民族頌歌要點唱?

要唱民族頌歌,最正式做法係由軍樂團表演。依個做法係蘇俄式政權行之以久,不過就算民主國家,亦會沿用依個方式,例如美國陸軍軍樂團就經常唱《共和國戰歌》。係重要儀式,例如國葬,依類正式演奏亦係常態,以紀念領導人。2004年列根總統嘅喪禮,都係由陸軍軍樂團領唱該曲。


不過係其他場合,正式樂團演奏或會略嫌嚴肅,咁就經常會簡化樂器。受美國文化影響嘅國家,好多時候甚至會搵歌手清唱國歌。例如少女時代幾位歌手都曾經唱過韓國國歌。

部份文化亦流行將個人歌唱技巧融入演唱之中。例如美國國歌最後幾句好難唱,肺量大嘅歌手,就會刻意顯示肺量或者唱高八度。藝術效果如何,見人見智。但係容許歌手顯示個人風格,亦體現多元文化。

處於弱勢,頌歌亦經常變成抗爭手段。《北非諜影》之中,就出現一幕法國僑民係酒吧裏面,以法國國歌掩蓋德軍訟曲,以顯法國人民不屈意志。(題外話:係戲裏面,酒吧跟手就俾德軍封左報復。左膠或者會話,依一幕係無謂抗爭,俾左藉口德軍做野。)

國會之內,亦有議員唱歌之例。當年柏林圍牆倒下,西德議會正式接受知會之後,國會議員主動唱德國國歌,以慶祝德國有望統一。而2015年巴黎受襲之後,法國議會為死者默哀之後,亦自動唱國歌,以示抗爭精神。

2013年,紐西蘭通過同性婚姻法案之後,議長亦容許現場旁聽嘅民眾唱該國嘅愛國歌曲 Pokarekare Ana,以表慶祝。幾時泛民議員先會係香港議會唱番首愛國歌?

當政治氣氛相對輕鬆嘅時候,甚至連專制國度,亦會容許將頌曲改編。蘇聯係八十年代逐漸開放嘅時候,就有一個國歌搖滾版傳世。民主台灣,有國旗歌嘅搖滾版本更係絕不意外。相比今日要將搖滾樂係香港連根拔起,可想政治溫度,早已比八十年代蘇聯更冷。

所以其實唱民族頌曲,方法好多。實際上亦無定例,必定要以最嚴肅嘅方式演唱。尤其係國歌以外嘅其他頌曲,更係值得各自發展。有時係街頭偶然聽到,真正融入生活,先會更加感動!以下就係街頭歌手,係紐約地鐵站裏面演奏台灣國歌同國旗歌。