泛民應該諗下係咪夠鐘解散完場

「其實泛左支黃,係時候諗下解散泛民。」

係啊,解散泛民。你一定會話,你當然想泛民散丶你投共丶你資敵丶Babababa…… 老實講,泛民解散,本土都無力頂上,只係泛民解散,有效解決泛民一個尷尬狀況:

「點解佢地做嘅嘢,要入我數?」

即係點?人力搞嘅嘢,入泛民數;自決搞嘅嘢,入泛民數;公民民主唔去表決,入泛民數;長毛一個示威,入泛民數;姚松炎失策,入泛民數,羅冠聰講錯嘢,入泛民數…… 之後就算無做錯嘅人,因爲係泛民中人,就要夾硬硬食,唔通公開講:「關我__事啊?」

講到尾,泛民只係統稱,一個方便佢地同外界識别,入面有幾多政黨,光譜幾闊,外界都覺得泛民就係一個整體,係一個事實。雖然當中,無乜約章,無乜共識,不論基本盤,選民,媒體,全部都係共享。只係佢地無一個組織嘅行事規格,例如DQ4發生在即,但佢地係無應對方式,亦無及早準備;議會入面又控制唔到行動一致;大是大非問題就各懷鬼胎;咁算啲咩組織呢?

更重要係就算有泛民呢個框架,都阻唔到一啲大黨成員,為左自身利益行事,例如民主公民兩黨,當年唔理其他反對聲音,為左趕絕進步民主派(人力,社民連),而通過修改議事規則一樣;唔洗講關鍵時刻或表決議案時,經常岀現差一票,投棄權票,但從來唔解釋翻,只係媒體避重就輕無接導,大眾唔覺有問題,泛民先甩到身。

本身做唔到溝通丶協調丶達成共識,呢啲仲叫組織?仲要因為一兩黨,或一兩個人的問題,而集體承受啲黑鍋,正常咩?當你又唔係組織,又要利益分享,甚至倒貼資源,一次都還好,兩次?三次?幾團結都會岀事。

反正泛民解散,政黨依然存在,無乜咁大不了。乜話?你話唔解散得?咁都仲有個方法:

「不如你地合併啦。」

無論泛民政黨丶左翼(膠)份子丶後雨傘民眾(黃絲)丶傳統民主派(大中華背景)丶到自決派丶親泛民媒體丶評論員丶學者丶NGO…… 無論有何政治立場有分别,都係共用同一資源,同一群群眾支持,呢個事實無得推。

如果眼下泛民係一個有名無實嘅牌頭,但又要為「團結」就變成集體行動,咁不如正正經經,合併成一體。你話唔現實?唔現實得過,要本土派同泛民無條件合作?

更重要大家都知,佢哋都成日講,要頂住赤化就要合作,咁泛民依家嘅架構問題,令整個反對派發揮唔到政治影響,以大義角度講,泛民合併成正式政黨係必須,因為建制派有中共做協調,根本無空間俾泛民再各自為政。

好似今次補選咁,連自己嘅基本盤都發揮唔到,泛民上下都無籍口架啦,最慘係輸左係立即搵戰犯,傳耳語,依啲就係因為泛民太鬆散,先令一啲自己人,為左迴避問題,而選擇向內部攻擊,之後就掩飾真正嘅問題。

唯有合併,先可以統一立場,令政黨,成員,持份者之間,減少爭權奪利,係議會真正處理事務,避免缺席,投錯,有任何失誤真正集體負責,溝通同規畫同步化等等,更重要係選舉嘅時候,無須初選,或者過多協調,甚至可以實行配票。

合併帶黎嘅好處,比起依家咁一盤散沙好。

「睇到呢到,依家先係重點。」

當你睇完上面個千字,你可能問我係咪認真,我老實都幾認真,最少無論你贊成定反對,你心入面諗緊合併不可行原因,就係泛民一啲嘅問題;你贊成合併,係因為泛民嘅架構唔可以應對局勢;你反對合併,係因為一班既有利益者,同細黨獨立議員被邊緣化;你反對解散,係知道一散就好難重組;你支持解散,係因為現有勢力分佈有不公問題。

問題係傳統民主派(元老,金主,民主公民等),進步民主派(社民連,人力,自決派,獨立議員),依兩個大勢力嘅價値觀,既有利益,代表群眾嘅不一,彼此有利益矛盾,位置重複,甚至對立,只係因爲有民主,有自由,去作為共同嘅目標,要應付建制外敵,先將內部矛盾隱藏,咁嘅情況,你一定會講:「咁仲要合併?」

因為一切都顯示泛民要改革。

其實合併,解散係偽命題,真正係當你為呢個偽命題,而講好多泛民嘅問題,諗到好多矛盾,你就知道泛民要改,要處理,要面對嘅事,比起搵戰犯更重要。

作為泛民局外人,有啲嘢我都無得講太多,但點定位港中關係,香港人嘅身份認同,對赤化嘅態度,對未來前途問題,依啲根本問題或價值觀問題,會影響泛民係議會,政策嘅取態。還有兩大勢力背後的世代矛盾,如果解決唔到,今次已經五五開,下次呢?

而嘗試只係少修少補咁改,真係有效咩?對一啲溫和本土同泛民支持者,佢地睇到嘅係泛民嘅唔同心,互抽後腿,甚至講緊係態度問題,價值觀問題,待人處事,依家部份嘅議員,或者輿論領袖,KOL係咪有資格講咁多或代表泛民呢?

依家嘅泛民,將會進入「傳統民主派」同「進步民主派」嘅路線選擇,傳統民主派必然,將九西敗選問題放在進步民主派策略失誤,甚至追究初選後嘅事,藉此取回一定話語權,甚至採取保守政策,呢個矛盾係佢地將要面對。

而改變或變革,一定會流失支持者,利益受損嘅派系,未必願大局為重。而既有利益者,佢地願唔願意放棄部份利益?而係選舉為主嘅政治取向,佢地有無咁魄力,同勇氣,無視選民流失嘅危機,去處理咁多問題?簡單啲講,為左對抗赤化,佢地願唔願意「妥協」?

寫到依到,就算局內人睇到,應該會失笑,因爲要泛民處理到,以上咁多問題,真係太天真,太理性嘅想法,係架,但由一個局外人講呢啲,唔係一種可悲,可笑咩?

老實講,改唔改係你地班大佬嘅選擇,改好改壞,對我無得益,對本土未必有益,但依家想你改嘅,係一大班支持者,遊離份子,溫和支持者,但無人代表佢地,係各個政黨,各大領袖,各位尊貴嘅議員到講。

點解投泛民,係要含淚?呢樣嘢,無任何代表人物肯解畫。

我以前提醒過,想以本土為名,去面對未來政治嘅後生,無論你做到咩位,擔當咩角色,都唔好忘記,你首先係一個人,無人支持,離地萬丈,你咩都唔係。

依個提醒,我想俾泛民上下,連埋班所謂KOL知。