等待黎明 亦需各自努力

曾經有商界前輩講過,決定創業成唔成功並非睇唔睇得中巿場,而係逆境之時,能否守住戰線,避免破產。所以商場成功秘訣,其實就係「唔好蝕錢」。情場亦都一樣,激情過後,總會回歸平淡,人生其他重點,諸如事業、學業、健康等,就會重新佔據生命大部份時間。如何係唔同重點之間攞到平衡,繼續發展愛情,經常足以決定愛情可否開花結果。所以有人生導師就寫過,長遠決定成敗嘅,並非IQ,而係EQ裏面嘅韌力。

社會變革亦都一樣。自舊年新東補選起,本土派經歷一年嘅激情,終於立會選舉成積失望,再加上策略錯誤,政治能量原地踏步;派系之間更出現一波又一波鬥爭,一時群龍無首;加上對家刻意孤立圍剿,情況的確毫不樂觀。就算本網嘅流量,亦係幾個月之間大跌,到二三月之間,跌到幾年低位。簡單咁講,本土派的確面臨危機。

不過老一輩擅長觀察大勢嘅評論家,並未有好似我地一樣悲觀。練老上星期嘅長文《氣短集:國民黨選主席:本土大戰親中》,就將淺黃比之為國民黨,長遠一樣面對民主大中華主義嘅破產。練老甚至預期,下屆立法會選舉深黃票數(佢稱之為本自派)將會超越淺黃,令本自派成為香港第一票倉。筆者未敢一樣樂觀,但我都係商場打滾十幾年,明白世事滄海桑田,當風向一轉時候,有準備嘅人隨時可以爆發性增長。

英國脫歐,出現最終結果係一夜間嘅事。但係英國獨立黨成立於1991年,至2004年Nigel Farage入主之前,只係一盤散沙。2004年之後,亦要經營12年,先實現到最大政綱。由1991年計起,英國獨立黨都要有靱力爭取25年,先至見到成果。香港2008年嘅中國人身份認同達到歷史高位,之後港中矛盾漸增,但係真正形成政治能量,都係2014年雨革果79日。所以實際上,成個運動先啱啱開始。

當然,現代社會無可能每日都講政治,正如港女都無可能每日都熱戀。係平日可以做嘅,除左直接宣傳之外,亦需將身份認同化入日常生活每一個領域。紀念歷史事件、形成粵語慣例、甚至翻唱,承傳上輩流行文化,全部都需要一大群人自發努力,先會見到成果。《學苑》四月份以《香港新文學運動》為題,做左一整本粵語入文嘅正式刊物,就證明以粵語討論問題,並唔會比其他中文語系語言遜色。到左啱啱出版嘅一期,仍然有幾篇文章以粵語入文,更令人期待粵語論事,可以形成慣例。

東亞國家傳統使用嘅金漆,以透明膠為載體,裏面滲入金粉或者銅粉。以前幫神像上金漆要油好多層。頭幾層金粉尚少,油左之後,神像睇起來仍然似木像,不過上面多左層透明膠。但係只要持之以恒,一層一層咁油,突破某一臨界點之後,金粉夠多,神像就會突然變成金像。老一輩甚至話會感覺到神像突然發光,相信神靈被成功請入神像裏面。

要捱到下一次政治風向轉變,中間嘅等待的確唔容易。但係等待之間,正係俾時間我地一層一層咁幫「香港」上金漆,期望可以見到發光嘅一日。