超級工程:羅馬是怎樣建成的VII帝國驕雄五賢帝II(5)阿波羅多羅斯的結局

維納斯及羅馬神殿(Temple of AMOR and ROMA),哈德良時期其他建築

除左以上介紹嘅三個最具代表性嘅哈德良時期建築之外,哈德良仲響羅馬帝國全境建造左好多嘅記念性質建築。響哈德良兩次出巡期間,依位建築師皇帝造訪左幾乎所有行省,將行省嘅文化同建築特色帶到羅馬,點綴左佢嘅哈德良別墅;同時亦都響各行省留低左屬於佢嘅印記。以哈德良命名嘅建築,響土耳其(以前屬於希臘文化圈)同希臘本土尤其多,讀者如果有去過上述依兩個地方旅行,應該會有聽導遊介紹過關於哈德良響東地中海一帶遺留落黎嘅古蹟。

建築師皇帝與前朝首席建築師之間的恩怨

響羅馬城內,哈德良(Hadrian)響尼祿金殿原址、鬥獸場旁邊開建左一座新嘅神殿:維納斯及羅馬神殿(AMOR and ROMA)。為左建造依個神殿,哈德良起用另一位建築師Decrianus,利用24頭戰象,將已經改裝成阿波羅嘅尼祿巨像移至鬥獸場門外。響拉丁語入面,維納斯(AMOR,羅馬傳說中羅馬人之母)同羅馬(ROMA)巧妙咁對稱,而神殿嘅設計係建立響一個145X100米嘅基座上,建築物本身長110米、闊53米、高約30米,係羅馬帝國境內最大嘅神殿建築之一。建築本身由柱廊環繞,內部呈對稱狀,同時供奉維納斯同羅馬,建築物嘅對稱設計呼應兩個名嘅對稱特點。但根據2世紀末到3世紀初嘅史學家卡西烏斯·狄奧,維納斯及羅馬神殿亦都標誌住阿波羅多羅斯(Aopllodorus)依個一代天才建築師嘅殞落。

維納斯(AMOR)及羅馬(ROMA)神殿建築平面圖,神殿由哈德良建造,4世紀曾經復修
現時維納斯及羅馬神殿建築嘅基座
復完圖

狄奧(Cassius Dio)《羅馬史》(Historia Romana)第59卷寫道,當哈德良仲做緊圖拉真條o靚嘅時候,有次圖拉真皇帝同阿波羅多羅斯討論緊建築方案,哈德良拎住一幅佢自己畫嘅建築圖紙走去打亂兩人(當時哈德良已經對建築有好大興趣)。結果阿波羅多羅斯鬧到佢一面屁,仲叫佢返歸去畫佢自己嘅南瓜(Pumpkin, 應該係指圓形穹頂果類野),又話佢對建築嘅事一無所知。自此,哈德良一直記恨在心。直到哈德良做左皇帝,佢希望證明自己嘅才能,於是就自己設計左維納斯及羅馬神殿,拎去比阿波羅多羅斯叫佢評價。當阿波羅多羅斯指出佢嘅設計有若干缺點後,哈德良難掩佢嘅悲哀同難過,結果以莫須有嘅罪名放逐左阿波羅多羅斯,之後仲派人將佢隊冧左。一位熱愛建築嘅皇帝,同一個才華洋溢嘅御用建築師,本來應該可以利用共同興趣建立私人交情,但最後因為哈德良嘅小氣同嫉妒而變成悲劇,至少依個係大約響哈德良大半個世紀後嘅史學家記錄嘅結局(狄奧嘅原文英譯詳見參考資料)。

維納斯及羅馬神殿內部半圓穹頂式神龕遺址
維納斯及羅馬神殿內部半圓穹頂式神龕復完圖

但依個到底係咪事實?

根據考古學家研究,現存響羅馬城內嘅維納斯及羅馬神殿確實建於地勢較高處,而地底確實有一個碩大嘅地下室,顯示阿波羅多羅斯嘅兩個建議最終都被接納。所以現代史學家普遍都對狄奧所講既抱懷疑態度,尤其係阿波羅多羅斯因為批評哈德良既設計而遭殺身之禍呢個講法。。而哈德良皇帝同元老院關係麻麻,狄奧嘅家族又係元老階級出身,所以依段歷史亦都唔排除有誇大成份。正因為咁,阿波羅多羅斯嘅結局,目前仍然遠未有一個確切嘅結論。

帝國境內其他哈德良時代嘅建築,及結語

現今縱橫整個地中海,好多地方都不乏同哈德良有關嘅建築。圖拉真同哈德良時代,羅馬國勢鼎盛,加上兩位皇帝都熱衷於建設,所以依段時期亦都係羅馬帝國建築史嘅一個黃金時代。響希臘同土耳其,同哈德良有關嘅遺蹟特別多。例如響巴格門古城(Pergamon),衛城山上醒眼嘅雪白大理石立柱,就係哈德良年間為神格化嘅圖拉真所完成嘅圖拉真神殿(Trajaneum)。希臘雅典,熱愛希臘文化既哈德良最喜愛既一座城市,佢建立左一座供奉希臘主神宙斯的宙斯神殿。土耳其安塔利亞(Antayla)、約旦傑拉什(Jerash)、希臘雅典(Athens)都建有哈德良拱門。

巴格門(Pergamon)嘅圖拉真神殿(Trajaneum)

除此之外,哈德良又響以色列嘅耶路撒冷大興土木,歷史記載指,哈德良本來欣賞猶太人嘅聖殿建築,有意為佢地重建返依座半個世紀前(公元70年)被弗拉維王朝嘅提圖斯(Titus)所毀嘅聖殿。但後來猶太人先發現原來佢係打算用依座新嘅「聖殿」黎供奉佢自己同一d異教嘅神明,又將耶路撒冷依個古名改成「Aelia Capitolina」,依個被猶太人視作企圖將聖殿山連根拔起嘅舉動引起廣泛公憤,並直接誘發造成58萬人死亡嘅第三次猶太人暴亂。漫畫《羅馬浴場》對依件事都有所提及(電影版改成對日耳曼部落戰爭)。由於哈德良年期對猶太人嘅種族清洗同企圖對猶太教連根拔起,傳統上猶太人都好憎恨哈德良依個羅馬皇帝,憎恨程度更甚於維斯帕先(Vespasian)同提圖斯(Titus)。

 

哈德良響希臘雅典所建嘅宙斯廟

 

約旦傑拉什(Jerash)嘅哈德良拱門(Arch of Hadrian)

公元138年7月10日,哈德良因心臟問題響拿坡里灣區嘅別墅駕崩,得年62歲,管治羅馬帝國21年。響哈德良晚年,帝位繼承問題嚴峻,羅馬城內陰謀重重。最終,哈德良其中一個養子安東尼成功繼位,避免羅馬陷入權鬥嘅危機。而哈德良嘅骨灰最終亦都移到位於臺伯河西岸嘅哈德良陵(Hadrian’s Mausoleum,其結構即今日嘅聖天使城堡),長眠於哈德良任內最後一幢嘅偉大建築內。

哈德良陵墓(Mausoleum of Hadrian)

超級工程:羅馬是怎樣建成的第七季完