主權移交廿載,港府行禮如儀,展開一系列嘅慶祝活動。不過係堆砌嘅活動之下,政治光譜上嘅所有勢力,實際上有邊個係真正開心?廿年時間唔短:睇下旁邊嘅澳門係「一國兩制完全示範」,縱使未如北方一樣完全臣服,已經再無組織性嘅反對活動。中共係1950 年入藏,到1965年亦已經完成清剿活動,成立西藏自治區。

就算中國同台灣,係四九年之後數二十年,亦已經完成大部份社會改造。1969年,中國經歷幾次政治活動,連文革亦經歷咗最動盪嘅三年。台灣方面,蔣介石入主廿年,基本上消除咗日本嘅殖民勢力,國民黨嘅體制已經變得穩定,而該黨提倡嘅大中華主義亦已經深入民心。就算後來台獨勢力冒起,最基本理論亦係以中華文明分支為基礎。中台兩地之後幾十年嘅政治軌跡,係1969年已經大致落實。

反觀香港,主權移交廿載之後,香港人嘅中國人身份認同跌至新低;十年前大部份人覺得係天方夜譚嘅港獨勢力,反而係年輕一代之中,逐漸發酵。政治上,以「一國兩制」包裝嘅吸收策略亦唔見得特別成功,最少同澳門西藏模式距離愈來愈遠。北方口中嘅「反對派」,雖然屢次分裂,但整體勢力未見衰弱。

就算其他方面,香港流行文化進入低潮之後,代之而起嘅亦非中國流行文化。假如香港年輕一代,好似筆者一代迷木村拓哉一樣咁崇拜中國明星,文化統戰或者會更輕易。近年香港流行文化搵到平衡,新一代人才似乎逐漸浮現,如果能發展成香港流行文化第二春,就算未能好似以前咁遠征海外,都一樣會令香港嘅獨有身份更明顯。

經濟統戰,或者吸引左一班本地富豪,但係民間反而做成愈來愈深嘅港中矛盾。而且經過廿年嘅收購同擴張之後,中資係香港只係佔有一席之地,而非好似英治時代咁,衣食住行皆由怡和和太古掌控。當中國自己債務危機愈滾愈大,人口老化甚至人口萎縮又迫在眉睫之時,將來要再以巨額資金收購香港資產,只會愈來愈困難。

每次中港矛盾一起,總有一類人出來話香港只有七百萬人,係對方十三億嘅一個零頭;又會話香港經濟總量,只有對方嘅百分之三,甚至唔少城巿嘅經濟總量都追過香港。但係現實中香港離心力愈來愈大,反而更顯出依類數字意義唔大。反而對方用力愈多,就愈顯得香港反而影響對方嘅全盤佈局。

或者我地最大嘅影響力,就係刺破謊言,令對方嘅復興美夢,顯得荒唐可笑:一個小小香港,都唔參加你個復興夢,咁你個夢又有幾馨香?

七月一號,當局會設法令慶典衣香鬢影,營造歌舞昇平嘅假象。果日舞台上面嘅掌權者,到底會有幾多個,係真心慶幸「香港回歸」?