最近網劇《反黑》喺Youtube首播,雖然警匪片唔係筆者杯茶,我都趁星期一唔駛番工,睇咗幾集。無疑,劇集對白寫得比較生硬,可能係先寫漢語對白,再將漢語譯成粵語,所以會講「我見到你盞丟人現眼」,而唔係更貼近粵語嘅「我冇臉見你」或者「我見到你咪盞羞家」。而且故事發生喺八九十年代,部份實景卻有現代物件如LED燈箱,變成穿崩鏡頭。但係出現一套唔再跟大台公式嘅粵語劇集,而且主要演員都係熟悉面孔,點計都係好事。

再者,本劇導演係後生仔,佢嘅執導能力可望繼續進步。加上演員誠意搭夠,熟悉嘅老一輩香港演員之外,一眾後生演員都係香港人(除咗一個肯學講廣東話嘅陳雅婷),其實單係站係支持香港新一代嘅角度,都應該支持一下。粵語演藝界無論編、導、演都缺乏新一代,係一個長期問題。難得有資金支持,點都應該回應一下,幫助人才發展。

最近加泰尼亞搞獨立公投,無論係港、台、歐美嘅評論,只要列出加泰獨立嘅理據,都離唔開加泰有獨立歷史、加泰尼亞有自己嘅語言、同埋加泰地區同馬德里嘅財政爭端。所以擁有獨立語言,係強而有力嘅民族凝聚力量。任何幫助發展語言嘅機會都唔應該放過。

《反黑》資金來自北方。金主出資原因,尚未可知。當中可能係純粹見香港近幾年電影業略見起色,想加入巿場,分一杯羹。或者可能因為深圳河以北創作空間近幾年再度收窄,金主只能夠係香港製作,再出口轉內銷以避開制度限制;又可能係要統戰香港,以劇集滲透外來觀念;無論係上述邊個情況,有人願意製造新嘅粵語作品,都理應支持。

假如對方係為咗賺香港人嘅錢,自然需要融入香港巿場,滿足我哋嘅需求。假如誘因係為咗統戰,拍多幾套大家都知道係咩野一回事,效果自然降低。假如係為咗出口變內銷,更可能形成一波投資,再次發展香港演藝業。

近年外資進港,亦唔單止只有中資。美資大台Fox,亦已開拍兩部電視劇,包括葉念琛執導嘅《心冤》同劉德華監製、《選戰》總導演執導嘅《香港華爾街》。假如發展成港、中、美三家混戰,對培訓人才,提升行業水平都會係好事。有咗人才,加上依幾年嘅集體經歷,慢慢化成作品,將來粵語嘅發展空間就會更闊。