六月廿三 緬懷沙士英雄

筆者開始定期向本網供稿,始於約一年前,有巴打號召係6月23日,係香港公園太極園紀念沙士除名日,悼念沙士英雄。轉眼之間,已經足一年。今年紀念活動,將在6月23日星期五下午七時半至八時半舉行。活動詳情可以留意依個 FB post。網址:goo.gl/n7FDFs

沙士之中犠牲嘅七位醫護人員,係香港公園太極園都設有銅像。所以係太極園舉行紀念,實在極之恰當。幾個月之前,筆者在周日下午路過香港公園,亦去左太極園三鞠躬。當時有一位洋人,帶住幾個小朋友參觀。該位爸爸向小朋友讀出紀念碑上面的記述,然後就教導小朋友要尊重為國犠牲的先賢。依個就係國民教育嘅典範。

當然,正如蔣介石嘅名言:「犧牲未到最後關頭,決不輕言犧牲。」真正愛護香港,絕對唔會希望我哋嘅子弟有所犠牲。但係今日嘅局面,來之不易,係靠前人無數嘅血汗換番來。港共竄改歷史,就係希望香港人忘記,其實香港人可以好堅強,並非只靠佢地口中嘅袓國。其實歷史傳承好簡單。只要每一代人都堅守崗位,守好自己嘅一更,自然就會減輕下一代嘅壓力。緬懷英烈,就係要確認上一代嘅努力,鼓舞自己,繼續努力。

近年被稱香港女兒嘅,通常就係指梅豔芳同謝婉雯醫生。開拓廣東話流行文化,梅豔芳係一大功臣。冇左當年嘅文化黃金時代,今時今日香港係未能夠負隅頑抗,實係未知之數。而謝醫生等幾位先烈,更係香港低谷之時,扶大廈之將傾,挽狂瀾於既倒。沙士穩定之後,七一遊行剎停廿三條,香港經濟先至逐步回穩,逐漸形成今日嘅局面。追思慎遠,希望各位都記得,星期五就係沙士除名日,係確立香港民族嘅重要紀念日