三夫、G殺、淪落人 – 港產片的幾道異彩

而家先寫有啲遲,唔好意思,我最近先睇齊呢三套戲集齊郵。用個比喻,2019年都算係香港電影一個好年份,可能同八、九十年代個啲無得比,但今年我地飲到三支各有特色既靚紅酒。

《三夫》陳果回歸本色

三夫係陳果「妓女三部曲」最後一集。講真,條友上一部《紅van》真係垃圾中既垃圾,佢拍商業片就等於係災難一樣。今次《三夫》回歸本色,可以睇返一個順眼既陳果作品,唔錯。

《三夫》用一個香港傳說神話做引子,套入一個性上癮既弱智女仔同佢三個「老公」既故事。所謂夫妻,實質上不就是性奴與奴隸主既關係,再加上陳果一向好鍾意加上既政治隱喻,性奴代表咩,三個輪流「進駐」又將女仔不斷易手既「老公」代表咩,觀眾可慢慢深思。

我對女主角曾美慧孜演出既佩服之情,簡直可以用「五體投地」黎形容,完全係瞓身演出,難怪佢奪得今屆金像獎最佳女主角時,毫無反對聲音,亦唔會有人彈出黎罵佢大陸人乜乜柒柒,無他,佢做到咁都拎唔到獎,簡直天理不容。

呢套片同《色戒》唔同之處,在於《色戒》你地會期待睇到性愛場面,會好想睇到偉仔個袋,湯唯對波;《三夫》你越睇會心諗:「求下你地唔好再扑啦」,去到後尾玩埋動物,你直頭會「吾不欲觀之矣」,總之呢套唔係一套賞心悅目既三級片,各位注意。

《G殺》新穎但略嫌眼高手低

《G殺》出彩之處在於風格與我們一般印象中的港產片唔同,有人話好有《告白》之類既日式風格,我都覺得套戲好有日本「青春殘酷物語」既感覺。而電影亦直面好多香港既社會問題:例如校園欺凌、師生戀、黑警、性工作者等等。之不過導演用一種比較奇幻既手法去表現呢啲問題,有種魔幻現實主義味道在內,令人睇得十分過癮。

電影另一個另類但出彩既手法就係用一連串「G」字頭既英文詞去串起成個故事,如「G cup」、「Gun」、「Guts」、「Gum」、「G-shock」、「GF」等等,不過睇到後來令人感覺故事只係為咗串連呢堆「G」而作,亦係我認為呢套戲既敗筆:故事邏輯犯駁,但正如我前述一樣,你當魔幻現實主義咁去睇,個觀感話唔定會fit哂。

此戲一樣有《三夫》般的政治隱喻,聽到特首花名出現(不知故意或巧合)時,有點小驚喜。

《淪落人》滿分佳作

最後講呢套戲既原因,係因為《淪落人》實在太好睇,我總覺得寶物一定要尋歸底,所以最後先黎大讚特讚。

導演兼編劇陳小娟完全唔似一位初出茅廬既新人,整個故事講得流暢,情節感人,笑位喊位拿捏準確,可以令人喊完又笑笑完又喊。呢一方面身為此片監製既陳果應該向人好好學習。

《淪落人》淨睇片名有一種張活游式粵語殘片既慘情感覺,其實不然,一個逃避家暴既菲傭,與一名因工受傷半身不遂既地盤工人,由初相識既互相猜疑陌生,到後來互相了解成為朋友,更到互相協助對方追夢完夢既情誼,電影裡頭不單以春夏秋冬反映時間既流動,亦由兩人彼此扶持、誤會、釋嫌、成全中透露。

黃秋生既演技,自然無話可說,已達爐火純青之化境,整套戲既笑位都由佢帶動,生動貼地既粗口、草根港式英語「no la no 尖」由佢口中說出已令人捧腹,致使此片不致淪為純粹的慘情片。但「no la no尖」背後同樣反映秋生飾演既主角係悲劇發生後對自己既放棄同自卑,即我所謂既「笑中帶淚」。

女主角姬素·孔尚治亦係新人,但演出同樣自然,正如秋生所講,香港一早應該要有以外藉傭工做主題既電影,而姬素·孔尚治亦做好咗呢個重要角色。除此以外,李燦森、葉童等配角都做得很好,全劇冇一個多餘既角色,每個角色都有佢既作用。

唯一要挑剔既大概係故事太童話—邊會有咁好既僱主?唔虐待你都偷笑;邊有咁靚既外傭?就算有,都唔會內外在美俱備啦?邊有咁好既朋友?老友癱咗不計回報咁照顧佢,幫佢請傭工做跑腿……我一路睇一路產生呢啲問號,其實我係咪同片中葉童既角色一樣,對人有太多警戒心同疑心?

好耐未試過有一套港產片令我行出戲院門口都仲好回味想睇多次。

三部電影各有特色,希望各位睇完復仇者聯盟仲有錢剩既話,可以買碟或者入場支持下港產片。