《黑暗對峙》其實講咗一句:仲幻想和平?打啦!

※內文含有劇透,敬請讀者留意。

仲上緊畫嘅《黑暗對峙》講二戰之初,邱吉爾就任戰時首相之後第一次執政危機。當時德軍經已由荷蘭同比利時攻入法國,法國危在旦夕。當時外相哈利法斯子爵主張同希特拉和談,希望以承認納粹喺全歐洲嘅霸權,換取英國嘅和平。當時保守黨仍極度尊重邱吉爾嘅前任張伯倫,邱吉爾相位未穩,因此哈利法斯認為可以向邱吉爾迫宮,使之就範。

故事取材於1940年5月內閣危機,大致屬於史實。而且部份對白來自各相關人仕嘅回憶錄同埋政府解禁文件,真實度頗高。面對強敵壓境,到底是和是戰,就係本片嘅主旨。

喺大部份時候,綏靖主義因為避免流血,所以係主流思想。邱吉爾花咗十年講唔可以放縱希特拉,結果係俾人睇成機會主義者。就算敵人打到屋企門口,仍然有人覺得可以犠牲法國,就可以滿足希特拉,從而保全英國嘅命脈。

但係向強權屈膝,真係可以換取和平咩?邱吉爾嘅前任張伯倫,就係花咗十年綏靖,結果將希特拉愈養愈大。電影裏面,邱吉爾亦講,假如當時同德國和談,德國好可能會要求英國裁減軍備,甚至讓出各地海軍基地,只會令德國係陸軍以外,攞到海軍實權,進一步向世界出發。

其實邱吉爾亦唔係完全反對和談,但係佢認為只能夠係英軍係戰場攞到成果,證明英國可以保衛自己之後,先可以係平等地位同德國談判。當然後來發展就係德軍一開始輸,就愈輸愈快,最終以亡國收場,並冇出現邱吉爾口中嘅平等談判。

另外,其實綏靖派並非賣國賊。張伯倫喺戲中就轉軚支持邱吉爾,而哈利法斯之後亦成為駐美大使,成為美英政府之間嘅橋樑,並且數次直接向美國民眾宣傳英國立場,幫美國總統羅福斯推行戰時體制,功勞不少。哈利法斯係幾代貴族,高大靚仔,時人評價為「擁有樞機主教氣質」。叫佢帶隊打仗,必定失敗,但係將佢送到美國,等佢運用人氣宣傳,就綏靖派都可以立下戰功。所以,路線之別並非永恒,反而知人善任,將人才放到合適地方,先係團結之方。

電影最後,亦打出邱吉爾名句:
Success is not final, 成功並非最後
Failure is not fatal; 失敗亦非致命
It is the courage to continue that counts. 繼續戰鬥嘅勇氣先最重要

近年幾套二戰電影,唔再聚焦大砲飛機,轉為描寫人心,反而有更多地方俾我哋借鑑。