超級工程:羅馬是怎樣建成的VIII君士坦丁堡的餘暉(5) – 君士坦丁大橋

君士坦丁大橋(Bridge of Constantine)

跨度達到2,434米嘅多瑙河大橋,古典時代橋樑建築登峰造極之作

 

記得響《羅馬是怎樣建成的》系列入面,我哋提過兩條響羅馬建築史上好出名嘅大橋:凱撒用黎橫跨萊茵河(Rhine)攻擊日耳曼部落(Germanic Tribes)嘅萊茵河大橋(Caesar’s Rhine Bridge),仲有圖拉真大帝(Trajan)攻打達契亞(Dacia)時所建,古典史上第一條長度超過1公里嘅永久性結構大橋。雖然3世紀嘅混亂、蠻族入侵、國庫空虛等造成學術嘅凋零,但似乎修橋嘅技術並無受太大影響。公元4世紀初,君士坦丁大帝就起咗一條前無古人,事隔好多年都後無來者嘅大橋:多瑙河嘅君士坦丁大橋。

 

關於君士坦丁大橋嘅資料,我哋所知道嘅比較有限,因為呢條橋係被古羅馬人故意破壞而唔係日久失修而荒廢。點解羅馬人後來要將大橋破壞?我哋唔知,但好可能係因為要阻止多瑙河以北嘅日耳曼蠻族利用佢黎進入羅馬帝國境內。由於殘存遺址被遺忘,響好長時期,我哋甚至除左知道佢係橫跨多瑙河同響君士坦丁年代所建之外,對於其他野,包括確實位置都毫不知情。

君士坦丁大橋走向。今日同一位置嘅多瑙河河面闊度約有1.5公里

直到20世紀考古學嘅發展,考古學家先發現左君士坦丁大橋嘅確實位置係位於羅馬尼亞Celeiu鎮以南,向東南橫跨多瑙河進入今日保加利亞Ghighen鎮。考古學者Octavian Toropu響1968年嘅考古發掘,利用殘存嘅混凝土橋墩位置同橋頭堡嘅位置,推算出君士坦丁大橋總長度達到令人咋舌嘅2,434米,超過兩公里長,而且總長度甚至超過青馬大橋嘅2,160米。君士坦丁大橋當中超過一公里橫跨多瑙河嘅河面,橋面高度約高出河面超過10米。近年嘅考古亦都陸續發現更多橋墩嘅地基結構,但由於東歐嘅古典時代考古仍處於非常初步嘅階段,目前君士坦丁大橋仍然有好多野我哋唔知,包括總共有幾多個橋拱、幾多個橋墩等。呢個代表古典時代橋樑建築尖端之作嘅大橋,仍然有好多未解嘅懸疑有待發現。

 

橋樑以北,位於今日羅馬尼亞Celeiu鎮嘅羅馬軍事設施遺址

橋頭堡遺址及復原圖

 

2002年發現,屬於君士坦丁大橋嘅部分混凝土橋墩

 

參考資料:

AMON L. & GHERGHEN P. (2007) OI DATE ÎN LEGĂTURĂ CU PODUL LUI  CONSTANTIN CEL MARE DE LA SUCIDAVA. PONTICA, XL, pp.359-370. MUZEUL DE ISTORIE NAȚIONALĂ ŞI ARHEOLOGIE CONSTANȚA. Retrieved from: http://www.minac.ro/UserFiles/File/pontica2007.pdf