紅河之歌:西臺帝國興衰史(1) – 西臺帝國的誕生 (引言)

響好耐好耐之前,有一片肥沃而遙遠嘅土地叫美索不達米亞,響呢度流敞住幼發拉底河同底格里斯河兩條偉大嘅河流,曾經有好多偉大嘅國王同偉大嘅帝國響依片土地上崛起同衰亡。有關於佢地嘅故事代代相傳,傳作一時佳話。響古代嘅近東世界,只有最強大帝國的國王能夠享受「偉大的王」的稱號,依啲偉大的王享有國際上嘅聲譽和尊敬,而且佢地都係國際政治上的重要參與者。而被稱為偉大的王的帝國,就只有著名的埃及、亞述、和巴比倫。

然而響美索不達米亞嘅西北面,響一個現代被稱為土耳其嘅地方,存在住另一個偉大的帝國,然而呢個偉大的帝國嘅存在就得好少人知道。佢地嘅歷史同故事被迷霧所掩蓋,佢地嘅輝煌事跡完全被歷史所遺忘。呢個帝國嘅名字叫:西臺帝國。

同閃米特人種嘅亞述同巴比倫唔同,西臺帝國係屬於印歐人種,就好似邁錫尼希臘一樣,而佢地講嘅語言同今日嘅英文有親戚關係,同屬印歐語系嘅語言。響西臺帝國極盛嘅時代,佢地嘅領土由西邊的愛琴海岸延伸到東邊嘅幼發拉底河,由北邊的黑海延伸到南邊嘅敘利亞,覆蓋今日土耳其的大部分同黎凡特北部。時間係公元前13世紀,呢個係一個屬於英雄嘅時代,同荷馬史詩同期。

西臺嘅中心地帶係位於安納托利亞中部嘅高原,響呢度,紅河(Kızılırmak)彎曲流入北邊嘅黑海。呢度嘅地形乾旱貧瘠,而且土地呈現出啡紅色調,咁係因為呢度嘅泥土富含氧化鐵嘅原故。亦都因為呢個原因,西臺人係最早研究出從赤鐵礦中提煉出金屬鐵嘅民族,亦都係世界最早進入鐵器時代嘅民族。第一眼望見,呢度已經同埃及、美索不達米亞肥沃嘅河谷地形好唔同。由於缺乏大河嘅滋潤,好少人會預計到呢個地方能夠誕生出一個偉大嘅文明。

然而即使係咁,從公元前17世紀到公元前13世紀,西臺人仍然頑強咁響呢度生存繁衍,佢地用智慧同堅強嘅意志成功克服左嚴酷嘅自然環境,並成功創造出一個被認為係不可能嘅文明。惡劣嘅環境中誕生出堅毅不屈嘅人民,正因為如此,西臺人以其紀律同勇敢善戰聞名於世。事實上,佢地曾經有過一個輝煌嘅戰績:佢地嘅軍事行動曾經將呢支強大嘅軍隊帶到巴比倫嘅城門外,而佢地亦都曾經同偉大嘅古埃及帝國並駕齊驅。

我現在要講嘅就係呢個偉大帝國嘅故事,一個屬於鐵血帝國西臺人嘅故事。