超級工程:羅馬是怎樣建成的VIII君士坦丁堡的餘暉(7) 狄奧多西城牆

狄奧多西城牆(Theodosian Walls)及君士坦丁堡城防體系

屹立千年的新都之盾

上次講到君士坦丁大帝遷都君士坦丁堡,希望讀者們仲有印象。君士坦丁堡處於色雷斯極東,位於歐亞之交,穩握博斯普魯斯海峽經濟命脈,三面環海,高牆聳立,係一座堅固且易守難攻既城市(尤其相比起羅馬城而言)。君士坦丁堡唯一既弱點,就係缺水,為左解決呢個問題,上次已經提過羅馬既工程師係點樣建立一套龐大既集水、輸水、儲水—配水系統以供應未來羅馬帝國既新首都所需。

除左呢個之外,為確保城防穩固,君士坦丁大帝響城東擴建左一道君士坦丁城牆,到狄奧多西二世(Theodosius II,公元408-450年東部共治皇帝)再擴建多一道狄奧多西城牆(Theodosian Walls)呢道狄奧多西城牆,亦即係君士坦丁堡最著名既三重城牆。從公元413年到1453年超過1,000年既時間,狄奧多西城牆一直扮演住君士坦丁堡之盾既角色。時至今日,響伊斯坦堡仍然可以見到殘存既狄奧多西城牆聳立響市郊。

4世紀末到5世紀初,羅馬帝國邊境早已經千瘡百孔,日耳曼蠻族進入帝國境內定居已經係生米煮成熟飯既事實,甚至羅馬軍隊入面都已經好多日耳曼士兵。為應付日益嚴峻既危險,狄奧多西二世認為君士坦丁城牆已經不足以應付國防需要,所以決定響君士坦丁城牆以西2公里開建一座新既城牆(雖然近年既考古發現指出狄奧多西城牆響狄奧多西大帝登位前已經開建)。

狄奧多西城牆長5.7公里,由三層城牆同一重護城河組成,當中最高既係內牆。內牆牆身平均高12米,設有96座城塔,城塔高15-20米,厚4.5-6米。面層係石灰岩(limestone),內部係混凝土既實心結構,牆面上有7-11層紅磚造成既橫紋,呢d橫紋唔止係裝飾,而且將石灰岩面同混凝土芯緊密膠合埋一齊。當敵人用投石器甚至大炮攻擊,或者遇到地震時,呢個設計可以令牆身更加鞏固。至於城樓內裡可以用作存放物資同擺放守城用既弩砲(catapult)。

狄奧多西城牆剖面圖
狄奧多西城牆3D CG復原圖
城塔上用作強化結構既紅色間紋磚清晰可見

響內城牆之外就係一重外牆,外牆厚2米,高9米左右,同樣係磚石混凝土結構,而且亦都同樣設有城樓。現存城樓有62座,位置處於內牆既城樓之間。而內外兩牆既地底有大量秘密隧道相連,可以用作運送兵員同物資。雖然外牆比較矮,但千祈唔好睇少佢,15世紀鄂圖曼土耳其進攻君士坦丁堡時,守城方勢孤力弱,甚至已經冇足夠人手駐防兩重城牆,但憑傾全力防守外城牆,最後令土耳其軍隊付出慘重既傷亡同漫長既攻堅先至破到城。而響外牆既20米外,係10米深、20米闊既護城河,同護城河相連既係最外一層城牆。護城河作用係防止攻城器械接近城牆,而呢條護城河既闊度同深度亦都更有效咁起左保護既作用。

護城河及城牆3D CG復原圖

狄奧多西城牆上總共設有9座城門,當中最宏偉既城門就係「金門」(Χρυσεία Πύλη)。唔係舊金山金門大橋果個金門,金門既原文意思識係黃金既城門咁解,不過當然唔係用真既黃金喇。考古學家相信金門應該係黃銅造,或者表面上貼金箔,所以遠望就好似整座用黃金造既城門一樣,向世人展示君士坦丁堡既富裕(響漫長既中世紀期間,君士坦丁堡一直以富裕聞名於世)。 

金門係君士坦丁堡既「正門」,係比皇帝同軍隊凱旋入城,或者接待重要貴賓使節所用。呢座門既名聲甚至可能通過商旅交流進入中土,例如,響《舊唐書.西域傳》入面就有記載拂菻國(史學界通常將之識別作東羅馬帝國)既都城:「城東面有大門,其高二十餘丈,自上及下,飾以黃金,光輝燦爛,連曜數里。」雖然我哋冇辦法考證入面所指既黃金城門到底係唔係君士坦丁堡既金門,但如果將呢個記錄同羅馬人自己既文獻記錄重疊,我哋會發現兩者出奇地吻合。

 

君士坦丁堡名聞遐邇既「金門」復原圖

「金門」原址現狀

響狄奧多西城牆之外,我哋仲可以搵到另一座規模更宏大既五世紀城牆:安納斯塔西亞牆(Anastasian Wall)。安納斯塔西亞牆位於君士坦丁堡以西65公里,從北到南由黑海(Black Sea)到馬摩拉海(Sea of Mamara),總長達到56公里。

不過呢幅牆由於過長,難以防守,所以慢慢就被棄用。如果將安納斯塔西亞牆計算在內,咁全盛時既君士坦丁堡就有成四條城牆可供防守,從外到內分別係安納斯塔西亞城牆(Anastasian Wall)、狄奧多西城牆(Theodosian Wall)、君士坦丁城牆(Constantine Wall)、拜占庭衛城牆(Wall of Byzantium),而單單狄奧多西城牆本身就有成三層,所以君士坦丁堡響古典時代可以話係牢不可破。

安納斯塔西亞牆(Anastasian Wall)地圖:黃色部分。藍色部分為君士坦丁堡城大約位置
安納斯塔西亞牆(Anastasian Wall)殘存
君士坦丁堡城內既三層城牆:從左到右為狄奧多西城牆、君士坦丁城牆及古拜占庭衛城城牆

從413年建成一路到1453年君士坦丁堡陷落期間,經多次翻修既狄奧多西城牆成功抵禦左日耳曼人、匈人、阿拉伯人既攻擊。1203年威尼斯十字軍破城既事件入面,錯不在狄奧多西城牆,因為城內有奸細,所以幾堅固厚實既城牆都得物無所用。

呢個再一次提醒我哋戰爭既重點係人,城牆又好兵器又好,都只係人手上使用既工具。響漫長既歷史入面,狄奧多西城牆最險既一次係447年到448年既超強地震,面對劇烈地震就算城牆本身有抗震設計都冇用,因為歷史記載地震摧毀左大段城牆,包括57座城塔。狄奧多西二世下令十萬火急必須盡快完成維修,因為阿提拉同一時間正虎視眈眈。結果工程團隊僅僅用左60日就將城牆修復,令到城池可以及時避過一劫。城牆既設計經多次復修,響千年之間足以應付防衛既需求,即使1453年既鄂圖曼土耳其動用左匈牙利工匠所造既青銅大炮,利用火藥發射巨石,雖然破壞到部分城牆,但由於早期火炮射速太慢,所以往往係守城方經常趕得切封閉缺口,所以君士坦丁堡長期久攻不下。

鄂圖曼土耳其佔城之後,城牆又經土耳其人修復使用左一段時間,直到今日,高聳既遺址仍然令人讚歎古羅馬人既工程成就。

1453年鄂圖曼土耳其用黎攻擊君士坦丁堡既青銅巨炮:君士坦丁堡既陷落係劃時代既事件,標誌住中世紀既結束同近現代史既開始