘅資格都冇。