上個星期日台灣高雄舉行《英雄聯盟》亞洲區對抗賽現場觀眾冷待中國隊伍,同熱烈歡迎台灣同埋韓國隊伍形成好大對比。決賽係中國同韓國隊伍爭冠,現場反應係一面倒咁支持韓國,甚至當中國隊贏得冠軍之後,觀眾就即時離開。後面嘅頒奬禮現場記者多過觀眾,主持叫台下拍手嘅時候,一片靜寂,連主持自己都一臉尷尬。

事後深圳河以北發動傳媒攻勢,話依次事件證明北京對台讓利政策徹底失效,應該用經濟方式將台灣變窮,迫使台灣統一。一時之間,台陸兩地年青人互相叫罵,成為周子瑜事件之後,又一次台陸網上衝突。

當然,自從幾次旺角球場噓《義勇軍進行曲》之後,冷漠對待強國隊伍係香港慣例只可以算係「愛與和平」式嘅左膠反應。近年香港同深圳舉辦足球比賽,警方都煞有介事咁將兩地球迷分開,其實並非過慮。嚟緊8月初香港係紅館有一場國際級電競大賽,又睇下主辦機構打算點解管理秩序。

台獨港獨,都係過去幾年出現天然獨世代,先至將成個論述反轉。睇番台灣,當日陳水扁係憲制層面嘅最大動作只係終止《國家統一綱領》。就邏輯來講,廢除國統綱領只係話台灣政府唔再花資源去反攻大陸,並唔係爭取獨立。但係佢依個舉動,就俾人鬧係明獨同急獨。可見當日台灣民情,其實係類似香港淺黃嘅民主中國論,大家都係反共不反華,認為只要中國民主化,三地統一就會水到渠成。所以話香港淺黃(尤其係支聯會)實際信奉嘅係「沒有蔣介石的蔣公主義」,係有理論根據。

到左天然獨世代成年之後,將中港台之間嘅群體差別帶到社會,先至令社會驚覺,三地年青人已經唔再視對方為同胞,而係爭奪實際資源嘅競爭對手。旺⻆場嘅噓歌同高雄電競嘅漠視都係反映依個心態。
近年台港年青人之間互動頻繁,嚇到北方要出言阻止兩地議員交流。不過雖然恥笑北京時候,香港人間中會提及《南京條約》正本係台北,但係歸台派卻未成氣候。實情就係台港年青人其實都未必再當對方係同胞,反而係視對方為類似二戰時候嘅英美同盟,既有歷史淵源,亦有共同強敵,因而自然結盟。係現代例子,台港關係則有如加、澳、紐嘅關係,承認彼此嘅歷史源頭一致,但都只係互相尊重嘅友邦關係。身份認同發展至此,已經唔再係台陸或港陸矛盾咁單一,而係台港兩地年青人,身份認同已經漸漸成型。