以諷刺手法評論政治,由來已久。張堅庭早年嘅電影,黃子華嘅金句,《100毛》嘅改圖,甚至係網上網下嘅政治漫畫,都係政治諷刺嘅一部份。諷刺文章,有時候批評政府,有時候討論民情,係凝聚民意,建立共識嘅一部份。

早年英國國會辯論並非公開,傳媒無權直接報導國會言論。於是傳媒就派記者旁聽會議,然後將言論改頭換臉,變成父子之間或者夫婦之間嘅爭論刊出。到政治人物開始用傳媒放風,傳媒又唔想直接刊登政壇耳語,亦係將政壇耳語化成故事刊登,加上約定俗成嘅人物設定,讀者可以自行將人物同事情連結,慢慢就演變成英美政治文化。香港嘅政治漫畫,甚至互聯網所造就嘅抽手文化,都係來自依一個傳統。

當然,我明白政治現實異常殘酷。有志「為香港做野」嘅同道,政治敏感度都會比較高,好可能係感覺到果種政治壓迫嘅窒息感,先會義憤填胸,繼而有動機去做野。所以對我哋而言,最好每篇文章都邏輯無瑕,可以奉為經典。假如流露感情,則要將敵人鬧到狗血淋頭,最好以粗口加詛咒令敵人死後入地獄。所以其他人就算立論接近,一旦文筆輕鬆,都會被解讀為輕挑。

但係港豬之所以係港豬,有時候唔係唔肯醒,而係佢地真係政治敏感度比較低,感受唔到我哋經歷緊嘅壓迫感。對於佢地,譁諷手法反而更為入耳。同佢地講《零八憲章》被和諧,佢地未必明白事情嘅嚴重性,但係小熊維尼變成敏感詞,佢地就明白政權有幾瘋狂。

善於統戰者,更深明議論文並非凝聚民意之法。觸發文化大革命嘅導火線,係一套京劇,而非一篇議論文,就係最好例子。所以係未來幾百日,貢獻最大嘅,未必係論述層面再鑽牛⻆尖。反而將論述連接入地,化為小朋友都明白嘅例子,長遠更為有用。Reddit近年就將依個心態,簡稱做ELI5 :Explain Like I am 5。而諷刺、笑話、各式抽水方法,都可以好有效。