唔講唔知,原來荃灣有成四個街市咁多!作為荃灣友平時都幫襯街市唔少,偏偏街市又逼又濕,有時都唔係好想去。大家覺得荃灣四間街市,邊間最好,邊間最差?柳臣假假地係荃灣住咗幾十年,今日就同各間荃灣街市評出高下!

【荃灣街市】
第一個講既,梗係早前裝修到成間幼稚園咁,成為一時笑話既荃灣街市啦!食環前年洗左200萬請顧問公司研究點先可以增加人流。顧問公司俾咗幾個方案:好似係改善通道過窄、裝冷氣、重新規劃檔位食環全部唔理,淨係走去翻新外牆。喂大佬!無人流唔係因為你外牆唔夠搞笑啊!係因為個街市無冷氣焗過焗爐,再加上地下積水多到成個水上樂園咁。放工時間你親身去行一轉既話,我建議你最好著定蛙鞋。店鋪之間既通道有時多個人都行唔過,仲塞過紅隧。
如果100分滿分,荃灣街市我諗得20分,肯定唔合格。

【荃景圍街市】
呢間已經唔可以叫做街市,應該叫做廢墟。成間街市有3層咁大,得個幾間鋪仔開檔。出租率得一成,平均每個鐘先得一個客。聽講食環自己都知做唔住決定摺咗佢。
睇在佢起3層養個幾個檔位咁闊佬份上,即管俾番10分。

【香車街街市】
呢間就正正常常,雖然規模細咗啲。但叫做似模似樣,試過幾次發現價錢貴過街鋪少少,但未去到唔可以接受。行開行埋都有雜物阻路,不過無荃灣街市咁嚴重。個場仲係用緊舊式吊扇,如果可以好似而家啲新街市咁,有冷氣就更好啦!
50分,不過不失。

【楊屋道街市】
好彩,荃灣仲有間楊屋道街市。四個食環街市數佢最旺,地下全層都係賣海鮮,出名係海鮮天堂。要買魚一定去楊屋道街市,雖然貴但係高質。
不過楊屋道同其他舊街市有同一個弊病:地下濕滑。尤其老人家容易跣親,所以而家我都唔敢俾屋企既老人家自己去。
整體黎講比其他四間街市較好,值70分。

相信楊屋道街市都係唔少荃灣友既買餸集中地,但其實受歡迎程度都係比唔上附近啲街鋪,因為佢地既價錢會比街市平少少,至於其餘三個街市完全係有姿勢無實際。
當其他區都講緊要開多幾間食環街市既時候,我當堂嚇一跳,然後得啖笑。荃灣四間街市就係人辦,完美咁展示咗食環管理既街市有幾不堪。食環如果唔肯俾心機學吓點搞街市,好心就正正經經外判俾人搞啦!否則再開幾多間都係哂氣,根本解決唔到問題。我知實會有人話唔通領展街市好好咩,但至少人地個場旺得黎有冷氣同唔洗跣親先啊!唔該食環唔好搞到啲街市唔係水靜河飛,就係條路窄到喊出黎。學政府個廣告自己話齋「唔該,俾條路我行啦!」