如果鬧可以贏到民主,香港應該一早擁有民主

本土派總係有一種人,只識得一味鬧,冇任何建樹,睇唔到邊度本土、抗爭咗乜。唔好同我講,喺Facebook 屌下中共、屌下政府,吹幾句新聞,屌下泛民、屌下左膠,屌下本土、屌下港獨,就叫本土派,就叫抗爭吓話?!

雨革後點解咁多人由相信泛民轉為支持本土,就係因為睇清楚泛民不會為香港本土利益同中共抗爭。所以認為捍衛本土,對付外敵先係出路,後來甚至明白徹底爭取香港獨立的主權,才可真正保全本土。

但脫離泛民後嘅本土抗爭係咩呢?除咗嘗試默默做事而被打壓得體無完膚嘅人同組織外,就總係有一班人仍然擺脫唔到批評狙擊泛民嘅思維,並且將呢種攻擊批判帶到本土陣營之中。

鬧完泛民、甚至鬧晒所有睇唔過眼嘅人同事,就好似成功爭取咗啲嘢咁,鬧咗當做咗嘢,鬧完又飄飄然,自以為是。鬧人總係輕鬆容易架,因為都係建基已有的事上去批評去否定,而且口講之嘛,又唔洗負責落手落腳去諗,如何建立如何改善。加上鬧係一件痛快口爽嘅事,就很容易吸引到好多壓抑想發洩的香港人支持。

更甚者,有自稱本土或者借本土名目嘅網民,就係吼準香港人呢種心理需求,刻意利用是非、批鬥、嘲笑嚟吸引支持同維持話題。無時無刻都係攻擊這個、恥笑那個,我真係諗唔到呢種人如果有一日唔鬧,會有咩話題講。

可悲嘅係,好多原初不平則鳴出嚟抗爭以至轉撐本土嘅人,都對呢種嘻笑怒罵樂此不疲,心腸變得狹窄歹毒,忘記咗咩係抗爭。咁樣同啲左膠籌旗登報恥笑689,網民隔幾日開Post咒梁振英落地獄、嘲笑淋病777,有咩分別啫,都係用鬧嚟做話題、用嚟打發時間。

然而邏輯是這樣:於同一件事情上,指責別人做錯,不能令自己變得正確,或是帶給自己好處。因為只是純粹指出錯,自己並沒有作出對的行為;而單單指責,沒有繼而制止或自己以身作則取而代之,別人大可唔聽繼續做錯,件事最終也是錯誤。

鬧還鬧,唔該用返多啲時間諗下,點樣表現名符其實嘅本土派,例如加強香港本土意識嘅工作,又諗下點樣抗爭捍衞本土啦。

至於果啲淨係識得以炒花生為業嘅人,就唔好攞住本土兩個字招搖撞騙,你估大家睇唔出你係乜撚嘢人咩?屌你老母倒米狗!