中國留學生楊舒平係大學畢業典禮演講，提到美國有言論自由，可以創作關於種族衡突嘅舞台劇。佢又提到美國空氣比佢家鄉昆明好，出街唔駛戴口罩。點知言論係深圳河以北引來風波，各方圍剿之下，迫到佢最終公開道歉。成個流程，同年半之前迫周子瑜道歉一樣。
強國民眾自認為抗爭勝利，但冇諗過每一次出現依類事件，只係將佢地同世界嘅距離拉得更遠。對香港人來講，其實已經無咩野可以評論，因為早已見慣北方果種野蠻，否則亦唔會出現港大最近民調嘅結果：中國係十幾個認知度高嘅國家之中，香港人最冇好感嘅一個國家。
近一年左右出現左一個現象，就係深黃網媒已經逐漸減少講北方民眾嘅野蠻，就算係講，都止於片面嘅抽水文。反而淺黃傳媒，仍然會評論依類問題，討論當地人心態等。依個現象同五年前，深黃網媒廣泛談論蝗蟲論，報導屎尿論，而淺黃傳媒話本土派係宣傳仇恨嘅法西斯，係完全相反嘅情況。依種此消彼長，或者就係因為「哀莫大於心死」。當深黃民眾已經唔再視北方人係同胞之後，佢地點野蠻都好，只要唔直接影響自己，都唔值得花心神去關心。
陶傑幾年前講話共產黨其實更擔心香港年輕一輩唔再紀念六四，就係同一個道理。當年蔣介石退守台灣，仍然矢志反攻大陸，咁台陸雙方仍係同一民族。到左李登輝同陳水扁全面退出國共內戰，表面上係將大陸雙手奉上俾共產黨，但係實際上一代之間，台灣就變成天然獨：中國係未改善，只要唔影響到島內，台灣年輕一輩已經唔再關心。
新興民族誔生，其實同物種進化一樣，都需要累積變化。人類同黑猩猩嘅DNA，就有99%相似，但係二三百年來，慢慢累積變化就成為兩個物種。中華民族，本來就係清末民初嘅建構，用以統一清帝國原版圖內嘅諸民族。1945年，中華民族打贏強鄰，中央政府事權統一，或者就係中華民族嘅高峰。之後兩岸分裂，港中台三者各自形成社會，異化已經逐漸出現。
到左2008年，兩岸三地各自出現歷史巧合，令中華民族彷彿會重新凝聚。當年北京奧運果首《北京歡迎你》，由兩岸三地一齊演出，或者係依一幕最形像化嘅表現。之後北方趨向保守、開始發酵成到處要人道歉嘅強國文化。台灣國民黨執政亦停唔到天然獨一代抬頭，到最後更催生左比民進黨更深綠嘅年輕力量。香港更加因為實際嘅民生問題，引發港中矛盾，繼而逐漸演化成今日嘅族群政治。
正如物種演化一樣，每一個小變化都唔會變成一個新物種。所以無論係廣東話、粵語入文、香港歷史、甚至再老餅嘅程序公義、法治系統，單一咁睇，都唔會證明香港係獨立民族。但係當變化累積夠多，就會突然發現，雙方己經愈行愈遠，難以接受對方係同胞。
香港網民無興趣捍衛楊舒平，連HJ2Q都比佢吸引，其實先係共產黨統戰部最要擔心嘅事。
