當睇英雄片咩,登珠峰要救人

真係想講下曾燕紅老師登珠峰事件

見到有留言質疑曾老師因為要登頂所以無對求救者申出援手,可能咁諗嘅人都係一番好心,不過依個諗法我就好唔同意。

以本人對救援嘅粗淺認知,救援嘅先決條件係自保,否則只會增添其他救援人員負擔及風險,甚至係施救同被救者都會死。

曾老師上嘅係珠峰,最高有8000幾海拔,而香港嘅海拔係0,住慣低海拔地區嘅人到高海拔地方好易會出現高山反應,高山反應係點呢?

我曾經都出現高山反應,當時我只係去到4000幾海拔,可能因為坐吊車上去上得太急,之後我行上山出現呼吸困難,行幾級樓梯扯幾分鍾蝦,手腳頭覺得痳痺,口唇發紫,最後都叫上到頂,不過埋單要吸咗3枝氧氣先落到山,都好難頂。

高山反應會因人而異,但都係會愈高愈嚴重,有人可以係習慣到高反之後無事,但係有人會嚴重至高山症,高山症係好易死人,而去到6000海拔之後係咩世界更加唔係我對住個 Mon 就想像到。

一個登山者可以帶備足夠裝備上山已經好難,如果見到有人救求就諗住將自己嘅氧氣分俾人再要加埋回程落山,基本上係玩命而唔係求援。

要睇英雄片嘅都係去戲院喇,到時就算有專業人員救人,係咁嘅環境,要救多一個人就只會加添救護非常大嘅危險。

當然我講嘅唔只係珠峰,平時見到人地有危險嗰陣,要救人都要顧自己安全先,救援唔係話叫你揸支槍去打仗呀。

至於旅遊達人吳得掂話曾老師成功登上珠峰係香港學生同教師嘅榜樣,依番說話我真係諗極都唔明,教局對曾老師咩支持都無,曾老師要登峰係要連教席都辭埋先可以圓夢,錢都要自己籌,以我所知,曾老師後尾係無再叫籌款,係啲朋友自發籌俾佢,榜樣嘅意思係咪叫大家退學辭教席食自己呢?咁都抽水你慳啲喇!