最近加泰尼亞一連串事件,當西班牙政府張牙舞爪,恐嚇取消加泰尼亞自治區政制,又將加泰警察總長捉上法庭,論壇上面出現一堆奇怪嘅講法,笑港獨份子跟車太貼。一時之間,又真係好似控制咗輿論,一眾網民都怕冇面而收聲。

其實,任何長期計劃,都一定係不停失敗,到最後先會成功。喺屋企唔見咗個電話,都係不停搵錯地方,直至最後先會搵到。而且搵到之後,就唔會再搵電話。假如成個過程搵咗十個地方,必定係有九次搵錯地方,然後一次搵啱。所以,任何一個地方係啱嘅機會率,只係有10%。但係我哋都唔會因為每搵一個地方只有10%成功率,就會唔搵係屋企跌咗嘅電話,由佢唔見咗算數。

加泰最後能否獨立,無人知道。但係就算最後成功獨立,都只係會有一次「獨立紀念日」。之前所有同西班牙政府嘅互動、兩派鬥快動員民眾、甚至更惡化嘅情況,實時經歷都可以睇成「獨立唔成」。就算依一波運動只歷時半年,中間都會有廿六個星期獨派跟車太貼。

假如演變成幾年嘅抗爭,就更加會跟車太貼幾百次。但係將來睇番,其實幾年時間過得好快。讀歷史會講慈禧一死,清廷已經病入膏肓,隨時滅亡。但係宣統朝有三年,如果實時經歷,都要經歷無數次失望。三十年後睇番,到底雨革係香港重生嘅起點,定係香港滅族嘅喪鐘,其實大家都唔知道。但係無論結果係點,將來都必定有好多反覆,就算買贏左,都會出現無限次嘅短期跟車太貼。因為怕跟車太貼而放棄,其實先係最笨。

強國人缺乏獨立思考,一旦鼓動佢地,就會一窩蜂湧去同一地方。佢地人數眾多,將人地嘅資源收購搶盡,形成我哋熟識嘅蝗蟲效應。某本旅遊書介紹台北某間雞扒店,佢地就會只去果一間雞排店排隊,而唔會行下成個夜巿,發掘其他嘅炸雞排。當日搶奶粉,其實都係搶左幾隻熱門牌子,而冇考慮其他牌子。極權政府係華夏社會一次又一次生根,其實就係因為強求和諧,就令華夏人好似旅鼠咁樣,只要同伴一齊跑,根本就唔會考慮條路行得啱唔啱。

害怕「跟車太貼」,其實都係同一個心態。如果真係會獨立思考,有自己嘅立場嘅話,其實係冇「跟車太貼」。柒咗,未認次衰,等待下一個變化。所以到最後,民族熱情都必需帶有一絲非理性,先會頂得順未成功之前嘅無數次柒。筆者一代嘅中女,都會記得黎明電話廣告裏面嘅幾句對白。

Lee Ann: 我係未好任性呀?
黎明:係,不過係我揀嘅。
下次有人再笑「跟車太貼」,一句「係,不過係我揀嘅。」已經係最有力嘅回答。