作為一個生於香港,長於香港,現年二十有一嘅一個廢青,本人一早已經視香港為我世界嘅中心。可惜嘅係,近年嘅香港,已經實在太過古怪,怪得誇張。

當然,一個社會之所以愈變愈怪,往往係有好多原因。

傳媒失智。所謂嘅民主大報,經常抹黑到咗今日都仲肯上街嘅義士,偏頗支共以至港共嘅政策,選擇性報導不同重大事項從而扭曲民意,完全失去一間傳媒機構應有嘅中立以及道德;自稱為香港人發聲嘅傳媒,多次使用支國語彙,例如「大媽」、「小三」、「春節」。明明本來都有一樣意思嘅本土字詞使用,但係佢哋偏偏視若無睹,依然盲目跟蹤潮流,漠視香港文化。更令人憤慨嘅係,佢哋明明係一份支持民主,捍衛自由嘅報章,但係就多番批評同打擊稱得上係「近路人」嘅本土派,正宗嘅表裡不一。

政府荒謬。近年香港政府有數之不盡嘅事故稱得上係荒謬至極。香港政府取消6個議員嘅資格,總共被人DQ185,727票;立法會粗暴修改議事規則;想係香港中心地帶插旗嘅一哋兩檢;影響香港市民身體健康嘅鉛水事件;青年被指塗鴉唔認罪,警察拘捕家人迫其認罪;周浩鼎交UGL文件疑被特首辦修改;意圖打壓網絡自由嘅「網絡廿三條」;早已判刑並完成社會服務令,但因上訴而被迫入獄嘅公民廣場案。以上只算係恒河沙數嘅小數,但就足以引證依個政府有幾荒謬。

最後一點,同時亦係令到世界變得咁誇張嘅最重要因素,我哋只需照照塊鏡。《V煞》套戲講得好啱,政府知道我哋點解咁做,佢知道我哋會驚。戰爭、恐怖事件、疾病。依D事情就好似雜草嘅種子,用來摧毀我哋的理智,奪走我哋嘅常識,恐懼控制咗我哋。政府向我哋許諾秩序,向我哋許諾和平,向我哋許諾有錢搵,佢哋所要求的不過係我哋嘅服從以及沈默(以上內容係引用自V煞)。上一段嘅文章所言,本應可以令到政府得到教訓,高官因此下台。但係結果呢?冇啊。佢哋依然Un Un腳收緊人工。因為一方面傳媒幫佢哋分散注意力,扭曲事情真想,一方面佢哋睇死香港人只顧搵錢,只顧睇大台劇,只顧邊到有好嘢食,只顧睇邊個男明星搞大咗邊個女明星個肚未。

我並唔係希望香港人會好似《V煞》個V咁劍走偏鋒,而係希望香港人知道咩叫「沉默就被人當契弟」。當有野唔合理時會唔再沉默,傳媒有野出錯時會高聲指出,政府有荒謬事時會出嚟抗爭。一個社會,一個世界本來就應該係咁樣。