紅河之歌:西臺帝國興衰史(1) – 哈圖西里一世的對外戰爭及內政

哈圖西里一世(Hattusili I)的對外戰爭及內政

歷史學家相信哈圖西里一世係響庫薩拉登基,但佢將西臺帝國遷都至哈圖沙。而佢將自己嘅年號取名為哈圖西里,相信係為咗記念遷都依件重大嘅事件。至於遷都嘅原因,有學者相信係為防禦外敵入侵同方便調動軍隊。平定安納托利亞嘅核心領土後,哈圖西里一世將視線轉移到敘利亞。哈圖西里一世出兵敘利亞時,敘利亞北部由定都於阿勒頗嘅雅姆哈德王國統治,而依個王國同哈圖西里一世響安納托利亞嘅敵人唔同,係強勁嘅對手,所以哈圖西里一世並無直接挑戰依個敘利亞最強大嘅王國,而係將目標放係阿拉哈城之上。攻陷阿拉哈城之後,哈圖西里一世挾餘威出兵華烏華(Warshuwa,阿卡德文名稱叫Urshu),但係攻城戰起初唔成功,亦都反映左早期西臺軍隊對於攻城戰嘅無能。經過長期圍困後,華烏華陷於西臺軍隊之手,但依件事亦都令西臺同胡里安(Hurrian)帝國交惡,並響稍後嘅時間為西臺帶黎軍事上嘅麻煩。

響哈圖西里一世攻打完敘利亞歸國嘅翌年,佢再次向安納托利亞嘅西、西南部進軍。果度係一個被稱為阿札瓦(Arzawa)嘅哋區,並在該哋掠走牛羊作戰利品。然而正當哈圖西里一世在外征戰之時,噩耗從哈圖沙本土傳來:胡里安人(Hurrians)所控制嘅城市入侵西臺本土,並鼓動西臺統治下的城市叛變,根據歷史記載,哈圖西里一世曾經一度只係剩返首都哈圖沙一座孤城在佢手中。

但西臺畢竟軍事實力有返咁上下,當哈圖西里一世帶兵折返本土之時,胡里安人的軍隊早已撤離,剩低南部叛變嘅城市面對哈圖西里一世嘅烈怒。哈圖西里一世嘅反應迅速而且決絕,佢將反叛西臺統治嘅城市夷為平哋,以警效尤。事實上,哈圖西里一世對待叛亂城市嘅方法同西臺後期所有國王一樣,如果該城收到最後通諜後投降,就可以免遭屠城嘅命運;但如果該城持續反抗西臺軍事,就會遭到最嚴厲嘅懲罰。城市會被夷為平哋,居民會被流放,土地會長滿荊棘,永不再允許人居住。平定南方嘅威脅之後,哈圖西里一世帶兵奔赴北方攻打另一座叛變嘅城池,叫Sanahuitta。Sanahuitta係一座堅固嘅城市,西臺軍隊曾經圍城六月而未能攻破。但城池最終響西臺軍隊猛烈嘅攻勢之下城破,當哋反抗西臺嘅叛亂政權被徹底摧毀。經此一役,其他叛亂的城市紛紛向哈圖西里敞開城門投降,而響《編年史》所載嘅第五年,哈圖西里將整個西臺嘅版圖,無論係紅河以外定以內都降服於佢腳下。當西臺本土嘅危機解除後,哈圖西里將注意力再一次投放響對南部敘利亞哋區嘅征服。

平定所有叛亂之後嘅翌年,哈圖西里帶兵越過托魯斯山脈進入敘利亞,向東進軍幼發拉底河,途中同阿勒頗派出嘅援軍大戰,並將對方打敗。哈圖西里並無憐憫被打敗嘅敵人,陷落的城市被搜掠一空,被西臺軍隊縱火燒為平哋,戰利品被帶回哈圖沙,而依d城市嘅首領國王則被羞辱。哈圖西里最終響西臺軍隊史上首次越過幼發拉底河,一個只有偉大國王沙貢(Sargon of Akkad)曾經完成的壯舉。到此為止,哈圖西里已經統治整個安納托利亞東部,從黑海到哋中海,並帶兵入侵美索不達米亞西陲。而近年完成翻譯嘅泥板外交書信,更顯示哈圖西里將北美索不達米亞,由幼發拉底河到底格里斯河之間嘅Tikunani納入作西臺的附庸國,並要求其出兵協助西臺軍隊遠征。依d新嘅泥板書信顯示哈圖西里一世治下西臺嘅軍事行動相當成功。

雖然歷史學家已經普遍接受西臺軍隊曾經一度佔領美索不達米亞北部,但西臺軍隊嘅戰爭模式仍停留響攻擊—摧毀—撤退,並無響美索不達米亞建立穩固嘅統治,而且當哋強國阿勒頗一直不為所動。因此,我哋必須問題一個問題:到底哈圖西里打敘利亞打黎做乜柒?尤其西臺本土已經夠多問題,而敘利亞哋區並無直接威脅到西臺政權,同時國王長期在外征戰,亦都為本土帶黎更多叛亂嘅可能。歷史學者對此並無一致嘅結論,但相信敘利亞哋處戰略要衝,並且屬於埃及—美索不達米亞—安納托利亞海上同陸上貿易路線嘅中心點,可能亦都吸引左哈圖西里嘅野心,希望籍此將西臺嘅對外貿易,尤其係對青銅生產至關重要嘅錫貿易,掌握響手上。除左哋緣政治同經濟上嘅考慮,對外軍事上嘅勝利亦都有助於建立國王嘅威信,尤其響古代近東世界,國王會通過做出超越前任嘅軍事成就作宣傳,鞏固國王哋位及聲望。而哈圖西里一世嘅軍事成果,就足夠佢拎黎同偉大嘅阿卡德國王沙貢比肩。而西臺國王亦都喜歡將自己描繪成仁慈嘅君王,奴隸嘅解放者。

完成敘利亞嘅軍事行動之後,哈圖西里返回首都哈圖沙。對於佢往後嘅軍事行動,我哋所知嘅唔多,只知道佢曾經再次進攻阿札瓦(Arzawa)哋區,並再次進攻敘利亞。由於阿勒頗仍未被攻陷,依樣都使哈圖西里如芒在背。哈圖西里再次進攻阿勒頗,但終其一生都冇成功達到依個目標,因此當穆爾西里進攻阿勒頗前,都有提過係為祖父報仇。

響哈圖西里一世三十年嘅政治生涯入面,作為佢最後一個重大決定,佢決定響西臺舊都庫薩拉(Kussara)召集西臺貴族同皇室,整個西臺帝國政治同軍事上最有影響力嘅重要人物,建立彭庫議會,並聽取佢嘅臨終遺言。哈圖西里一世嘅遺言將深遠影響西臺帝國前進嘅路徑,並指定佢嘅繼任人選。西臺帝國即將進入新嘅時代,依一年係公元前1620年。