修改引渡條例背後 – 中國破局前的準備工作

在上年十月,我寫咗《終有一日,香港必定被踢出西方之外》:「香港要面對,因為「香港是中國一部份」被各國採取相同待遇,失去「獨立經濟體」地位,各方面失去特殊待遇,甚至作出相同的制裁,這些都有可能發生,而當西方世界褫奪香港的「經濟地位」和「特殊待遇」,「香港」就會失去基礎。」

依家修改引渡條例,其實是一個明確表示,香港係靠攏中國,甚至放棄當初「一國兩制」中,最重要嘅「法制」嘅港中分隔,而當政權態度持續強硬,香港所依靠嘅嘢,都會俾西方拎返,而呢個已經唔係危言聳聽,而係各國已經表示嘅可能,各國都表示通過之後會重新考慮對港關係。

有時我會將修改引渡條例,同廿三條對比,其實兩者性質差唔多,就係為中國喺香港執法做準備,而我最大嘅疑惑係:「中國點解咁急去推動修改?」當然,我地係知道習近平想加強統治權,所以一定要犧牲香港嘅自主權,而且零三年和一九年已經大有大同,畢竟十六年前,邊有有人高叫香港獨立,單係呢點中國對港嘅思考已經唔同。

但點解今次要冒住:「外資撤資」、「港元波動」、「香港特殊地位改變」、「迫使美國令香港人權法上馬」,完全對中國不利,甚至連權貴都影響嘅可能,都要硬上馬嘅原因係邊?其實呢個只係喺「金錢」同「權力」之間嘅選擇。

如果綜合各界分析:「為國進民退做準備,防止民企走資」、「加強管制對中國不穩嘅人員流動」、「中國定性事件為威脅管治威信」、「先發制人,先行處理香港避免美國利用」這些可能都係中國急於修改嘅原因,但我會諗到一個可能性,係硬上馬嘅原因:

「要係對華不利因素爆發前,做好全面管治香港嘅準備。」

有日同聚言時報嘅作者何人可對談,佢講到香港人無諗過,香港會有全部資產俾人民幣結算嘅一日,其實我覺得有,只係大家會傾向覺得中國唔會咁「激進」,就算大局發展不斷走向破局,但因為係香港人嘅政治觀中,錢係最重要,不會為左政治而影響自己嘅利益,所以依家仲會判斷,中美之間會搵到平衡點,結束貿易戰,而不會相信中美破局,中國因此出現問題,香港經濟係波及。

而我地係開始睇到,中美貿易戰對全球各界嘅影響,但同時各國企業都隨即跟進,工廠搬離中國,減少資本投入,另開新市場等等,大家準備緊最壞局面,同時亦開始消化不利因素,而呢啲行為要經過一定時間嘅經濟週期後,先會在業績公佈,國家數據發佈嘅時候,對股市樓市匯市產生影響,再衝擊市民。

一般分析上黎講,很多人判斷貿易戰,認為川普想盡快有一個結果,有助連任同減少不明朗因素,但另一個方面睇,川普差唔多用左成個任期去處理貿易,係咪真係急於一時,而令中國有喘息空間?更何況中美嘅經濟差别下,中國其實無太多手段,應付貿易戰長期化,單單連係咪以貶值應對關稅,中國都無法隨意決定,拖延時間真係對中國有利,我唔認為係咁。

所以當講返依家,中國同港共急於修例,如果佢地汲取零三年廿三條教訓,當年有五十萬人上街,係因為由九七年到零三年,經濟產生問題,令民怨爆發先係上街主因(泛民一直唔願承認),加上大量主流媒體長期放大葉劉醜態,所以今次嘅民間動員能力咁低,原因就係呢到。

而我自己諗咗個原因,點解中國硬上馬:「未來會有產生民怨嘅事,增加對港管治難度。」

當然成因嘅話,可預見當然是中美貿易戰,令外資流走,生産力下跌,代工單下滑,人民幣匯率問題,都隨時令中國經濟發生問題,而秋行軍蟲問題、非洲豬瘟、伊朗石油禁令、俄國提高出口油稅,華為被封殺,甚至歐盟對華方針改變,都隨時變成引爆中國經濟問題嘅原因,而重點在任何一個爆發,都可以波及香港,甚至動搖香港嘅經濟角色。

當然一定有人認為,如果情况咁惡劣,點解仲要封殺香港呢個逃生門?因為呢對門可以俾全部人走,而無人可以阻止,所以我假設中國喺:「以香港做緩衝地區」同「避免香港成為漏洞」,中國選擇後者,寧願扼殺香港,都要避免成為走資走人嘅漏洞,亦同時候令中國有「合法」方式,去針對在港異見人士,或會利用民怨影響管治嘅人,監控各國情報人員,商人流動確保管治安全。

特别當中國無視引渡條例嘅修改,本身是涉及全球同香港無引渡協議嘅地區,已經脫離內政範疇,當受影響嘅國家表達憂慮,而林鄭定性為外國勢力干預,無視西方各國質疑就可以睇到,中國根本唔打算顧及香港嘅特殊地位。

甚至中國咁急於成事,個種快刀斬亂麻嘅態度,就好似有啲消息隨時爆發,要係爆發前通過到,要明白整個港共,係無視台灣講明通過都唔會使用嘅言論,繼續自話自說以棄屍情殺案做理由,中聯辦港澳辦落手,動員人大政協,甚至選擇直上大會,就係避免當年俾民間,有時間累積民氣去反對。

老實講,就算今生政府收回修改方案,但唔代表乜,因為今次已經迫到歐美加三方,表達九七後對港最嚴正嘅反對,基本上各國對港府唔會再天真,質疑港府有無能力維持香港嘅獨立性,甚至逐步修正對港政策,係可以預見嘅趨勢,特别當黃台仰二人取得政治庇護後,我相信香港被踢出西事,只係時間問題。

要知道一件事,中國最終嘅應對大局方法,係可以犧牲大量民眾進行鎖國,畢竟比起發大財,權力先係對習近平最重要嘅事,確保人同錢可以握在黨手中,避免香港成為反中亂黨基地,防止西方各國借香港說三道四前,中國先犧牲香港的特殊地位,又有為何不可?