雙黃一陳:今天師徒之情如父子,明天兄弟鬩牆情義絕

其實從上年七月,我已經不斷評論陳雲嘅行為,而當時佢已經不斷挑釁各派別,例如港大學派嘅《民族論》,青政,本民前等等,當時我都覺得,如果係限於「選舉」,其實好正常,因為:「我唔搶你啲票,我搶邊個呢?」但佢嘅言語炮轟個程度,已經超越選舉程度,到左八月,甚至我直言一句:「我越來越覺得,黃毓民說「兄弟爬山」,不是指熱城普和本土派,而是說給熱城普內部,要明白,始終是熱、城、普」

今時今日嘅局面,由邊個搞到咁,其實局外人好清楚,由陳雲,以一個立法會選舉候選人身份,再加上「熱城普」嘅代表,不斷挑釁港大學派、踩本民青、縱容旗下支持者撩是鬥非,利用聯盟之便,不斷生事,令其他人將所有事,都入落「熱城普」當中,令到「熱城普」同其他派別係無彎可轉,勢不兩立,更加唔好提和解兩隻字。

黃毓民率先開火,完全同陳雲黃洋達,擺出一幅勢成水火的陣勢,好似好主動,好強悍,但我哋都知,黃毓民依刻,係無能力鎮住個場面,特別係失去議席後,各方面嘅力量,都已經大不如前,其實由社民連,人力,到今日,黃毓民嘅力量,係削弱左好多,每次分裂或對立,都將黃毓民嘅動員力,公信力削弱,係有名聲,仲有江湖地位嘅,但好多人,會保持距離,只不過2012年到敗選,黃洋達係段「師徒關係」到,真係有落好多力,特別係人手方面投入,而且當時差唔多,個個熱血公民,都講到自己好「尊重教主」、「一世教徒」,仲肉麻到講句:「無黃毓民,我哋乜都唔係」」

所以我哋有個錯覺,黃毓民無問題架哦,甚至我諗黃毓民嗰陣,都唔估到今日會俾人從後抽刀,因為對比社民連同人力,黃毓民同黃洋達,係2012年開始,個互動個合作,係遠超過去任何一人,呢種信任關係下,加上黃洋達確實,好大力幫黃毓民,宣揚「全民制憲」個理念等等,加上黃洋達嘅動員力,黃洋達理所當然咁,擔當熱城普嘅選舉總指揮。而結局,就係黃毓民一人之力,走遍三個區,最後連自己嘅嘢都保唔住。近兩年,大家都知黃毓民身體無咁好,唔係以前咁硬淨,有時候係議會,都無可避免要缺席,特別有關隻眼,係選舉個陣,黃洋達自己都講過,黃毓民病緊,依然走去其他區拉票助選,到底誰輕視左九西個選舉工程呢?邊個咁大安旨意,任由黃毓民經常跨區拉票呢?呢啲問題,我經常諗,但永遠只要啲人唔講,我們都奈佢唔可。

而選後最大的後患,就係個班「仗義執言」不斷用熱城普名義去清算,清黨,係呢個過程,已經令黃毓民同熱城嘅對家,產生間隙,就算呢班對家,真係想幫黃毓民手,都會幫又死,唔幫都死,點解陳雲係咁迫黃毓民,要佢補選,要佢支持本民青,又或者係咁講要本民前返去Myradio到?因為陳雲要「孤立黃毓民」,只要有邊個企係黃毓民到,陳雲就會講:「我講中,黃毓民根本係美國派黎,係班本民青狗主,佢係要搞死城邦派,阻攔華夏復興。」唔幫手嘅話,連黃毓民俾佢哋打壓,其他人走得甩咩?咁某程度上,佢哋就係知大家,唔會亂咁同熱城打對台,先會毫無顧忌四處開火。

而毫無顧忌開火,仲有一個原因,黃毓民而家最多咪係,一個有名氣嘅網台主持人,一個「前」立法會議員,點解城邦派,或個班乜嘢一世教徒,邊個搞毓民我同你死過啊,可以變面變到咁,因為黃毓民無價值,黃洋達有左忠實班底,由首領轉行到老板,而陳雲嘅政治行為,係每次風波,不單止無受損,反而每次都有所提升,影響力和「忠誠的信徒」都有所增加,而黃毓民呢?就係呢段此消彼嘅關係到,變成一個孤家寡人。

「你以前係議員,有資源有公權力,我就顧忌你,你依家得個爛鬼網台,我怕你有牙咩?你都只不過幫過我嘅哎呀師傅(或教主)。」如果佢哋咁諗好正常架,不過啲人就唔想變做廢陶咁,正面對鬧就實死,因為黃洋達佢哋都知,自己做嘢未夠名正言順,所以佢哋選擇「一人少句」,扮到唔關我事,我係旁觀,同黃毓民交火,全部由城邦派同班「仗義執言唔係熱狗」嘅人搞囉。

呢單嘢,陳雲其實有優勢,點解有優勢?因為城邦派同黃毓民無乜交集,就算陳雲正式黎講,同黃毓民最多係前盟友,或者前網台主持關係等等,唔似黃洋達早期同黃毓民咁「關係密切,情同父子」,加上陳雲又無乜嘢係黃毓民手到,所以黃毓民對陳雲嘅攻擊唔多到肉,呢個就係城邦派有恃無恐嘅地方。

其實,有好多實事比起這些風波更重要,但陳雲佢哋嘅所作所為,就好似一條刺,或者一條魚骨,卡係喉嚨到,唔解決就係一個隱憂,甚至而家係一個問題,因為無論大家何派何理念,只要同佢哋唔同,或者唔同佢哋合作,佢哋就會視你為敵人,就算互助互利過,叫做曾經盟友,只要無左利益,而你又無力量,就好似對黃毓民咁,成個例子係大家眼前,呢班人信唔信得過,我就唔信嘅,你可以信,但你信之前,唔係睇佢啲論述,而係睇佢點對人,佢今日可以咁對其他人,聽日點解唔可以咁對付你。

由本民青到港獨路向,由盧斯達到黃毓民,全部都因為路線唔同,而俾佢哋作出不同程度侵擾,其實要解決,唔係無方法,但需要好多人合作才可能做到,既然一切源於二二九,咁選前協調,一定可以搵到更多資料,知道更多內情,幫我哋判斷呢班人,值唔值得我哋相信,同解決大家心入面,一個問題:

「點解本土派會分裂?」

後話:
原本只係一篇片言隻語分享,大概幾百字原文,但我諗唔到有人,刻意Report呢篇,我唔知係講中,睇唔順眼,所以先要Report我,要令面書刪掉這篇文,而做得呢步,如果呢班人覺得用呢個方法,或者覺得用啲中共港共嘅手段,就可以令我收口,唔再講佢哋,無用架,除非我死啦,就咁。

事情原委:
https://www.facebook.com/CriticsHK/posts/1947376875475423