紅河之歌:西臺帝國興衰史(1) – 西臺帝國的誕生(西臺帝國前的安納托利亞)

關於西臺帝國係點樣被考古學家發現,同埋西臺文字係點樣被破譯,請參考下列文章:

http://polymerhk.com/articles/2016/02/27/28699/

通過對西臺文字嘅破譯,歷史學者終於能夠一窺西臺帝國嘅歷史。響被破譯的泥板當中,有歷史檔案記錄、外交書信、禱文、法律、合約等等唔同嘅類別。雖然我地依然唔能夠完整咁拼湊出西臺歷史嘅一切,但至少我地能夠知道西臺有邊d國王,征服過咩地區,同咩國家立過條約等等,同時亦都為西臺人嘅日常生活、社會文化等等揭開神秘嘅面紗。

依一切,就從西臺文明嘅興起開始講起。

西臺帝國前的安納托利亞

考古學家發現,響西臺帝國興起之前,安納托利亞係冇一個強大而統一嘅帝國,情況就有d似中國嘅春秋戰國時代一樣。而安納托利亞無數小國當中,有一個嘅名叫做哈圖(Hattus),位置就響之後西臺嘅首都哈圖沙。除左哈圖之外,同樣位於安納托利亞中部嘅小國有Alisar、Zalpa、Kanes等。

關於西臺帝國前嘅歷史,我哋所知道嘅唔多,但我哋知道響公元前24世紀,小國Kanes嘅國王塞巴尼(Zipani)曾經起兵反抗過阿卡德帝國國王納拉姆辛(公元前2380-2325年)嘅統治。我地知道嘅係呢堆小國同西臺帝國唔同,佢哋嘅主體民族唔屬於印歐人種,而最早將自己稱之為赫梯人(Hattians)嘅,亦都係屬於本土人而非印歐人種。然而到左公元前三千紀末期,一班從外地黎到安納托利亞嘅印歐人種永遠咁改變左歷史嘅發展方向。依班印歐人當中有將會成為西臺帝國統治主體嘅尼希特人(Nesite)。至於依班印歐人從邊度嚟,依個仍然係歷史學界爭議不休嘅話題。無論印歐人以征服者或移民嘅姿態出現響安納托利亞,佢哋最終響公元前17世紀建立左西臺帝國,統治本土嘅赫梯人(Hattians),並採納左赫梯人嘅宗教、藝術同神話,將自己稱之為西臺人。因此我地可以見到,西臺帝國並唔係一個單一民族國家,而係屬於一個多種族、多語言嘅帝國。至於尼希特人所講嘅印歐語系尼希特語,就此成為西臺帝國行政同高層政府所使用嘅通用語言。

拉伯尼納(Labarna)

從西臺歷史記錄中提及過西臺帝國第一個國王係拉伯尼納,佢嘅事蹟記錄響《鐵列平詔令》之上。起初拉伯尼納擁有嘅土地並唔多,只有庫薩拉(Kussara)一帶,但佢開始帶軍向外擴張,而且戰勝眾多敵人,領土由紅河一直打到去南部嘅地中海邊,並派眾兒子管理新征服得來嘅土地。歷史學家對西臺帝國建立者拉伯尼納嘅存在意見分歧,有學者認為拉伯尼納同佢嘅繼任人哈圖西里一世可能係同一人,即哈圖西里一世將拉伯尼納用作自己的稱號,而100多年後嘅鐵列平時代文書官誤將兩個名字當成兩個人。但目前學界主流傾向相信拉伯尼納嘅存在。而西臺往後嘅統治者都會以建國君主「拉伯尼納」作自己嘅稱呼,類似於羅馬皇帝將自己稱呼作「奧古斯都」。

哈圖西里一世(Hattusili I)的歷史記載

歷史學家所肯定知道嘅第一個西臺國王,係哈圖西里一世。關於哈圖西里一世在位期間所發生過嘅事,我哋可以從1957年發現嘅《編年史》泥板(Annals)同《遺囑》泥板(Testament)果度得知。《編年史》係一部雙語嘅歷史記錄,有當時國際通用外交語言阿卡德語版本,同埋西臺楔形文字版本。最早發現嘅版本係公元前13世紀嘅抄本,主要記載哈圖西里一世對外的軍事行動。而《遺囑》泥版同樣係一部雙語嘅歷史記錄,主要為我地提供西臺帝國內部事務嘅線索,記錄哈圖西里一世離世前向西臺軍官同貴族所留下的遺囑嘅記錄,包括指定其孫子穆爾西里登基嘅命令。