上次寫文,講過文學訓練係美國精英訓練嘅根本。但係除咗精英班之外,其實美國所有高中生都要讀英語文學。精英班同普通班嘅分別,係精英班每年睇多幾本書。例如同一級,精英班係每年十二本;普通班每年八本;輔導班每年六本。較慢課程,自然壓力變細,未必可以訓練到學生大量處理資訊嘅能力。但係通過文學班,學校實際上係推行緊國情教育,通過幾百年先賢嘅著作,向學生教授民族價值。

被採納成課本嘅著作,計有幾百本。但係一般選材都會有幾個類別。最精英嘅高中學生,都會選擇考Advanced Placement嘅公開試,理論上係高中階段就開始係自己擅長嘅科目讀大學程度嘅學科。其中AP Literature要求學校選擇課本時候,包括以下五個類別:

1: 沙士比亞及其他古名著
2: 歷史、哲學、其他文學名著
3: 二十世紀現代名著
4: 詩篇
5: 劇作

因為歐美世界,雖有革命,卻並未拋棄傳統文化,故此幾百年來寫嘅名著,係今日都係民族觀念嘅一部份。沙士比亞寫嘅《馬克白》同《凱撒大帝》,裏面嘅野心家就係一個例證,點解寧願要個爭爭吵吵又冇效率嘅政府,都唔相信獨裁者。現代名著,例如《梅岡城故事》或《變形記》,幫助學生透過受害人嘅立場,瞭解種族主義同埋精神病患,係奧巴馬果類溫和左膠嘅思想源頭。因此,美國高中唔需要升旗禮或愛國科目,學生自然會瞭解民族觀念。

假如要係香港設立文學科,做成類似效果,其實單係釐定書單就好困難。華夏文明不乏古文著,唐詩宋詞亦可以做詩篇類嘅例子。但係依類華夏著作,宣揚嘅係古華夏文化,而唔係解釋點解繼承華夏,就要臣服北京。境外日韓等民族,接受華夏文化而唔接受北京領導,就係最好例子。研究漢學,反而日本方面嘅研究最有認受性,就證明華夏文化並非北京所專有。

要歌訟社會主義優越性,難度更大。華夏社會嘅二十世紀現代名著,無論係民初一輩先賢,定係六七十年代嘅港台作家,追求嘅都係自由、科學等現代概念。偶有稱讚社會主義,亦鮮有歌訟現實例子。因此,以文學培養華夏民族認同唔難,但要培養北向認同感,就唔輕易。

北京政權成立咗快七十年,以文藝進行政治宣傳從未停過,但係仍然未有感動人心而又正面宣傳政權嘅名著。以前用權力,將劇作規定成八套樣版戲,今日大灑金錢,拍成幾套《建X偉業》,都反映出佢地掌控咗社會一切資源之後,反而喪失咗文藝話語權。所以其他國家可以用文學科培養愛國情緒,唯獨北方政權,就只能以暴力洗腦。