淺黃成日講共產黨點勁點奸,我哋一眾素人根本唔係對手。毛鄧果輩,經歷過戰爭政爭,謀略的確厲害。但係而家當權依一輩,靠八千萬黨員治國,好難有八千萬個毛澤東,所以落實政策,永遠唔係一等人才。尤其係香港,就算臣服於北京嘅淺藍,只要稍有個人意志(例如三位JT),都會被逆淘汰。結果香港當政嘅都係二三流人才,經常犯下常識錯誤。
加泰搞獨立運動,雖然有一定借鑑之處,但係現時社會氛圍,本來好難有大規模討論,最多係一群真心想獨立嘅小朋友,係論壇吹下水。但係對家落咗命令,要將加獨鬥臭,結果係加獨係過去一個月,每一步都係論壇討論,變成play by play嘅實時討論。

獨立運動,最需要就係講。成唔成事、幾時成事、點樣成事,往往係幾年甚至幾十年後,世局轉變之時先會有機會。但係當天時地利未至嘅時候,最緊要係保持討論,令社會長期記得有依個可能。

有反港獨人仕,將港獨叫成「講獨」,懶好笑以為可以呃like。但係實際上,直至攤牌之前,講獨就係推進獨立最好嘅方法。依樣係基於好簡單嘅邏輯。要搞獨立運動,就先要證明想獨立嘅一群已經形成新嘅命運共同體。社會上有廣泛討論,其實已經實際證明依個命運共同體實際存在。

命運共同體係好虛無嘅概念,到最後只係一個「你願唔願意捍衛依群人?」嘅問題。經常講、不停講、重覆講,無論論點係正係反,都只會更加感覺到命運共同體嘅張力,令人更加容易相信。

尤其香港十年前仲係以身為中國人為榮。兩年前港獨先成為政治議題,其實最怕嘅反而係依一屆政府冷處理,令人覺得港獨真係上一手製造出來。依家仍然可以每日講,係現實情況之下,其實已經贏哂。每講一次,港中之間嘅鴻溝就愈大。

以前狗仔隊盛行,有時候明星會特登俾人影到花邊新聞來博上報。「All News Is Good News」係公關界嘅黑暗兵法,只要有人繼續講,係社會保持知名度,總有方法將知名度變成機會。當急獨幾近不可能,要保持隊形就真係要靠對方提供嘅「豬隊友」。