今日嚟同各位同道中人講吓我心目中作者係咩一回事?

但係講之前,先由我點謂會有依個諗法講起。我最近發現一個有趣嘅現象,就係屌讀者(或者作者們會覺得自己係屌緊hater)。

咩都好,簡單講就係,我哋都好容易發現一個作者,好鍾意就住一兩個無理批評你嘅留言cap圖開post還拖。

好似不吐不快咁。依個絕對唔係單一作者嘅問題,而係現今網絡世界上嘅作者都難免嘅通病。

一、兩個hater嘅留言,明明完全無意義,但作者往往最在意嗰啲。有幾多人鐘意自己,讚好自己,你幾可會見有作者每日都出一個post出黎多謝話「今日有一個人讚好我啦!」。

但只要有一個批評(有理無理都好),作者都好似被針拮親咁,覺得自己非得出一個post大肆話俾人知自己還擊先得。

講咗咁多,係咪就係話做得作者預咗俾人屌,預到無理嘅留言,作者唔可以出聲呢?

依個就要講番「作者究竟係咩一回事」。

點解咁多作者會「忍唔到手覺得要回應」,因為佢哋心中,作者係主導嘅角色,即係「而家我寫啲嘢,分享俾你睇!」

我啊!我喎!寫嘢啊!寫嘢喎!俾你睇啊!俾你睇喎!幾巴乜閉,我將一啲你唔識嘅嘢,你唔知嘅嘢,寫俾你知,俾啲新嘢你。

我當然將個心態誇張咗幾倍,但底裡其實就係咁。包括咗高度自信同睇唔起讀者。用流行嘅講法就係「把自己看得那麼高!」,所以先會覺得被批評,被討厭係一件天大的事。

我知道一定有作者會質詢我:「唔係咩?作者唔係寫啲讀者唔知/唔識嘅嘢,帶俾讀者新嘅睇法,新嘅意見咩?咁我地的確係主動嘅角色喎?」

錯唔晒,做依件事的確係作者一部份嘅工作。但唔係我眼中「作者」本質之全部。

講咁耐,咁我係點定義作者架呢?

「作者,係寫一啲自己嘅嘢出黎,俾讀者去批評你。」依個先係作者嘅全部。

寫作包括咗編碼同解碼,而家網上好多作者只記得自己係編碼,卻忘記咗讀者解碼嘅動作,都係作品嘅一部份。

如果無咗「讀者解碼」依一環,篇文寫得再好都只係日記。

而家好多作者都越權,唔單止做編碼,仲想做埋解碼嘅角色。如果係嘅,咁要讀者做咩?

你點寫係你嘅事,讀者點解讀係讀者嘅事。

唔認同?舉一個例子你就認同。

月餅彼岸花事件,斷估個間廣告公司本身編碼嘅時候都唔係想帶出死人嘅意味掛?咁如果解碼嘅作者真係有絕對嘅主控權的話,咁即係你哋全部都錯,佢點
講都得啦?佢先係作者,佢話無咁嘅意味就無咁嘅意味?

而家你又諗番,作者走去屌鳩讀者嘅批評,兩者有咩唔同?

你會話唔係喎!我有道理佢無道理,喔!你寫嘢嘅時候就係你有道理讀者無道理,你睇嘢嘅時候就話寫個個係白痴,你自己係天才。企係邊都覺得自己啱,覺得自己就係道理,人哋就係無理,依啲仲唔係自大?

咁係咪讀者屌鳩你,讀者就有理呢?係!但你要記住你唔係得一個讀者嘛!如果你有一萬個讀者支持你,入面有一個人屌鳩你,咁嗰一個人係有理定無理,係批評定辱罵,你咁上心做咩姐?佢都只係佢個人嘅解讀,唔通你篇文攞去精神病院俾啲病人睇完,你仲要逐個去出post屌鳩番晒佢地?

眾多讀者加埋自有公論,你係作者,你唔負責解碼,做好你編碼嘅工作。

你有冇見過金庸,曹雪芹會出聲同一個罵佢嘅讀者罵戰?甚至紅學、金學可以當係一門學科俾人去評論去做研究,自然有好多嘅批評,無論有理無理,佢地一於「唔理」!

攞cap圖出post嘅時間寫好自己嘅文,如果多人支持你嘅,咪就係對依啲批評最好嘅反擊囉!如果唔係就算俾你罵戰呃到like,但支持你嘅讀者無多到嘅,咁又有何意義呢?