左膠轉軚 戰號初響 香港反而得益

今期《經濟學人》頭版新聞,討論咗習近平廢除任期一事。文章標題係《How the West got China wrong》,承認咗自克林頓時代嘅對華政策破產。所謂嘅「克林頓主義」認為,只要幫助中國發展,令到該地出現中產階級之後,中產自然會追求權力,最終迫使中共轉型。依個講法,喺我哋港人認知嘅左膠主義之中,重要嘅理論基石。因為如果唔相信時間企係我哋果邊,向極權讓步只會令極權更加放肆。過去幾年,《經濟學人》喺左膠之中,最大聲擁護克林頓嘅主要傳媒。對我哋最直接嘅影響,就係深黃被歸類成極右立場,處於文明世界之外。所以今次轉軚,變相承認我哋講咗幾年嘅理論,並非妄想。所以,意義並不尋常。

在文章之中,《經濟學人》承認克林頓主義不但冇做到效果,反而培養咗一個敢於挑戰普世價值嘅專制機器,企圖取代美國嘅價值論述(就係北京式集權令經濟發展更快,比民主制度優勝)。而且,《經濟學人》由認為侵侵對華立場太硬,轉軚變成認為侵侵要竭制中國。換句話講,《經濟學人》已經代表左膠,贊成改變對華政策。對華強硬,將會成為英美嘅兩派共識。民主政制,一旦出現兩派共識,只怕轉變快到專制體制完全跟唔上。未來幾個月,中國外交狀況,將會面臨重大轉變。

今日港股繼續下跌,因素好多。但係中國外交情況漸趨嚴峻,應係主因之一。站係深黃立場,最直接嘅反應係「都話咗你班淺藍架啦」。比較長遠,就係要考慮點樣係大國關係風起雲湧之際,儘量改善香港嘅處境。風水師經常講香港出年轉運,或者今日見到嘅,就係The Beginning of the End。