暴君的浴場Baths of the Tyrants
羅馬城最後的超級工程：卡拉卡拉大浴場(Bath of Caracalla)同戴克里先大浴場(Bath of Diocletian)
好喇，歷史背景嘅故事大家就聽過喇，係時候切入正題。承接上面嘅內容，五賢帝時代結束後，羅馬先係進入塞維魯王朝(Severan Dynasty)，繼而陷入混亂，到三世紀晚期到四世紀早期經歷一場話長唔長、話短唔短嘅中興時期。三世紀危機期間，羅馬城嘅建築因為城市人口銳減而停滯。例如最後一條引水道響226年落成後，就再冇新嘅水道橋動工興建。我哋今次要介紹嘅兩座建築，正正就係一個建於三世紀危機前，另一個建於三世紀危機後。
羅馬嘅洗浴文化
浴場，係羅馬文明同文化嘅一部分，係分別開文明同野蠻嘅標記。從公元前嘅時代開始，羅馬人就不斷興建浴場，佢哋嘅軍隊征服到邊，就將浴場嘅文化帶到邊。4世紀中期，單單一個羅馬城就有952座公眾浴場。羅馬人嘅浴場同時帶有清潔、消遣、社交、商業、游泳嘅作用。浴場嘅設計亦相當完善，有完整嘅更衣室、廁所、凍水池(Frigidarium)、溫水池(Tepidarium)、熱水池(Caldarium，英文「火山口」Caldera字根)、桑拿房(Laconicum)、游泳池(Natatio)，其中又有分室內同室外，甚至仲附設有商店同圖書館。帝國冒起嘅數百年間，浴場越起越大、設施越黎越華麗，因為浴場帶黎嘅奢靡之風，史學界曾經有「羅馬亡於浴場」嘅猜想。不過我哋知道，浴場建築嘅巔峰之作，落成嘅日子就響帝國最輝煌嘅時代之後。
暴君卡拉卡拉
卡拉卡拉(Caracalla)，一個瘋狂打壓異見者、實行軍事獨裁嘅暴君，除此之外，佢嘅手上仲沾滿左塞維魯皇族成員嘅鮮血。受害者包括親生兄弟蓋塔、前妻、前岳父，嘅然自己親生兄弟都冇面俾，前朝馬可．奧勒留良(Marcus Aurelius)嘅後代更加唔會例外。當羅馬正陷入經濟危機嘅同時，卡拉卡拉大灑金錢興建左一座大浴場，為嘅唔知道係塞住群眾把口，定係洗走自己嘅罪孽喇。
卡拉卡拉大浴場
卡拉卡拉大浴場(Bath of Caracalla)規模非常龐大，浴場長392米，闊412米，淨係外牆長度已經超過1公里。至於主體建築，都有218X112米咁大。卡拉卡拉年代，混凝土倒模嘅技巧已經成熟，可以運用響極大跨度嘅建築物屋頂結構，取代沿用多年但容易著火嘅木樑瓦頂。卡拉卡拉浴場建築以多個混凝土建成嘅圓穹、十字拱覆蓋，當中熱水浴場(Caldarium)嘅混凝土穹頂直徑達35米，內部空間高度達44米，相當於13層樓高，平板玻璃窗被廣泛使用作照明之用。冷水浴場長59米、闊24米，由三個相連嘅十字拱頂覆蓋，支撐沉重拱頂嘅嘅花崗岩立柱高度12米，每根重量近100公噸。露天嘅冷水浴池長54米、闊23米。
整座浴場建於兩層樓高嘅玄武岩基座之上，基座除左作為地基，仲容納溫度調節系統，除左地板下嘅恆溫系統同銅製對流式熱水器之外，仲包括好多先進嘅設計。當中包括防止熱能流失嘅隔熱空心磚層、向南吸收太陽光嘅大窗等。以確保熱水池係熱，凍水池係凍。估計可以容納約1600人同時使用，一日可以服務6000-8000入場人次。卡拉卡拉大浴場僅僅用左6年就建成(施工期由211-217年)，呢個係另一個建築奇跡。考慮到卡拉卡拉大浴場嘅規模同使用建築材料嘅數量，要響上述工期內完工，單單一個工作日就要安放好2000公噸嘅建築材料。
戴克里先大浴場
諷刺嘅係，217年，正係卡拉卡拉大浴場封頂嘅同一年，卡拉卡拉就死響遠征嘅路上。羅馬城最後一座偉大建築，係大半個世紀之後響羅馬城北興建嘅戴克里先浴場(Bath of Diocletian)。戴克里先浴場係羅馬帝國歷史上最宏大，但亦都係最後一座偉大嘅浴場建築，建造背景係298-306年，元氣正恢復中嘅羅馬帝國。羅馬剛剛打敗左威脅帝國邊境嘅日耳曼部落同東面嘅波斯帝國，經過稅制改革，政府財力亦都有所恢復。戴克里先大浴場比起卡拉卡拉大浴場保存得更完好，建築設計亦都有若干創新。戴克里先大浴場主體建築嘅大細增加到280X160米，有記載可以比3,000人同時使用。戴克里先大浴場通過使用扶壁支撐巨大嘅十字拱減輕左牆身嘅負荷，正因為咁，牆身可以造得冇咁厚，亦都可以容許更大嘅玻璃窗戶(中世紀嘅教堂大玻璃窗都係相同原理起出黎)。戴克里先大浴場嘅玻璃窗遠比之前嘅羅馬建築大，浴場內部更光猛，而戴克里先玻璃窗亦都成為近現代復古風潮常見嘅玻璃窗設計，今日嘅歐洲唔少建築，例如火車站等都有採用呢個設計。
戴克里先浴場之後，君士坦丁大帝亦都曾經響羅馬建造君士坦丁浴場(Baths of Constantine)，但後者保存得較差，所以我哋能夠討論嘅亦都比較有限。君士坦丁響東方設立君士坦丁堡(Constantinople)作為羅馬帝國新都之後，行政同經濟重心東移，加上西帝國嘅首都早就已經唔響羅馬(先係米蘭，然後再搬到更利於防守嘅拉溫納)，加速左羅馬城嘅衰落。4世紀起，君士坦丁堡經歷新嘅建築熱潮，而羅馬就越黎越少新嘅公共建築落成。我哋追溯羅馬帝國建築史嘅故事，亦都隨住政局嘅變化從意大利移玉步到今日嘅土耳其西部。
膠登及連登會員，網路博客、聚言時報專欄作家。筆名來自公元前14世紀期間，被派往埃及迎娶安克姍海娜曼卻神秘消失在兩國邊界的西臺王子塞那沙。筆者專寫古典世史，希臘、羅馬、古代近東、氣候、科技、建築及經濟史均有涉獵，著作包括《羅馬是怎樣建成的》、《漫談荷馬史詩中的歷史背景》、《西臺帝國興衰史》、《亞歷山大與希臘化時代》等。筆者的blog：http://zannanzahattusili.blogspot.com；FB page：http://www.facebook.com/zannanza/；Twitter：http://twitter.com/Zannanza1