主權移交廿載,各方都推出回顧,就連台灣《聯合報》都有做新聞特輯。當中其中一篇訪問馬家輝提到香港依幾年經歷緊小型文藝復興,原因就係「江山不幸詩家幸」,北來壓力,反而迫使港人思考同創作。佢認為,大哥大姐北上搵錢,香港巿場看似萎縮,但實際上係提供左巿場俾新一輩創作人嘗試,而近一兩年好似逐漸有成積。

另一篇訪問中,黃耀明亦講述北方嘅打壓,反而開放創作空間,因為某類人或作品,點避都係入唔到境,倒不如放開心境,另覓巿場。佢係2012年成立文藝復興基金會,就希望幫年輕一輩嘅創作人,教導佢哋係音樂以外,出版、行銷、發行等經營知識,幫佢哋拓展巿場。黃耀明認為香港創作人要明白,深圳河以北之外,香港仍可札根本地,然後進軍其他亞洲甚至世界巿場。

當然,依類文章由外人撰寫,總會有隔離飯香嘅味道。筆者同港、台、星等地嘅年輕人交往,發現大家都不滿自己嘅現況,但因為隔住個互聯網來睇其他地方,只睇到對方嘅好,因此都有種錯誤嘅羡慕。

不過「江山不幸詩家幸」,卻係歷史真理。戰國百家爭鳴、唐宋古典文藝復興、民初新文學運動、時代背景都有政治動盪。今日香港,處身政治漩渦,正好激發思想。唔係政治動盪令既有價值飽受衝擊,好多人未必有時間思考生活價值、民族文化、書寫語言等問題。就算寫左出來,巿場亦唔會受落。魯迅所講嘅:「醫人不如醫心,因而棄醫從文」,就係類似背景之下嘅類似反應。

互聯網嘅發展時序,亦係啱啱好。如果電腦科技發展遲左十五年,香港嘅傳統宣傳渠道由北方掌控,香港早已失守。電腦科技發展快十五年嘅話,主流企業亦可能已經係網上扎根,新思想要以互聯網衝擊現有思想,難度不小。但互聯網2.0同香港依一次小型文藝復興基本上同時發生,新一代先有空間,可以迅速以互聯網發展,形成過去幾年嘅政治形勢。

當然,互聯網係新科技,真正潛力仍然有待開發。美國YT頻道Crash Course,近半年就開始講電影發展史電影由一開始以摩登走馬燈嘅方式開始,都經歷過唔同階段。一開始,所謂電影只係一兩分鐘長,以一個鏡頭拍低馬戲團或者劇團某段動作,實際上只係窮人睇唔起真人表演嘅代替品。就算剪接,都係一代之後先發明嘅技巧,將之變成故事更係歷史里程碑。將唔同鏡頭剪接成連貫訊息(蒙太奇),源頭係蘇俄立國之初,物資缺乏之下,官方學者將舊片亂剪來實驗。所以由科技出現到形成定式,往往係兩三代人先完成嘅事。

今日互聯網嘅出現亦係類似。第一代嘅發展,以師法現有體制為主,因此網媒扮傳統報紙,YT扮電視。但係逐漸互聯網自己嘅特性,已經逐漸影響形式。文章由五百或一千字嘅專欄,精簡嘅演變成懶人包或者金句圖片,詳細嘅演變成幾千字嘅長文(例如劉仲敬);影片由半個鐘頭嘅電視節目,slow live演變成長達幾個鐘頭嘅直播打機,精製就變成幾分鐘嘅MV或短片。依類發展,只會逐漸深化,亦會慢慢變成文化嘅一部份,再經時間洗禮,去蕪存菁而變成民族傳統。

歐洲文藝復興,主體係雕刻品同油畫,因為果兩樣就係當時嘅主要媒介。香港上次黃金時代,載體先係報紙雜誌(各式小說都係以連載開始),繼而發展成流行曲同電視電影。今次文藝發展,主戰場將會係網上。無論係文章、影片、歌曲,甚至係電子遊戲,都可以訴說我哋嘅故事。