上一篇文章《海洋文明嘅傲氣:無需爭正統,無需搞朋黨》係宏觀分析,講海洋文明嘅團體應該如何行動。但係更進一步,要傳承海洋文明,要由每一個人做起。

長期航行,冗員同奴才都係生存唔倒。航海嘅食水食物都靠在岸補給,一出到大海,資源極之珍貴。而且每帶多一公斤嘅食水,就要運少一公斤嘅貨物,每多帶一個人,都會加重成本。所以唔能夠發揮作用嘅人,話知你係船東個侄,船長都唔會俾你上船。所以世上只有黃馬掛,而冇黃水手服。

而且,航海變數極多,每一個軍官都要有獨立行動嘅能力。一個颱風,隨時會將船隊吹散。到時每一隻船嘅船長,都要有能力係失去提督之後,仍然有能力將船開到下一個港口,再嘗試搵番原屬艦隊。正因如此,提督亦唔會將艦隻指揮權,交俾只會拍馬屁嘅奴才,否則失去聯絡,奴才要獨當一面嘅時候,分分鐘連隻船都唔見埋,到時一要問責,提督亦難辭其咨。

依個哲學,係其他軍官身上亦同樣有理。一個大浪,一場大病,船長都可能會死。到時候,距離本國幾千里,唔可能等到新任命,所以副官會自動補上。所以奴才亦做唔到第二甚至第三梯隊成員,因為局勢一變,依班下級就會成為代理船長。香港政府有完善制度,官員一離境,就自動由下級代理,例如政務司每年署任幾次「署理行政長官」,就係海權宗主國遺留落黎嘅遺風。所以一旦收到任命,成為海軍或商船官員,就要有心理準備,隨時會接任成船長。由海事學院畢業第一日,就唔可以主動做奴才,上級睇唔起之餘,自己亦冇可能培養到真正知識。

另外,船上面各司其職。職系唔同,唔代表貢獻唔大。軍官畢竟只佔少數,不可能事事過問,所以必需有士官代為管理操作實務。代表船員嘅士官長,係船上地位排第二,僅次於船長,就係尊重船員嘅專業。係現代社會,海洋文明嘅國家,將首席秘書任命為「辦公室經理」,甚至「營運總監」,係高層會議都可以列席參與,就係尊重後勤職系嘅表現。依樣同某個大陸文明體系,將秘書視為奴婢,要求對方經常處理自己私務,甚至將秘書收做情婦,完全係兩回事。

同樣道理,護士面對醫生,空姐面對機長,都尊重對方係現場指揮官,但係醫生機長,亦尊重護士空姐屬於其他職系,有咩野事都會經護士長或艙務長處理。依種同其他職系平行合作嘅態度,就係海洋文明嘅表現。

因為航海嘅營利關鍵,係以最少嘅人,運最多嘅貨,所以海洋文明重視人才,最初只係生存所必需。但係生存壓力,總會慢慢影響文化,變成民族價值觀。唔准妄議中央,必須順從上級,演變到中下級以奶上級以求上位,完全係大陸文明嘅思考方法。香港先係海港,繼而成為商埠,再演變成金融中心,對朝拜君王無動於衷,其實先係常事。