我依啲叫坦白

褒貶詞依樣好重要,尤其係詭辯上就好易令人混淆。

唔知係我人老咗見人多咗,定係個世界正在吹一股「做自己」嘅風氣,不論少年或中坑都會有人係我面前講完一堆令人反白眼嘅言論,引起在場人不滿情緒後再補多句:「真說話唔啱聽?咁算囉。」

的確,真說話好多時候都會唔啱聽。例如:我想識啲有質素嘅朋友架咋;唔係日本黎嘅生果我唔食架喎;深水埗呢啲地方我唔會去囉。近日女性朋友同我分享佢有位好姊妹嘅社交行為令佢相當尷尬。

友人F與好姊妹T飲嘢,在場亦有唔同嘅新朋友。T外表唔錯,自然引到男人主動結識,但無奈港女性格,擇偶條件傾向都係高。F亦覺無所謂,反正人有自己嘅取向,但令F覺得困擾嘅係,T總係將啲唔應該講嘅嘢都會講出黎。

情況一:
男士相約T去深水埗自己公司附近午餐,換黎嘅係:
「深水埗呢啲地方我唔會去囉。個到咁雜,你本身會唔會中環個邊先……」。

情況二:
眾人討論起美食,有人提到上次去日本食過提子相當唔錯,眾人點頭,亦有人話好想嘗試下,好快有人就提出自己曾經到過新疆,當地生果亦可媲美日本出產水果,眾人表示感興趣希望下次聚會可以品嘗。
T立即話:「吓!?我食提子淨係食日本,唔係日本黎嘅生果我唔食架喎」。

情況三:
T所引出嘅話題,顯然同眾人格格不入。離席後,F就友善地提點T講說話要圓滑啲。
「我呢啲叫坦白囉唔該」。

F一面無奈,T仲繼續講話點解場內無乜有質素嘅人可以同佢一齊傾去歐洲旅遊,美國見聞等等。
F一聲嘆氣望住T然後將佢嘅怒氣轉移發向我身上。

好多傻仔都覺得「有個句,講個句」係好型,唔會為自己嘅語言去修飾,咁樣叫活出真我。當你對人講自己係「坦白」、「做自己」個一刻開始,你就已經為緊自己嘅行為作修飾。

假嘅講真,衰嘅講好,唔係聰明,而係假;不經大腦,不理會任何人嘅感受,唔係坦白,只係你仲停留係小朋友階段。