紅河之歌:西臺帝國興衰史(5)圖哈利瓦一世

圖哈利瓦一世(Tudhaliya I),新王朝的開始

西臺新王國的第一位國王圖哈利瓦一世,同好多登位嘅國王一樣,都係從一場政變開始。兩位可能係胡斯雅二世嘅兩位兒子,西臺高官Kantuzzili和Himuili發動一場政變嘗試推翻穆瓦塔尼,而親穆瓦塔尼的軍隊聯同胡里安人(Hurrians)的援軍響穆瓦塔尼親衛隊隊長穆瓦(Muwa)的領導下向叛變者宣戰,結果係叛變者取得勝利,穆瓦塔尼的軍隊聯同胡里安人聯軍傷亡慘重。呢個決定性的勝利標誌著得到兩位發動政變的西臺高官支持的圖哈利瓦穩奪大權,亦都象徵住新王朝嘅開始。

關於圖哈利瓦的身份,歷史學界認為他有可能就係發動叛變同謀者的兒子,而由於發動叛變者有可能就係前一位國王胡斯雅二世的兒子,呢場叛變被認為係將王位回歸到胡斯雅二世血脈之舉。響西臺新王朝期間,西臺國王將會再次踏上對外擴張的步伐,在安納托利亞西部同敘利亞攻城掠地,並將與青銅器時代晚期的其他大帝國直接衝突,為西臺成為雄霸一方的帝國奠下穩固的根基。

響開始介紹圖哈利瓦一世嘅政蹟軍功之前,我哋必須先明白一件事,就係歷史學家對新王國早期嘅王表面認知存在空白。考古出土嘅逾萬塊泥板並無覆蓋新王朝早期嘅可靠王表,我哋只係知道由新王朝開始到著名嘅蘇庇路里烏瑪一世(Suppiluliuma I)之間至少隔左三代,但歷史學家對於呢三代嘅時間總共存在過幾多位國王意見分歧,而新王國早期命名為圖哈利瓦嘅國王可能有兩位,至於已知肯定存在嘅圖哈利瓦則有一位,而西臺王室可能存在共治國王嘅情況亦都令問題更複雜化。為簡化討論我哋會將對圖哈利瓦的歷史記載歸納到圖哈利瓦一世之下,但為容納有圖哈利瓦二世存在嘅可能性,我哋姑且將新王國嘅開國國王命名為圖哈利瓦一世/二世(Tudhaliya I/II)。

圖哈利瓦一世(Tudhaliya I)征服安納托利亞西部的阿札瓦地區

當圖哈利瓦一世登位之時,經過多年內憂外患同政局混亂,西臺已經唔再係一個強大嘅帝國。自從古王朝的穆爾西里一世之後,西臺嘅勢力再無進入過敘利亞。目前敘利亞牢牢處於胡里安人建立的米坦尼王國(Mitanni)勢力之下,而從安納托利亞到敘利亞的貿易路線,則被米坦尼的附庸國基祖瓦達(Kizzuwadna)所控制。西臺本土的北邊有卡斯卡部落(Kaska)、西邊有阿札瓦聯盟(Arzawa)、東南邊有新興而強大的米坦尼(Mitanni),形勢對西臺可謂相當不利。

圖哈利瓦一世響處理東南邊敘利亞地區的米坦尼威脅前,佢首先將目光投放響安納托利亞西邊嘅阿札瓦地區。事實上,響西臺古王朝期間,西臺介入安納托利亞西部事務次數可謂相當少,只有哈圖西里一世曾經派軍進攻阿札瓦地區。然而圖哈利瓦一世卻重新重視該地區,並多次派軍進入安納托利亞西部,可能嘅原因係阿札瓦地區一堆小國經常組成軍事聯盟,威脅到西臺西面嘅邊界。為一勞永逸地解決西邊的威脅,圖哈利瓦一世曾四次派軍攻打阿札瓦地區,並試圖將阿札瓦地區歸入西臺勢力範圍之內。

安納托利亞西邊的亞細亞地區勢力地圖

圖哈利瓦一世的首要目標係阿札瓦(Arzawa Minor)、塞哈河流域地區(Seha River Land)同哈普拉(Hapalla)。響戰場上,西臺軍隊成功擊敗阿札瓦聯軍,並將500隊戰馬作為戰利品運回哈圖沙,以降低將來該地區對西臺嘅威脅。但呢次軍事行動只係戰術上擊倒阿札瓦地區,但戰略上係失敗,點解?因為戰爭嘅結果並無帶來長久嘅和平,反而激起阿札瓦地區更激烈嘅反抗。

當打完阿札瓦地區後,安納托利亞西部22個小國組成反西臺聯軍,向西臺響該地區嘅勢力發起挑戰。戰爭嘅過程記載響《編年史》泥板之上,圖哈利瓦一世再次擊敗阿札瓦聯軍,並將600隊戰馬、10,000名步兵戰俘、對方精英嘅戰車隊伍以及反西臺聯軍的領袖普雅瑪—卡隆塔(Piyama-Kurunta)帶回哈圖沙,摧毀左位於安納托利亞西邊亞細亞地區(Assuwa,即古典時代的Asia)嘅反西臺勢力,並將西臺的勢力範圍擴展至西南部嘅呂基亞(Lycia),同西北部嘅特洛伊(Wilusiya同Taruisa)。

自此以後,安納托利亞西部大片地區被納入西臺勢力範圍,而反西臺聯軍其中一名領袖庫庫里(Kukkulli)被釋放回亞細亞地區並成為西臺的傀儡王。冇隔幾耐,庫庫里就再次向西臺發動叛變,不過叛變被西臺軍隊壓制,而庫庫里則響過程中被殺。經此大敗之後,亞細亞再無能力對西臺構成威脅。1991年,考古學家響哈圖沙發現左一把青銅長劍,上面刻上銘文,銘文寫住「偉大的王圖哈利瓦擊碎亞細亞地區,他將此劍獻予風暴之神,他的主」,顯示此劍相信係圖哈利瓦擊敗阿札瓦聯軍後帶回哈圖沙的戰利品之一。

來自西臺東部米坦尼王國同北部卡斯卡嘅威脅

米坦尼勢力範圍地圖,藍色部分是西臺帝國領土

由於圖哈利瓦一世長期響安納托利亞西部嘅亞細亞地區征戰之時,西臺本土附近無可避免出現守備空虛嘅情況,而根據《編年史》記載,西臺本土北部嘅卡斯卡部落好快就睇準呢個機會,出兵攻打赫梯(Hatti)地區並造成嚴重破壞。

當圖哈利瓦從亞細亞返回哈圖沙後,他迅速對卡斯卡部落發動迎擊,並成功攻入西臺本土北面的卡斯卡地區。雖然軍事行動成功,但戰略上卡斯卡仍長期對西臺本土造成威脅,呢個威脅一直延續到圖哈利瓦之後嘅繼任國王年間。短暫解決卡斯卡的問題後,圖哈利瓦又將目光放到東邊,一個位於西臺同米坦尼之間的伊蘇雅王國(Isuwa),呢個王國曾經響米坦尼煽動下同西臺敵對,雖然伊蘇雅嘅叛亂被西臺軍隊所壓制,但叛亂分子投奔米坦尼,並獲得米坦尼嘅政治庇護。圖哈利瓦曾經向米坦尼施壓,要求遣返呢批叛亂分子,但結果不得要領。米坦尼仲派軍伊蘇雅,攻擊當地親西臺的地區。

當外交談判嘅手段都失效之時,圖哈利瓦知道只有拳頭話事,於是當佢完成對西邊同北邊卡斯卡地區的軍事行動後,就出兵伊蘇雅並再次將該地區納入西臺勢力之下。然而圖哈利瓦的成果最後被證實只帶來短暫嘅效果,響之後嘅歷史我哋會見到,伊蘇雅仍然極度親近米坦尼,並將參與一場幾乎將西臺帶到亡國邊緣嘅大戰。圖哈利瓦響東邊嘅戰爭並無消除到米坦尼響東邊嘅勢力,相反,西臺東部邊境地區一直曝露響米坦尼嘅威脅之下,對西臺而言,危機並無解除。