上一篇嘅《獨立,本身就是推倒重來的事》,講嘅內在,純粹關於香港嘅嘢,有網友講大國承認,其實講起依樣嘢,我一直都幾避而不談,因為我經常講「獨派要做外交」,但某程度依個係「後路」,多於一種方法,因為歐美或民主世界或者會容許獨立聲音,但對於實際獨立,佢哋會非常審慎。

我們可以由庫爾德民族,到加泰民族,甚至台灣人追求正名獨立,我地唔難見到世界各國都係「反對」,包括所謂民主大國,無論理據幾充足,道理幾足夠,依家嘅世界已經唔容許輕易獨立,應該講會影響世界秩序嘅獨立。記得有人講反加泰獨立,就係講加泰獨立,會影響西班牙政經問題,令歐盟要分心處理,會導致中俄會得益,所以加泰獨立係一件自私嘅事。而庫爾德獨立會影響中東局勢,令本身火藥庫再加上火頭。藏疆台港就更影響中国,直接影響整個環球局勢,係全球化嘅今日,牽一髮動全身,對於所有大國黎講,依家經濟咁嘅狀況,地緣政治及利益爭奪,令佢地實在唔想再發生太多嘢。

記得寫川普嘅外交個陣,我講過一樣嘢:「如果對美國有益,將台灣或香港當成籌碼點解唔得?」如果全世界或大國之間覺得要保持現今嘅世界秩序嘅話,出賣同打壓追求獨立嘅國家又點解唔得呢?特別今次是發生在歐盟成員國,本身歐盟在我眼中就係一個矛盾嘅存在,看似民主自由,但佢地最終目標是建立「歐羅巴合眾國」取消現在國界,正式將歐洲一體化,佢地會容許再多一個國家誕生嗎?甚至講緊成認同「民族立國」,由一戰後歐美共同打開民族立國嘅幽靈後,已經令世界秩序不斷改變,現在歐盟就係面對「加泰獨立」,係損害歐盟嘅目標,如果需要嘅話,要明白1930年代到二戰爆發,為咗令納粹德國停手,捷克同奧地利,唔係因此俾西方國家出賣,任由納粹德國吞併嗎?

正正依個諗法,就係我擔心西班牙會以強硬手法去解決加泰問題,君不見英國當年派SAS入北愛嗎?加上梵蒂岡同歐盟,雖然呼籲對話但始終係明確反對加泰獨立,就算西班牙真係武力鎮壓,歐盟真係會制裁西班牙嗎?更加唔洗講中俄,依啲大中華、同蘇聯式大國思想,更不用講川普呢啲唯利是圖,各國也不會支持加泰下,西班牙除非屠殺加泰人,否則只要不見血,我諗加泰嘅獨立,我唔會唔樂觀。

我一直對有啲人講「認為獨派要緊貼民眾,同改變獨立意向去爭取支持」我係不以為然,我唔係話咁諗或咁做係錯,只係依啲唔係重點,因為係香港追求獨立,本身就係違背「香港價值」,除非放棄獨立,否則眼下九成香港人都唔會支持獨派。所以我成日講:「獨派可以係本土派,本土派未必係獨派」,如果想用一般社會嘅方法,民主手段,議會方向去爭取大眾支持,應該做一個本土派,唔洗要求獨派做本土派嘅工作,咁樣只係互相拖累。

因為獨派,或者爭取獨立,當你一講咗就無得返轉頭。「香港獨立」唔單止講緊解殖脫中,更重要係意味住否定現在嘅世界秩序,依個秩序係包括中国同一眾世界大國,就算依啲大國日日都勾心鬥角、利益衝突日深、但佢地依然有共識,同盡量係可控範圍咁爭,所有只要一個地方嘅獨立,就會影響全球情況,大國間就會有默契咁收聲同唔做多餘表態,避免局勢一發不可收拾。

除非好似前南斯拉夫各國,各民族間嘅仇恨、宗教衝突已經達到你死我活,屠殺事件此起彼落,佢地獨立會較合為一國更佳,否則各國都唔會咁易鬆口支持同容許。所以獨派做外交,對乜國家就要講乜理據,對歐美講「民主自由」,對前殖民國家講「被中共殖民」,對周邊各國同中共受壓迫國講,「港中根本不相同」,就算得不到當地政權接納和支持,也一定要令當地人民了解,咁樣日後有咩突變和破局,香港先有可以掌握機會。

本身追求獨立係難事,係香港追求獨立,更加係難上加難,因為外在嘅限制好大,但問題係香港好多內在問題,係中国不容許港人自主,也不容許香港人擁有民主,確保港共政權必定由中共指派,同時加強清洗同赤化香港,我哋已經係「獨立」同「屈服」嘅二選一局面。

其實妄想中共會突然理性、突然變好、容許香港自治或放權俾香港,其實同追求獨立一樣咁難。