《銀河英雄傳說》有一場帝國內戰,代表新興勢力嘅主角羅嚴克拉姆,大戰早已腐化、失去民心嘅舊皇朝貴族。小說裏面有兩個具體例子,說明舊貴族嘅腐化。

第一次,貴族副盟主立典亥姆侯爵艦隊戰敗之後,向己方要塞逃走。沿途俾自己嘅補給艦隊擋路,佢竟然命令向補給艦隊開火,打開航道逃走。佢逃走入要塞之後,受夠嘅部下叛變,將副盟主連同司令室一齊引爆。侯爵一死,貴族軍就失去三分之一嘅實力。

第二次,內戰末期,貴族盟主布朗胥伯克公爵直屬領地威斯塔朗特行星發生叛亂,叛民將公爵侄仔殺死。布朗胥伯克大怒下,發動核攻擊屠殺哂威斯塔朗特嘅平民。依次屠殺,書中稱為「威斯塔朗特事件」,令舊貴族失去最後僅餘嘅一點民心。決定屠殺之時,布朗胥伯克嘅參謀長安森巴哈就講咗一句:「高登巴姆皇朝要滅亡喇,砍斷自己手腳嘅人,又點可以企得起身?」

布朗胥伯克同立典亥姆,係舊貴族之中最大兩個門閥,分別迎娶帝國皇帝嘅兩個孫女。因為太子早死,兩個孫女有權繼承帝位,所以依兩個貴族就係皇夫候選人,係舊世界已經係頂尖人物。佢地嘅殘暴行為,證明咗成個貴族階層已經腐朽。

貴族聯合軍嘅司令官梅爾卡茲係能幹嘅職業軍人,就認為布朗胥伯克實際上係一個病人:「這種病情的根源已經存在多時,那就是長達五百年的貴族特權道統,五百年來所有的貴族都患有這一種病。公爵也是這道統之下的受害者,如果他在一百年前這麼做的話,或者會很成功,但是現下……我就不敢說了。唉﹗從某方面來說,他其實也是一個很可憐的人。」
喺小說裏面,特權需要五百年時間,先將貴族侵蝕成病患,對自己嘅民眾麻木不仁。但係現實之中,似乎特權發酵,只需要幾十年,就發生大規模拋棄自己國民嘅事件。加埋其他林林總總嘅還原四合院、硬性停煤、全巿拆招牌等事件,更加令人相信所謂單一事件背後,有一整套嘅計劃。正因為事件係首都發生,更證明依種不顧人民嘅心態,已經侵蝕到極高層。

或者,將來歷史回顧,會將北方政權,比喻為早衰症。的確,他們在過去三十年完成咗外國歷時一二百年嘅工業革命。但係政府、社會、人口結構,亦都係一兩代之內就出現老化。由極盛到極衰,事情發展速度可能遠比我哋幻想要快。