亞歷山大與希臘化文明:西方史的一個黃金時代(3) 東征之途:與波斯帝國的第一次決鬥

羅馬龐貝出土的亞歷山大馬賽克,清楚顯示伊蘇斯戰役中馬背上的亞帝向波斯軍隊發動攻勢


東征之途
(II)與波斯帝國的第一次決鬥

隨住亞歷山大深入波斯領土,大流士三世已經開始感到不安並確信必想辦法阻止呢個馬其頓國王嘅行徑。於是大流士響巴比倫集結一支龐大嘅軍隊,呢隊軍隊有幾多人?生活響亞歷山大之後約四個世紀嘅羅馬史學家阿里安(Arrian)同普魯塔克(Plutarch)相信波斯軍隊達60萬人之眾。但經仔細考據,現代學者相信波斯軍隊人數最多10萬,但仍對亞歷山大的軍隊構成數量上嘅優勢。波斯軍隊並唔係好多現代影視作品中描繪嘅烏合之眾,佢哋當中有1萬精銳嘅「不死軍」以及1萬希臘人組成嘅重步兵,並有1萬以上的騎兵參戰。

相比之下,亞歷山大的馬其頓及希臘聯軍大約有4萬人,雖然人數處於下風,但手持盾牌同長矛嘅希臘步兵以16乘16人組成一個正方形戰陣,呢種陣式叫馬其頓方陣,由亞帝的父親菲臘二世所發明。歷史文獻記載,緊密排列嘅馬其頓方陣甚至可以抵擋敵方弓矢的攻擊。大流士的軍隊響公元前333年11月進軍今日土耳其境內東南部嘅伊蘇斯(Issus),企圖切斷希臘軍隊嘅補給線,於是兩軍就響距伊蘇斯東南面約11.3公里嘅戰場對陣,呢場亦都係亞帝第二次同波斯打嘅主要戰役。

結果波斯軍隊嘅左翼陣形被馬其頓軍隊突破,大流士匆忙逃離戰場,導致波斯軍隊兵敗如山倒,並難逃遭到希臘軍屠殺嘅命運。戰役中,大流士的妻子和母親皆被俘。亞歷山大打蛇隨棍上,向大流士要求1萬塔蘭並割讓他已經損失的土地予馬其頓王國,但隨此之外,亞歷山大對被俘的大流士家人以禮相待,即使當大流士的母親見到赫菲斯提翁將佢誤以為係亞歷山大時,亞帝並無責怪對方,反而講左句「赫菲斯提翁也是亞歷山大」,顯示兩人的關係非常親密。而呢次亦都係波斯帝國第一次有皇帝御駕親征都打輸嘅戰役,種下左波斯覆亡的禍根。

伊蘇斯之戰(Battle of Issus)希臘波斯雙方陣形圖

 

亞歷山大響安納托利亞南部、黎凡特以及埃及的行軍路線圖

打贏左伊蘇斯之戰後,公元前332年,亞歷山大繼續向南進軍敘利亞以及地中海東岸的腓尼基。響腓尼基的提爾(Tyre),4萬居民得聞亞帝逼近,女人同小孩紛紛棄城逃離到迦太基,而選擇留低嘅人則逃到海上一座距岸邊1公里嘅島上,呢座島地勢險要,守軍以逸待勞,似乎係打賭亞歷山大會因為此島難以攻陷而放過佢哋一馬。但佢哋錯左,亞歷山大要征服嘅地方,冇人可以逃得出佢嘅決心同烈怒,最終提爾人將為此付上血的代價。

為使馬其頓的攻城器械可以到達小島,亞歷山大嘅軍隊展現出極其強大嘅攻城能力,佢命令希臘工程兵從岸邊建造一條堤道直延伸到海中心嘅島上,並建造兩座50米高的攻城塔,塔上裝有扭力弩砲投石機等重型武器,發出沉重的石彈擊打石砌的城牆。提爾人曾經嘗試利用裝有易燃物品的小船將攻城塔以及攻城武器燒毀,佢哋嘅戰術拖延左亞帝攻城的進度,但阻止唔到城市最後嘅殞落。當圍城7月,提爾被攻陷之後,亞帝嘅烈怒一次過傾倒響佢嘅敵人身上,拼死反抗的提爾人下場令人慘不忍睹:除左逃進神殿的少數人獲得特赦之外,8000人被屠殺,包括2000人響沙灘上被釘死於十字架、3萬人被賣為奴隸。而波斯帝國亦都因此而失去佢最後一個主要的海軍基地,令波斯海軍正式玩完。

攻陷提爾之後,大部分東地中海的城市都向亞帝敞開左大門,除左加沙之外。亞歷山大攻陷加沙之後,佢對反抗者的處理手法係同提爾一樣:格殺勿論。然後希臘的軍隊進入埃及,響埃及,佢哋並無遇到抵抗,埃及人充當帶路黨的角色,將亞歷山大以及佢嘅軍隊視作解放者。當亞帝來到錫瓦綠洲之後,埃及嘅祭司將佢視作古埃及阿蒙神之子。前332年,響埃及尼羅河三角州嘅出海口,亞帝建立左一座以佢命名嘅城市:亞歷山大城(Alexandria)。

此後,亞帝將建立70座以佢名字命名的城市。響以後托勒密王朝統治嘅亞歷山大城,希臘工程師清理左港口淤積嘅泥沙,令到港口可以通行,並且建造左一個史上少見的超級工程:一條長1260米、闊200米,名叫Heptastadion嘅堤道,將法老島(Pharos)同陸地連成一體。完成對埃及嘅征服之後,亞歷山大同佢嘅軍隊離開埃及並回到黎凡特,準備入侵波斯領土位於美索不達米亞嘅部分。