今日走咗去睇地厚天高,面對著依加事情嘅發展,梁天琦可能因為暴動罪要被判監十年,導演係放映會嘅開場白講到差啲喊。

對於梁天琦係被dq 前後嘅說話好似轉軚轉得好犀利,甚至係青政同其他議員被dq 之後 所發生嘅警民衝突,梁天琦亦都冇參與在內,有好多人都曾經表示不滿,而我自己亦都對梁天琦無慎言而有所微言。但係梁天琦依個25歲嘅後生仔,佢雖然係好presentive,佢始終係一個後生仔,甚至係一個仲未出嚟做過嘢,未見過世途險惡嘅後生仔,要佢做到思慮周全係好難。而依位年青人喺一出嚟社會做嘢所面對嘅就係黑暗嘅政治,事後令佢覺得,選舉發生嘅事好嘔心。

梁天琦並唔係大家心目中想塑造嘅聖人,佢只係一個年青人,一個衝動,而真係不知天高地厚嘅年青人。不過年青人嘅衝動,比起一班做野要穩穩陣陣嘅政界老屎忽所做出嚟嘅事,對社會嘅衝擊大得多。但係好不幸嘅就係依班年青人亦因為佢哋嘅衝動,佢哋想令香港有所改變,就落得要被審判收監收場。而梁天琦更加係由當初被檢控一條暴動罪變成三條,
一條係亞加老街暴動罪,一條係砵蘭街暴動罪一條係煽動暴動罪,如果佢係繼續參加社運,可能會再畀人檢舉多一條暴動,唔通我哋可以對一個年青人有咁嘅期望咩?

喺依加香港嘅環境, 如果出現一個稍為presentive而又敢言嘅人,香港有好多人都會捧佢為聖人,希望佢做一個摩西帶領我哋出紅海,但係如果稍有不滿就會將依個人踩到變地底泥。事實就係呢個世界冇乜幾多個聖人,就算聖人都係人,我哋唔可以將所有責任推畀一啲我哋走去捧佢做聖人嘅人。 講起梁天琦,佢就更加唔係一個聖人,係一個有抑鬱症嘅廢青。

事到如今,老實講就算梁天琦要出逃,我都會支持佢咁做,不過佢就選擇咗返嚟承受結果,我都唔知咁叫唔叫戇居好,而我覺得佢更戇居嘅係導演問再畀佢揀一次,仲會唔會加入本民前?佢話會。

係度我衷心希望梁天琦及一衆受迫害嘅人士可以大步檻過。